ചെകുത്താനെ അറസ്റ്റ് ചെയ്തത് എന്തിന്? മോഹൻലാൽ ആരാധകരിൽ വിദ്വേഷം ജനിപ്പിച്ച് ലഹള ഉണ്ടാക്കണമെന്ന് ഉദ്ദേശം; എഫ്ഐആർ ഇങ്ങനെ

കൊച്ചി: നടൻ മോഹൻലാലിനെതിരെ അപകീർത്തികരമായ പരാമർശം നടത്തിയ കേസിൽ എഫ്ഐആർ പുറത്ത്. ലെഫ്റ്റനന്‍റ് കേണൽ മോഹൻലാലിനെതിരെ അധിക്ഷേപ പരാമർശം നടത്തിയ ‘ചെകുത്താൻ’ എന്ന യുട്യൂബ് ചാനല്‍ ഉടമ അജു അലക്സിനെയാണ് പോലീസ് കസ്റ്റഡിയിലെടുത്തത്. ഭാരതീയ ന്യായ സംഹിത 192,296(b) കെ.പി ആക്റ്റ് 2011 120(0) വകുപ്പുകളാണ് അജുവിനെതിരെ ചുമത്തിയിരിക്കുന്നത്.

‘ഇന്ത്യൻ ടെറിട്ടോറിയൽ ആർമിയിൽ ലെഫ്റ്റനന്‍റ് കേണൽ പദവി വഹിക്കുന്ന സിനിമാ താരം മോഹൻലാൽ വയനാട് ഉരുൾപൊട്ടൽ ഉണ്ടായ ദുരന്തഭൂമിയിൽ പട്ടാള യൂണിഫോണിൽ സന്ദർശനം നടത്തിയതിനെതിര സമൂഹമാധ്യമമായ യൂട്യൂബിൽ ചെകുക്കാൻ എന്ന ചാനലിൽ കൂടി മറ്റുള്ളവർ കാണണമെന്നും സമൂഹമധ്യത്തിൽ മോഹൻലാലിനെ അപകീർത്തിപ്പെടുത്തുന്നതിനും, മോഹൻലാൽ ആരാധകർക്ക് വിദ്വേഷം ജനിപ്പിച്ച് സമൂഹത്തിൽ ലഹള ഉണ്ടാക്കണമെന്നുമുള്ള ഉദ്ദേശത്തോടും കൂടി 03 – 08 – 2024ാം തീയതി അപ്ലോഡ് ചെയ്ത വീഡിയോക്കെതിരെയാണ് നടപടി’യെന്നാണ് എഫ്ഐആറിൽ പറയുന്നത്.

മോഹൻലാലിനെതിരെ അജു അലക്സ് നടത്തിയ അധിക്ഷേപ പരാമർശങ്ങളും എഫ്ഐആറിൽ പരാമർശിച്ചിട്ടുണ്ട്. തിരുവല്ല പോലീസാണ് എഫ്ഐആർ രജിസ്ട്രർ ചെയ്തത്. കേസ് എടുത്തതിന് പിന്നാലെ അജു ഒളിവിൽ പോയിരുന്നു.

ചലച്ചിത്ര താരങ്ങളുടെ സംഘടനയായ അമ്മ ജനറല്‍ സെക്രട്ടറി സിദ്ദിഖ് നല്‍കിയ പരാതിയിലാണ് കേസെടുത്തത്. ‘ആശുപത്രിയില്‍ പോകുമ്പോള്‍ യൂണിഫോമിട്ട് ഇറങ്ങുന്ന ആളുടെ പേരാണ് മോഹന്‍ലാല്‍. അതൊക്കെ ചെയ്യാന്‍ ഇന്ത്യയില്‍ മോഹന്‍ലാലിനെ പറ്റത്തുള്ളു. യൂണിഫോം വലിയ സംഭവമായി പോയി’ തുടങ്ങിയ പരാമർശങ്ങളും യൂട്യൂബർ നടത്തിയിരുന്നു.
വയനാട്ടിൽ ഭൂമിക്കടിയിൽ നിന്നും മുഴക്കം; പരിഭ്രാന്തരായി ജനങ്ങൾ

ദുരന്ത മുഖത്തേക്ക് രക്ഷാപ്രവര്‍ത്തനത്തിന് വരുന്നവര്‍ സംഘടനകളുടെ യൂണിഫോം ഇട്ടിട്ട് വരരുതെന്നും അങ്ങനെയുള്ളവരെ ബാന്‍ ചെയ്യണമെന്നും അജു അലക്സ് പറഞ്ഞിരുന്നു. തമിഴ്നാട് മുഖ്യമന്ത്രി ജയലളിതക്കെതിരെയും അലക്സ് അധിക്ഷേപകരമായ പരാമര്‍ശം നടത്തുന്നുണ്ട്.

അജു അലക്സിന്‍റെ അറസ്റ്റിൽ പ്രതികരിച്ച് നിർമാതാവ് എൻഎം ബാദുഷയും രംഗത്തുവന്നു. സോഷ്യൽ മീഡിയയിൽ വന്നിട്ട് ആരേയും തെറിവിളിക്കാം എന്ന് കരുതിയ ചെകുത്താൻ കൂട്ടിലായി ഇന്നലെ കളമശ്ശേരി പോലീസ് ചെകുത്താൻ എന്ന പേരിൽ അറിയപ്പെട്ടിരുന്ന ഈ വ്യക്തിയെ അറസ്റ്റ് ചെയ്തു, മോഹൻലാൽ എന്ന താരത്തിനെ നിരന്തരമായി മോശം പദപ്രയോഗം നടത്തുകയും അദ്ദേഹത്തിനെ വ്യക്തിപരമായി മോശമായി സംസാരിക്കുന്നതും ഇയാൾക്ക് പതിവായിരുന്നു. അതിനെതിരെ അമ്മ സംഘടന കൊടുത്ത പരാതിയിലാണ് ഇയാളെ അറസ്റ്റ് ചെയ്തത്. ( സോഷ്യൽ മീഡിയയിൽ ഏത് ഐഡിയിൽ നിന്നും മോശമായി ആരെയെങ്കിലും ചീത്ത വിളിക്കുകയോ അവരുടെ ഫാമിലിയെ പറയുന്നവർക്ക് ഏല്ലാം ഇനി പരാതിപ്പെട്ടാൽ 24 മണിക്കൂറിനുള്ളിൽ ഇതായിരിക്കും അവസ്ഥ ) എന്നും ബാദുഷ പറഞ്ഞു.

@All rights reserved Typical Malayali.