അഹംഭാവത്തില്‍ നിന്ന് മുക്തി നേടുന്നു; തിരുപ്പതിയില്‍ എത്തി തല മുണ്ഡനം ചെയ്ത രചന നാരായണന്‍ കുട്ടി പറഞ്ഞത്

മറിമായം എന്ന ഷോയിലൂടെ പ്രേക്ഷകര്‍ ഏറ്റെടുത്ത അഭിനേത്രിയാണ് രചന നാരായണന്‍ കുട്ടി. പിന്നീട് മറിമായത്തില്‍ നിന്ന് പിന്മാറി, സിനിമയില്‍ സജീവമായപ്പോഴും ഹാസ്യ വേഷങ്ങളില്‍ തന്നെയാണ് രചന കൂടുതലും ശ്രദ്ധിക്കപ്പെട്ടത്. അഭിനേത്രി എന്നതിനപ്പുറ നര്‍ത്തകി കൂടെയായ രചന തന്റെ യാത്രകളെ കുറിച്ചൊക്കെ സോഷ്യല്‍ മീഡിയയില്‍ അപ്‌ഡേറ്റ് ചെയ്യാറുണ്ട്.

തിരുപ്പതിയില്‍ പോയി തലമുണ്ഡനം ചെയ്തതിനെ കുറിച്ചാണ് നടിയുടെ ഏറ്റവും പുതിയ ഇന്‍സ്റ്റഗ്രാം പോസ്റ്റ്. താനൊരു വലിയ വിശ്വാസിയാണ് എന്ന് പലപ്പോഴും തുറന്ന് പറഞ്ഞിട്ടുള്ള രചന, തന്റെ ക്ഷേത്ര ദര്‍ശന വിശേഷങ്ങള്‍ പങ്കുവയ്ക്കുന്നത് പതിവാണ്. എന്നാല്‍ ഇത്തവണത്തെ തിരുപ്പതി ദര്‍ശത്തിന് എന്തായിരുന്നു ഇത്രവലിയ പ്രത്യേകത എന്ന് രചന പോസ്റ്റില്‍ വ്യക്തമാക്കുന്നുണ്ട്.

‘കീഴടങ്ങുന്നു.. ഗോവിന്ദാ.. ഗോവിന്ദ’ എന്നാണ് കൈകൂപ്പിക്കൊണ്ട് രചന പറയുന്നത്. ‘അഹംഭാവത്തില്‍ നിന്ന് മുക്തി നേടുന്നു. അവന്റെ (ദൈവത്തിന്റെ) വാസസ്ഥലത്ത് തമോഗുണങ്ങള്‍ നീക്കം ചെയ്യുന്ന പ്രക്രിയ.’ എന്നും നടി കുറിച്ചിട്ടുണ്ട്. തന്നിലെ ഞാന്‍ എന്ന ഭാവം പൂര്‍ണമായും പിഴുതെറിയുന്നതിന്റെ ഭാഗമാണ് തലമുണ്ഡനം ചെയ്തത് എന്ന് പോസ്റ്റില്‍ രചന, ഹാഷ് ടാഗിലൂടെയും മറ്റും വ്യക്തമാക്കുന്നുണ്ട്.

ഹരഹരോ ഹര ഹര പാടി മഞ്ജു പിള്ള കമന്റ് ബോക്‌സിലെത്തി. ഗോവിന്ദാ ഗോവിന്ദാ എന്ന് വിളിച്ച് കൃഷ്ണ പ്രഭ, സോന നായര്‍, വീണ നായര്‍ തുടങ്ങി നിരവധി സെലിബ്രിറ്റികള്‍ വന്നിട്ടുണ്ട്. മാളവിക നായര്‍, ശ്വേത മേനോന്‍, ഗായത്രി അരുണ്‍, സുരഭി ലക്ഷ്മി തുടങ്ങിയവര്‍ ദൈവം അനുഗ്രഹിക്കട്ടെ എന്ന് പറയുന്നു.

തലമുണ്ഡനം ചെയ്യാനും, ആ ചിത്രങ്ങള്‍ സോഷ്യല്‍ മീഡിയയില്‍ പങ്കുവയ്ക്കാനും കാണിച്ച രചനയുടെ ധൈര്യത്തെ പ്രശംസിച്ചുകൊണ്ടാണ് ആരാധകരുടെ കമന്റുകള്‍. ഇന്റസ്ട്രിയിലേക്ക് വരുന്ന കാലത്ത്, നല്ല നീളമുള്ള മുടിയായിരുന്നു രചന നാരായണന്‍ കുട്ടിയുടേത്. പെട്ടന്ന് അത് ഷോര്‍ട്ട് ആക്കിയപ്പോള്‍ ഒരുപാട് ചോദ്യങ്ങള്‍ ഉയര്‍ന്നിരുന്നു. അടുത്തിടെ ആ നീളം വീണ്ടും കുറച്ചപ്പോള്‍ വിമര്‍ശിച്ചവരുമുണ്ട്. എന്നാല്‍ ഈ തീരുമാനത്തില്‍ ആര്‍ക്കും വിമര്‍ശനങ്ങളില്ല, ഇത് പ്രാര്‍ത്ഥനയുടെ ഭാഗം മാത്രം.

@All rights reserved Typical Malayali.