ഞാനിപ്പോള്‍ പുതിയൊരാളാണ്! മകന്‍ വന്നതിന് ശേഷം ജീവിതത്തിലുണ്ടായ മാറ്റത്തെക്കുറിച്ച് അമല പോള്‍

കുഞ്ഞതിഥിയുടെ വരവിന് ശേഷം ജീവിതത്തില്‍ പല തരത്തിലുള്ള മാറ്റങ്ങള്‍ സംഭവിച്ചതായി പലരും തുറന്നുപറഞ്ഞിട്ടുണ്ട്. കരിയറിലും ജീവിതത്തിലുമെല്ലാം മാറ്റങ്ങള്‍ സംഭവിക്കാറുണ്ട്. ഒരാളും കൂടെ വരുന്നുണ്ടെന്നറിയുമ്പോള്‍ മുതല്‍ തന്നെ മനസ് കൊണ്ട് അച്ഛനും അമ്മയും ജനിക്കുകയാണ്. ജനനം മുതല്‍ അച്ഛനും കുഞ്ഞിന്റെ കാര്യങ്ങളെല്ലാം ചെയ്യാറുണ്ട്. ഡയപ്പര്‍ മാറ്റാനും, കുഞ്ഞിനെ താരാട്ട് പാടി ഉറക്കാനും മറ്റ് കാര്യങ്ങള്‍ ചെയ്യാനുമെല്ലാം അച്ഛനും മുന്നിലുണ്ടാവാറുണ്ട്. ഗര്‍ഭകാല വിശേഷങ്ങളെല്ലാം ചില സെലിബ്രിറ്റികള്‍ സോഷ്യല്‍മീഡിയയിലൂടെ പങ്കിടാറുണ്ട്. ഗര്‍ഭിണിയായിരുന്നപ്പോഴും സിനിമയില്‍ അഭിനയിക്കുകയും, പ്രമോഷന്‍ പരിപാടികളിലുമെല്ലാമായി സജീവമായിരുന്നു അമല പോള്‍. ഭാര്യയ്ക്ക് പൂര്‍ണ്ണപിന്തുണയുമായി ജഗത് ദേശായിയും കൂടെയുണ്ട്.

കുഞ്ഞതിഥി എത്തിയതിനെക്കുറിച്ചും, മകന് പേരിട്ടതിന്റെയുമെല്ലാം വിശേഷങ്ങള്‍ അമലയും ജഗതും സോഷ്യല്‍മീഡിയയിലൂടെ പങ്കുവെച്ചിരുന്നു. പ്രസവ ശേഷമായി അമ്മയും കുഞ്ഞും വീട്ടിലെത്തുന്നതിന്റെ വീഡിയോ സോഷ്യല്‍മീഡിയയിലൂടെ വൈറലായിരുന്നു. ഇലൈ എന്നാണ് മകന് പേരിട്ടതെന്നും അമല വ്യക്തമാക്കിയിരുന്നു. അമ്മയായതിന് ശേഷമുള്ള വിശേഷങ്ങളായിരുന്നു താരം കഴിഞ്ഞ ദിവസം ഇന്‍സ്റ്റഗ്രാം സ്‌റ്റോറിയിലൂടെയായി പങ്കിട്ടത്. ആരാധകരുടെ ചോദ്യങ്ങള്‍ക്കെല്ലാം താരം മറുപടിയേകിയിരുന്നു.

അമ്മ റോള്‍ എങ്ങനെയുണ്ടെന്ന ചോദ്യത്തിന് ഓണ്‍ ഡ്യൂട്ടിയെന്നായിരുന്നു മറുപടി. ഇപ്പോള്‍ ഞാന്‍ പുതിയൊരാളാണ്, പുതിയൊരു ജീവിതവുമാണ്, ഇതൊരു മാജിക്കാണെന്നുമായിരുന്നു ഇളൈ വന്നതിന് ശേഷമുള്ള മാറ്റത്തെക്കുറിച്ച് ചോദിച്ചയാളോട് അമല പറഞ്ഞത്. പ്രസവ ശേഷം ഉറങ്ങാന്‍ പറ്റുന്നുണ്ടോയെന്നായിരുന്നു വേറൊരാളുടെ ചോദ്യം, ഉണ്ടെന്നായിരുന്നു താരത്തിന്റെ മറുപടി.

ആടുജീവിതം റിലീസിന് മുന്നോടിയായുള്ള പ്രമോഷന്‍ പരിപാടികളില്‍ അമലയും സജീവമായിരുന്നു. ഗര്‍ഭകാല ബുദ്ധിമുട്ടുകളുണ്ടായിരുന്നെങ്കിലും അതൊന്നും ജോലിയെ ബാധിക്കരുതെന്ന കാര്യത്തില്‍ നിര്‍ബന്ധമുണ്ടായിരുന്നുവെന്ന് താരം വ്യക്തമാക്കിയിരുന്നു. ഗര്‍ഭകാല യാത്രയില്‍ എല്ലായ്‌പ്പോഴും ജഗതും കൂടെയുണ്ടായിരുന്നു. ആത്മവിശ്വാസം നഷ്ടമാവുന്നുവെന്ന് തോന്നിയപ്പോള്‍ ചേര്‍ത്തുപിടിച്ച് മുന്നോട്ട് നയിച്ചത് അദ്ദേഹമാണ്. ജീവിതത്തില്‍ താന്‍ എന്തോ ചെയ്തത് കൊണ്ടായിരിക്കാം ഇത്രയും നല്ലൊരു പങ്കാളിയെ കിട്ടിയതെന്നും മുന്‍പ് അമല ജഗതിനെക്കുറിച്ച് പറഞ്ഞിരുന്നു.

2023 നവംബറിലായിരുന്നു ജഗതും അമലയും തമ്മിലുള്ള വിവാഹം. വിവാഹചിത്രങ്ങളും വീഡിയോയും വൈറലായിരുന്നു. ജനുവരിയിലായിരുന്നു അമ്മയാവാന്‍ ഒരുങ്ങുന്ന സന്തോഷം അമല പങ്കുവെച്ചത്. പിന്നീടങ്ങോട്ടുള്ള വിശേഷങ്ങളെല്ലാം താരം ഇന്‍സ്റ്റഗ്രാമിലൂടെയായി പങ്കിടുന്നുണ്ടായിരുന്നു. മകനൊപ്പമുള്ള സന്തോഷനിമിഷങ്ങള്‍ ജഗതും പങ്കിട്ടിരുന്നു.

@All rights reserved Typical Malayali.