ലാലേട്ടനെ കാണാന്‍ പോയി സിനിമയില്‍ മുഖം കാണിച്ചു! രസികന് മുന്‍പ് മോഹന്‍ലാല്‍ ചിത്രത്തില്‍ പ്രത്യക്ഷപ്പെട്ടതിനെക്കുറിച്ച് സംവൃത സുനില്‍

കോളേജില്‍ പഠിച്ച് കൊണ്ടിരിക്കുന്ന സമയത്താണ് സംവൃത സുനിലിന് സിനിമയില്‍ നിന്നും അവസരം ലഭിക്കുന്നത്. രസികന്റെ ചിത്രീകരണം നേരത്തെ തുടങ്ങിയിരുന്നു. മുന്‍പ് തീരുമാനിച്ചിരുന്ന നായികയ്ക്ക് എന്തോ അസൗകര്യം വന്നതോടെയാണ് പുതിയ ആളെ തിരഞ്ഞത്. നായികയ്ക്ക് വേണ്ടിയുള്ള അവസാനത്തെ തിരഞ്ഞെടുപ്പിനിടയിലായിരുന്നു ലാല്‍ ജോസ് സംവൃതയിലേക്ക് എത്തിയത്. മ്യൂസിക്കല്‍ വൈഫ് ഗ്രാന്റ് ഫിനാലെയില്‍ അതിഥിയായി എത്തിയപ്പോഴായിരുന്നു സംവൃത തന്റെ സിനിമാപ്രവേശനത്തെക്കുറിച്ച് വാചാലയായത്.

ടെസ അന്ന് എന്റെ സീനിയറായി പഠിക്കുന്നുണ്ടായിരുന്നു. എന്നെക്കുറിച്ച് ലാലു ഏട്ടന്‍ ടെസയോട് ചോദിച്ചിരുന്നു. ഇങ്ങനെയൊരു കുട്ടി അവിടെ പഠിക്കുന്നുണ്ടോ എന്ന് ചോദിക്കുകയായിരുന്നു. ഞാന്‍ ജോയിന്‍ ചെയ്തിട്ട് ഒരാഴ്ചയായതേയുള്ളൂ. മീശമാധവന്റെ ഡയറക്ടര്‍ നിന്നെക്കുറിച്ച് ചോദിക്കുന്നുണ്ടെന്ന് എന്നോട് പറഞ്ഞത് ടെസ ചേച്ചിയാണ്.

അച്ഛനോടും അമ്മയോടും ചോദിക്കാതെ എനിക്കൊന്നും പറയാനാവില്ലെന്നായിരുന്നു ഞാന്‍ ചേച്ചിയോട് പറഞ്ഞത്. നോക്കുമ്പോള്‍ അവര്‍ക്കും കോള്‍ പോയിട്ടുണ്ട്. അങ്ങനെയാണ് അവരും എന്നോട് പോയി നോക്കാന്‍ പറഞ്ഞത്. രാജീവ് രവിക്കൊപ്പമായാണ് ലാലു ഏട്ടന്‍ വന്നത്. ഉറങ്ങിയെഴുന്നേറ്റ അതേ രൂപത്തിലാണ് ഞാന്‍ അവരുടെ മുന്നിലേക്ക് പോയത്. നന്ദനത്തിലേക്ക് രഞ്ജിത്തേട്ടന്‍ എന്നെ ക്ഷണിച്ചതായിരുന്നു. അന്ന് അത് സ്വീകരിക്കാനായില്ല, പഠനം കഴിഞ്ഞാല്‍ സംവൃതയെ വെച്ച് സിനിമയെ ചെയ്യുമെന്ന് അദ്ദേഹം എന്നോട് പറഞ്ഞിരുന്നു. ഈ സിനിമ കിട്ടിയില്ലെങ്കിലും രഞ്ജിത്തേട്ടന്റെ സിനിമയില്‍ അഭിനയിക്കാമല്ലോ എന്നായിരുന്നു എന്റെ മനസില്‍. അന്ന് വൈകിട്ട് തന്നെ എന്നെ സിനിമയിലേക്ക് തിരഞ്ഞെടുത്തതായി കോള്‍ വന്നിരുന്നു.
Suriya Karthi Kanguva: വെള്ളക്കുതിരയിൽ പാഞ്ഞുവരുന്നത് കാർത്തിയോ?

സംവൃതയെ തിരഞ്ഞെടുത്തുവെന്നും നാളെ തന്നെ സിനിമയിലേക്ക് ജോയിന്‍ ചെയ്യണമെന്നുമായിരുന്നു പറഞ്ഞത്. കോളേജില്‍ നിന്നും ലീവെടുത്ത് പോവുകയായിരുന്നു. ദിലീപേട്ടനൊപ്പം കുറേ ഫോട്ടോസ് എടുത്തിരുന്നു. അങ്ങനെ തുടങ്ങിയ സിനിമാജീവിതമാണ് ഇവിടെ എത്തി നില്‍ക്കുന്നതെന്ന് സംവൃത പറഞ്ഞിരുന്നു.

അതിനും മുന്‍പ് മറ്റൊരു സിനിമയില്‍ സംവൃതയെ കണ്ടതിനെക്കുറിച്ചായിരുന്നു ഡെയ്ന്‍ ചോദിച്ചത്. അയാള്‍ കഥ എഴുതുകയാണ് എന്ന ചിത്രത്തിലായിരുന്നു അത്. അന്ന് ഏഴാം ക്ലാസില്‍ പഠിക്കുകയായിരുന്നു. എന്റെ അങ്കിളിന്റെ വീട്ടില്‍ വെച്ചും സിനിമയുടെ ചിത്രീകരണമുണ്ടായിരുന്നു. ലാലേട്ടനെ കാണാന്‍ വേണ്ടി പോയതായിരുന്നു. അങ്ങനെയാണ് ലാലേട്ടനും നന്ദിനി ചേച്ചിയും ഉള്ള സീനില്‍ നിന്നത്. ഈ കുട്ടികള്‍ക്കൊക്കെ ബാക്കില്‍ നില്‍ക്കാമോ എന്ന് കമല്‍ സാര്‍ ചോദിച്ചിരുന്നു. അങ്ങനെയാണ് അതില്‍ മുഖം കാണിച്ചത്. ആരും ചിരിക്കാതെ നില്‍ക്കണമെന്നായിരുന്നു കമല്‍ സാര്‍ പറഞ്ഞത്.

@All rights reserved Typical Malayali.