കോടികള്‍ വേണ്ട എന്ന് പറഞ്ഞ് സിനിമ വിടുന്ന വിജയ്, ആകെ ആസ്തി എത്രയാണെന്ന് അറിയാമോ; ബംഗ്ലാവ് പോലെ വീടും, ആഡംബര കാറുകളും പ്രോപ്പര്‍ട്ടികളും!

ഇന്ന് ഇളയദളപതി വിജയ് യുടെ അന്‍പതാം ജന്മദിനം ആണ്. പൊതുവെ ഈ ദിവസം തമിഴ്‌നാട് ദീപാവലിയും പൊങ്കലും പോലെ ഉത്സവമായി ആഘോഷിക്കാറുണ്ട്. എന്നാല്‍ ഇത്തവണ കള്ളക്കുറിച്ചി ദുരന്തത്തെ തുടര്‍ന്നാണ് ബര്‍ത്ത് ഡേ ആഘോഷം വേണ്ട എന്ന് വിജയ് കഴിഞ്ഞ ദിവസം പ്രഖ്യാപിച്ചത്. ആഘോഷങ്ങള്‍ക്ക് വേണ്ടി വച്ച പണം ദുരിതബാധിതര്‍ക്ക് നല്‍കണം എന്നും വിജയ് പറഞ്ഞിരുന്നു.

ജന സേവനത്തിനായി ഇറങ്ങി കഴിഞ്ഞാല്‍ പിന്നെ അത് മാത്രമാണല്ലോ ലക്ഷ്യം. ഇന്ന് ടോപ് ഹീറോ മാത്രമല്ല, തമിഴക വെട്രി കഴകം എന്ന രാഷ്ട്രീയ പാര്‍ട്ടിയുടെ സ്ഥാപകന്‍ കൂടെയാണ് വിജയ്. സിനിമാഭിനയം വിട്ട് വിജയ് രാഷ്ട്രീയത്തിലേക്കിറങ്ങുന്നു എന്നത് ആരാധകരെ സംബന്ധിച്ച് വലിയ വേദനയായിരുന്നു എങ്കിലും, തങ്ങള്‍ക്ക് വേണ്ടി കൂടെയാണല്ലോ അണ്ണന്‍ പൊതു സമൂഹത്തിലേക്ക് ഇറങ്ങുന്നത് എന്ന് കരുതി അവരങ്ങ് ആശ്വസിക്കുകയായിരുന്നു.

ഗോട്ട് എന്ന ചിത്രത്തോടെ വിജയ് അഭിനയം നിര്‍ത്തും എന്നായിരുന്നു പറഞ്ഞിരുന്നത്. വെങ്കട് പ്രഭു സംവിധാനം ചെയ്യുന്ന ചിത്രത്തിന്റെ ഓരോ അപ്‌ഡേഷനും ആരാധകര്‍ക്ക് ആവേശം നല്‍കുന്നതാണ്. വിജയ് യുടെ ബര്‍ത്ത്‌ഡേയോട് അനുബന്ധിച്ച് സ്‌പെഷ്യല്‍ ടീസര്‍ എല്ലാം ടീം പുറത്തുവിട്ടിരുന്നു. ഗോട്ട് എന്ന ചിത്രത്തോടെ വിജയ് അഭിനയം നിര്‍ത്തും എന്നാണ് പറഞ്ഞിരുന്നത്. എന്നാല്‍ എച്ച് വിനോദ് സംവിധാനം ചെയ്യുന്ന അടുത്ത ഒരു ചിത്രത്തില്‍ കൂെട വിജയ് അഭിനയിക്കാന്‍ സാധ്യതയുണ്ട് എന്ന് പറയപ്പെടുന്നു.

വിജയ് 69 എന്ന് താത്കാലികമായി പേരിട്ടിരിയ്ക്കുന്ന ചിത്രത്തിന് വേണ്ടി വിജയ് 275 കോടി രൂപ പ്രതിഫലം വാങ്ങുന്നു എന്നാണ് വിവരം. കേട്ടത് സത്യമാണെങ്കില്‍ ഏറ്റവും അധികം പ്രതിഫലം വാങ്ങുന്ന ബോളിവുഡ് താരം ഷാരൂഖ് ഖാന്റെ പ്രതിഫലത്തെക്കാള്‍ മുകളിലാണ് അത്. 250 കോടിയാണ് ഷാരൂഖ് ഖാന്റെ പ്രതിഫലം. അത് വിജയ് മറികടക്കുമോ എന്നാണ് ആരാധകര്‍ ഉറ്റുനോക്കുന്നത്.

നിലവില്‍ ഇന്ത്യയില്‍ ഏറ്റവും അധികം പ്രതിഫലം വാങ്ങുന്ന താരങ്ങളുടെ ലിസ്റ്റില്‍ മൂന്നാം സ്ഥാനത്താണ് വിജയ്. ഷാരൂഖ് ഖാന്‍ കഴിഞ്ഞാല്‍ 230 കോടി വാങ്ങുന്ന രജിനികാന്ത് ആണ്. രജിനികാന്തിന് ശേഷം നില്‍ക്കുന്ന വിജയ് യുടെ പ്രതിഫലം 200 കോടിയാണ്. തമിഴ് സിനിമാ ലോകത്ത് രജിനികാന്ത് കഴിഞ്ഞാല്‍, അടുത്തത് വിജയ് എന്ന് പറഞ്ഞു നില്‍ക്കുമ്പോഴാണ്, ഈ കോടികളുടെ പ്രതിഫലം വേണ്ട എന്ന് പറഞ്ഞ് വിജയ് രാഷ്ട്രീയത്തിലേക്ക് ഇറങ്ങുന്നത്.

നിലവില്‍ 600 കോടി രൂപയുടെ ആസ്തിയുണ്ട് വിജയ്ക്ക് എന്നാണ് ദ ഇന്ത്യന്‍ ഹെറാള്‍ഡ് റിപ്പോര്‍ട്ട്. നീലങ്കരയിലും സാലിഗ്രാമിലും നടന്റെ പേരില്‍ ലക്ഷ്വറി ബംഗ്ലാവുണ്ട്. പല ഇടങ്ങളിലായി വിജയ് സ്ഥലങ്ങള്‍ വാങ്ങിയിട്ടിട്ടുണ്ട്. അത് കൂടാതെ റോള്‍സ് റോയിസ് ഗോസ്റ്റ്, ഓഡി എ8, മിനി കൂപ്പര്‍, ബിഎംഡബ്ല്യു 5 സീരീസ് എന്നിങ്ങനെ പോകുന്ന ആഡംബര കാറുകളുടെ ലിസ്റ്റ്. ഇതിനൊപ്പം വിലകൂടിയ ബൈക്കുകളും സൈക്കിളുകളും വിജയ് യുടെ പോര്‍ച്ചില്‍ ഉണ്ട്.

അഭിനയ ജീവിതത്തില്‍ ആ ആഗ്രഹിച്ച സൂപ്പര്‍ സ്റ്റാര്‍ പദവിയും, പണവും സമ്പത്തും എല്ലാം വിജയ് നേടി. ഇപ്പോള്‍ വിജയ് സ്വപ്‌നം കാണുന്നത് തമിഴ്‌നാട് മുഖ്യമന്ത്രി കസേരയാണ്. എത്രത്തോളം ജനപിന്തുണ അതിന് ഉണ്ട് എന്ന് ഇനി കാലം പറയും.

@All rights reserved Typical Malayali.