ശ്രീജുവും കൂടി വേണമായിരുന്നു! അച്ഛനും അമ്മയ്ക്കുമൊപ്പമുള്ള ഫോട്ടോ പങ്കുവെച്ച് മീര നന്ദന്‍

അഭിനേത്രിയും ഗായികയും ആര്‍ജെയുമായ മീര നന്ദന്‍ സോഷ്യല്‍മീഡിയയിലും സജീവമാണ്. സിനിമയില്‍ നിന്നും മാറി ദുബായിലേക്ക് ചേക്കേറിയപ്പോള്‍ റേഡിയോ ജോക്കിയായി ജോലി ചെയ്യുകയായിരുന്നു മീര. അഭിനയം മാത്രമല്ല അവതരണവും തനിക്ക് ഇഷ്ടപ്പെട്ട കാര്യമാണെന്ന് മീര പറഞ്ഞിരുന്നു. അടുത്തിടെയായിരുന്നു മീര വിവാഹിതയായത്. അറേഞ്ച്ഡ് മാര്യേജായിരുന്നു താരത്തിന്റേത്. അമ്മമാരാണ് ഈ പ്രൊപ്പോസലിനെക്കുറിച്ച് ആദ്യം സംസാരിച്ചത്. ലണ്ടനിലാണ് ശ്രീജു, അങ്ങോട്ടേക്ക് പോവേണ്ടി വരുമോയെന്ന കാര്യത്തില്‍ ആശങ്കയുണ്ടായിരുന്നു. ദുബായ് ജീവിതം അവസാനിപ്പിക്കേണ്ട കാര്യമില്ലെന്നായിരുന്നു ശ്രീജു മീരയോട് പറഞ്ഞത്. ഇടയ്ക്ക് മീരയെ കാണാനായി അദ്ദേഹം ദുബായില്‍ എത്തുകയും ചെയ്തിരുന്നു.

ആഗ്രഹിച്ചത് പോലെ തന്നെ ഗുരുവായൂരമ്പലത്തില്‍ വെച്ചായിരുന്നു മീരയും ശ്രീജുവും ഒന്നിച്ചത്. പ്രിയപ്പെട്ടവരെല്ലാം ഇവരുടെ വിവാഹത്തില്‍ പങ്കെടുത്തിരുന്നു. വിവാഹചിത്രങ്ങളും വീഡിയോകളുമെല്ലാം സോഷ്യല്‍മീഡിയയിലൂടെ വൈറലായിരുന്നു. വിവാഹ ശേഷമുള്ള വിശേഷങ്ങളും താരം സോഷ്യല്‍മീഡിയയിലൂടെ പങ്കിടുന്നുണ്ട്. ശ്രീജുവിനൊപ്പമായി കൊച്ചിയില്‍ എത്തിയതിനെക്കുറിച്ച് പറഞ്ഞ് താരമെത്തിയിരുന്നു. അതിന് ശേഷമായാണ് പാലക്കാടേക്ക് പോയത്. പാലക്കാടന്‍ കാറ്റ് എന്ന ക്യാപ്ഷനോടെയായി സാരിയണിഞ്ഞുള്ള മനോഹര ചിത്രങ്ങളും മീര പോസ്റ്റ് ചെയ്തിരുന്നു.അച്ഛനും അമ്മയ്ക്കുമൊപ്പമുള്ള ഫോട്ടോയും മീര പങ്കുവെച്ചിട്ടുണ്ട്. എന്റെ ലോകം എന്നായിരുന്നു ചിത്രത്തിന് നല്‍കിയ ക്യാപ്ഷന്‍. ഈ ലോകത്തെ പുതിയ അതിഥിയെ കാണുന്നില്ലല്ലോ, അദ്ദേഹത്തെയും കൂടെ കൂട്ടേണ്ടതല്ലേയെന്നായിരുന്നു ചിലര്‍ ചോദിച്ചത്.

ജീവിതത്തില്‍ എല്ലാ കാര്യങ്ങള്‍ക്കും പിന്തുണയുമായി കൂടെയുള്ളവരാണ് അച്ഛനും അമ്മയും. കാര്യങ്ങളെല്ലാം നോക്കിയിരുന്നത് അവരായിരുന്നു. ഒറ്റയ്ക്ക് ഒന്നും ചെയ്ത് ശീലമുണ്ടായിരുന്നില്ല, അതിന് മാറ്റം വന്നത് ദുബായില്‍ എത്തിയതോടെയാണ്. തുടക്കത്തില്‍ കുറേയേറെ വെല്ലുവിളികളായിരുന്നു. ഇടയ്ക്ക് തളര്‍ന്നുപോയെങ്കിലും പൊരുതി മുന്നേറുകയായിരുന്നു. ശമ്പളം പോലുമില്ലാതെ ജീവിക്കേണ്ടി വന്നതിനെക്കുറിച്ച് മുന്‍പൊരു അഭിമുഖത്തില്‍ മീര തുറന്നുപറഞ്ഞിരുന്നു.

താന്‍ നല്ലൊരു പാട്ടുകാരിയായി കാണാനായിരുന്നു അമ്മ ആഗ്രഹിച്ചിരുന്നത്. അന്ന് അതിനായി ശ്രമിച്ചിരുന്നില്ലെന്നും മീര പറഞ്ഞിരുന്നു. സിനിമയില്‍ സജീവമായിരുന്ന കാലത്ത് എല്ലായ്‌പ്പോഴും അമ്മ കൂടെയുണ്ടാവാറുണ്ടായിരുന്നു. എന്നെ കാണുന്നവരെല്ലാം അമ്മയെക്കുറിച്ച് ചോദിക്കുമായിരുന്നു. എല്ലാവരും അമ്മയുമായും സൗഹൃദത്തിലാണ്. ദുബായിലേക്ക് പോയപ്പോഴും അമ്മ കൂടെ വന്നിരുന്നു. അവിടെ വീടൊക്കെ സെറ്റാക്കി കാര്യങ്ങളെല്ലാം ചെയ്തുതന്ന് അമ്മ തിരിച്ച് പോരികയായിരുന്നു.

വിവാഹം വൈകിയപ്പോള്‍ അതേക്കുറിച്ചുള്ള ചോദ്യങ്ങളെല്ലാം നേരിട്ടത് അച്ഛനും അമ്മയുമാണെന്നും മീര തുറന്നുപറഞ്ഞിരുന്നു. മകള്‍ക്ക് വിവാഹം നോക്കുന്നില്ലേ, ഇങ്ങനെ വിടുന്നത് ശരിയാണോ എന്നുള്ള ചോദ്യങ്ങളെല്ലാം അവരോടായിരുന്നു. നാട്ടില്‍ വരുന്ന സമയത്ത് ഞാനും ഇതേ ചോദ്യങ്ങള്‍ നേരിടാറുണ്ട്. എന്നോട് ചോദിക്കുന്നവര്‍ക്ക് വ്യക്തമായി ഞാന്‍ മറുപടി നല്‍കുമായിരുന്നു. വിവാഹം നടക്കേണ്ട സമയത്ത് നടന്നോളും എന്നാണ് ഞാന്‍ വിശ്വസിച്ചത്. അത് അങ്ങനെ തന്നെയാണ് സംഭവിച്ചതെന്നും താരം വ്യക്തമാക്കിയിരുന്നു.

@All rights reserved Typical Malayali.