നീയില്ലാത്ത ശൂന്യത ഓരോ നിമിഷവും അലട്ടുന്നുണ്ട്! ഭാര്യയുടെ അഞ്ചാം ചരമവാര്‍ഷികത്തില്‍ ബിജു നാരായണന്‍ കുറിച്ചത്

ബിജു നാരായണന്റെ ഭാര്യ ശ്രീലത വിടവാങ്ങിയിട്ട് അഞ്ച് വര്‍ഷം. ഭാര്യ കൂടെയില്ലാത്തതിന്റെ ശൂന്യത ഓരോ നിമിഷവും അറിയുന്നുണ്ടെന്ന് ബിജു പറയുന്നു. ഫേസ്ബുക്ക് പോസ്റ്റിലൂടെയായിരുന്നു അദ്ദേഹം ഭാര്യയെക്കുറിച്ച് വാചാലനായത്. വേര്‍പാടിന്റെ അഞ്ചാം വര്‍ഷമെന്ന ക്യാപ്ഷനോടെയായിരുന്നു പോസ്റ്റ്. ശ്രീലതയുടെ മനോഹരമായൊരു ഫോട്ടോയും പങ്കുവെച്ചിരുന്നു അദ്ദേഹം.

ബിജു, നിനക്കു മാത്രമല്ല എനിക്കും അവളുടെ സ്നേഹവും ചിരിയും വർത്തമാനവുമൊന്നും അന്നത്തെ പോലെ ഓർമ്മയിലുണ്ട് ,എൻ്റെ ഫ്ലാറ്റിൻ്റെ പാല് കാച്ചലിന് അവളായിരുന്നല്ലൊ എൻ്റെ മകളായി നിന്ന് എല്ലാവരേയും സൽക്കരിച്ചത്. അവൾ വാങ്ങിത്തന്ന പല സാധനങ്ങളും കാണുമ്പോൾ അവൾ മാത്രം ഇല്ലല്ലൊ എന്ന ചിന്ത എന്നും വേദന തരുന്നു .ദൈവഹിതം ആർക്ക് ഭേദിക്കാനാകും ,നമ്മുടെ സ്മരണയിൽ അവളെന്നും ജീവിക്കട്ടെ എന്നായിരുന്നു ശോഭന രവീന്ദ്രന്റെ കമന്റ്.

ശ്രീലത കൂടെയില്ലെന്ന യാഥാര്‍ത്ഥ്യം ഇനിയും ഉള്‍ക്കൊള്ളാനായിട്ടില്ലെന്ന് ബിജു നാരായണന്‍ പറഞ്ഞിരുന്നു. അഞ്ച് വര്‍ഷം എന്നത് അഞ്ച് മാസമായാണ് അനുഭവപ്പെടുന്നത്. ഇനിയൊരു വിവാഹത്തെക്കുറിച്ചൊന്നും താന്‍ ചിന്തിക്കുന്നില്ലെന്നും അദ്ദേഹം വ്യക്തമാക്കിയിരുന്നു.

മഹാരാജാസ് കോളേജില്‍ വെച്ചായിരുന്നു ബിജുവും ശ്രീലതയും പരിചയപ്പെടുന്നത്. പരിചയം പിന്നീട് പ്രണയത്തിലേക്ക് വഴിമാറുകയായിരുന്നു. 10 വര്‍ഷത്തെ പ്രണയത്തിന് ശേഷമായിരുന്നു ഇരുവരും വിവാഹിതരായത്. 21 വര്‍ഷത്തെ ദാമ്പത്യ ജീവിതവും 10 വര്‍ഷത്തെ പ്രണയവും അങ്ങനെ 31 വര്‍ഷം ഇരുവരും ഒന്നിച്ചായിരുന്നു. ജീവിതത്തില്‍ എല്ലാ അവസ്ഥയിലും ശ്രീ കൂടെയുണ്ടായിരുന്നു. അവളില്ലാത്തതിന്റെ കുറവാണ് ഇപ്പോള്‍ ജീവിതത്തില്‍. പുതിയ പാട്ടുകള്‍ പാടുമ്പോഴും, പുരസ്‌കാരങ്ങള്‍ തേടിയെത്തുമ്പോഴും ഇതൊന്നും കാണാന്‍ ശ്രീ കൂടെയില്ലല്ലോ എന്ന സങ്കടമുണ്ടാവാറുണ്ടെന്നും ബിജു നാരായണന്‍ പറഞ്ഞിരുന്നു.

അര്‍ബുദ രോഗത്തെ തുടര്‍ന്നായിരുന്നു ശ്രീലത വിടവാങ്ങിയത്. വേദന സഹിച്ച് വേദനകളില്ലാത്ത ലോകത്തേക്ക് പോവുകയായിരുന്നു ശ്രീ. അവസാന സമയങ്ങളില്‍ മോര്‍ഫിന്‍ കൊടുത്തിരുന്നു. അത്രയും വേദനയായിരുന്നു. വേദനകളില്ലാത്ത ലോകത്തേക്ക് ശ്രീ പോവട്ടെയെന്നായിരുന്നു അന്ന് പ്രാര്‍ത്ഥിച്ചിരുന്നതെന്ന് ബിജു പറഞ്ഞിരുന്നു. ഗായകരെല്ലാമായി സൗഹൃദമുണ്ടായിരുന്നു ശ്രീലതയ്ക്ക്. ഗായകരുടെ കൂട്ടായ്മയായ ‘സമം’ ന്റെ യോഗങ്ങളില്‍ ബിജുവിനൊപ്പം ശ്രീയും പങ്കെടുക്കാറുണ്ടായിരുന്നു. ഇടയ്ക്ക് മീറ്റിംഗ് നടത്തിയ സമയത്ത് എല്ലാവരും ഒന്നിച്ച് ഫോട്ടോ എടുക്കണമെന്ന് ശ്രീ പറഞ്ഞിരുന്നു. തിരക്കിലായതിനാല് അത് വിട്ടുപോയി, ശ്രീയുടെ ആ ആഗ്രഹം സഫലമാകാതെ പോയതിലൊരുപാട് വിഷമം തോന്നിയിട്ടുണ്ടെന്നും അദ്ദേഹം പറഞ്ഞിരുന്നു.

@All rights reserved Typical Malayali.