കള്ളം പറയേണ്ട ആവശ്യമില്ല, എന്റെ ആ ബിസിനസ് പൂട്ടി! വൈറലായ സോപ്പ് ബിസിനസ് അവസാനിപ്പിക്കാനുള്ള കാരണം വെളിപ്പെടുത്തി ഐശ്വര്യ ഭാസ്‌കരന്‍
നരസിംഹം, പ്രജ എന്നീ സിനിമകളില്‍ മോഹന്‍ലാലിന്റെ നായികയായി വന്ന് മലയാളി പ്രേക്ഷകരുടെ ഇഷ്ടം പിടിച്ചുപറ്റിയ നടിയാണ് ഐശ്വര്യ ഭാസ്‌കരന്‍. ആദ്യകാല നടി ലക്ഷ്മിയുടെ മകള്‍ കൂടെയായ ഐശ്വര്യയെ പാരിജാതം സീരിയലിലെ ആന്റിയമ്മയായി ഓര്‍ത്തുവയ്ക്കുന്നവരുമുണ്ട്. സിനിമയില്‍ ഇപ്പോള്‍ അത്ര സജീവമല്ല എങ്കിലും, സീരിയലുകളിലൂടെ ഐശ്വര്യ ഇപ്പോഴും അഭിനയ ലോകത്ത് തന്നെയുണ്ട്
മള്‍ട്ടി മമ്മി എന്ന തന്റെ യൂട്യൂബ് ചാനലിലൂടെയാണ് ഐശ്വര്യ ഭാസ്‌കരന്‍ എപ്പോഴും ആരാധകരുമായി സംവദിയ്ക്കുന്നത്. വീട്ടിലെ പൂച്ചകളുടെ വിശേഷങ്ങളും, ഒറ്റയ്ക്കുള്ള ജീവിത വിശേഷങ്ങളും ഷൂട്ടിങ് വിശേഷങ്ങളും എല്ലാം ഐശ്വര്യ തന്റെ യൂട്യൂബ് ചാനലിലൂടെ പങ്കുവയ്ക്കാറുണ്ട്. അങ്ങനെ പങ്കുവച്ച ഒരു വീഡിയോയില്‍ ആണ് തന്റെ സോപ് വ്യാപാരം അവസാനിപ്പിച്ചതിനെ കുറിച്ച് ഐശ്വര്യ ഭാസ്‌കരന്‍ പറഞ്ഞത്.
ഫ്‌ളവേഴ്‌സ് ഒരു കോടി എന്ന ഷോയില്‍ പങ്കെടുക്കവെ, ജീവിക്കാന്‍ അഭിനയം മാത്രമല്ല തനിക്ക് ഇപ്പോള്‍ സോപ്പ് ബിസിനസും ഉണ്ട് എന്ന് ഐശ്വര്യ ഭാസ്‌കര്‍ വെളിപ്പെടുത്തിയിരുന്നു. പിന്നാലെ പല അഭിമുഖങ്ങളിലും ഐശ്വര്യ ഇതാവര്‍ത്തിച്ചു. സ്വന്തമായി സോപ്പ് ഉണ്ടാക്കി, വീടുകള്‍ തോറും കയറി വില്‍പന നടത്തുകയാണ്, ഈ തൊഴിലില്‍ താന്‍ സംതൃപ്തയാണ്, നടിയെന്ന ടാഗ് വേണ്ട എന്നൊക്കെയാണ് അന്ന് ഐശ്വര്യ പറഞ്ഞിരുന്നത്.
എന്നാല്‍ ഇന്ന്, ബിസിനസ്സ് പൂര്‍ണമായും തകര്‍ന്നു. ഇനി ആ ബിസിനസ്സുമായി മുന്നോട്ടില്ല, കഴിഞ്ഞ ഡിസംബര്‍ മാസത്തോടെ ബിസിനസ് അവസാനിപ്പിച്ചു എന്ന് ഐശ്വര്യ പറയുന്നു. സോപ്പ് ബിസിനസ്സിനെ കുറിച്ച് നിരന്തരം ചോദിയ്ക്കുന്നവര്‍ക്ക് മറുപടിയെന്നോണമാണ് ഐശ്വര്യയുടെ മറുപടി.
കള്ളം പറയേണ്ട കാര്യം എനിക്കില്ല, സത്യസന്ധമായി തന്നെ പറയാം- ആ ബിസിനസ്സില്‍ നിന്ന് എനിക്ക് യാതൊരു തര ലാഭവും ഇല്ല. തീര്‍ച്ചയായും, വലിയൊരു ലാഭം പ്രതീക്ഷിച്ച് തുടങ്ങിയ ബിസിനസ് അല്ല. എന്നിരുന്നാലും, ഇറക്കുന്ന കാശെങ്കിലും തിരിച്ചു കിട്ടണമല്ലോ. എങ്കില്‍ മാത്രമല്ലേ, ആ ബിസിനസ് മുന്നോട്ട് കൊണ്ടു പോകാന്‍ സാധിയ്ക്കൂ. അത് പോലും തിരിച്ചു കിട്ടാത്ത അവസ്ഥയിലാണ് വ്യാപാരം നിര്‍ത്തിയത്.
മാത്രമല്ല, അഞ്ച് കിലോ ഭാരമൊന്നും തൂക്കി പിടിക്കാനും, ബക്കറ്റുമായി തൂങ്ങി നടക്കാനും ഒന്നും എന്റെ ആരോഗ്യം കൊണ്ട് സാധിയ്ക്കുന്നില്ല. ഇപ്പോഴുണ്ടാക്കിയ സമ്പാദ്യം എല്ലാം ഇതുപോലെ ബിസിനസ്സില്‍ ഇട്ട് നശിപ്പിക്കാന്‍ ആഗ്രഹിക്കുന്നല്ല, ഉള്ളത് എന്തെങ്കിലും നാളേക്ക് സേവ് ചെയ്തു വയ്ക്കണമല്ലോ. അതുകൊണ്ട് എന്റെ ആരോഗ്യത്തിന് വേണ്ടിയല്ലാതെ മറ്റൊന്നിനും അഞ്ചിന്റെ കാശ് ചെലവാക്കാന്‍ ഞാന്‍ ആഗ്രഹിക്കുന്നില്ല- ഐശ്വര്യ ഭാസ്‌കരന്‍ പറഞ്ഞു.
@All rights reserved Typical Malayali.
Leave a Comment