തിരിച്ചുവരവില്‍ തനിക്കേറ്റവും അധികം പിന്തുണ നല്‍കിയ നടന്; കുഞ്ചാക്കോ ബോബന്റെ ജന്മദിനത്തില്‍ മഞ്ജു വാര്യര്‍ പങ്കുവച്ച സ്റ്റോറി
ഇന്ന് മലയാളത്തിന്റെ ചോക്ലേറ്റ് ഹീറോ കുഞ്ചാക്കോ ബോബന്റെ ജന്മദിനമാണ്. പ്രിയപ്പെട്ട നടന് ആശംസകള്‍ അറിയിച്ച് സിനിമ ലോകത്തെ സുഹൃത്തുക്കളും സഹപ്രവര്‍ത്തകരും ആരാധകരും സോഷ്യല്‍ മീഡിയയില്‍ എത്തി. തന്റെ ഉറ്റ സുഹൃത്തും സഹനടനുമായ കുഞ്ചാക്കോ ബോബന് മഞ്ജു വാര്യര്‍ ആശംസകള്‍ അറിയിച്ചത് ഇന്‍സ്റ്റഗ്രാം സ്‌റ്റോറിയിലൂടെയാണ്.
കുഞ്ചാക്കോ ബോബനൊപ്പമുള്ള ഒരു സ്‌റ്റൈലന്‍ ചിത്രത്തിനൊപ്പമാണ് മഞ്ജുവിന്റെ പോസ്റ്റ്. ‘എക്കാലവും മധുരമേറിയ കുഞ്ചാക്കോ ബോബന് പിറന്നാള്‍ ആശംസകള്‍’ എന്നാണ് മഞ്ജു പോസ്റ്റിനൊപ്പം കുറിച്ചത്. പിങ്ക് നിറത്തിലുള്ള നിറയെ ഹാര്‍ട്ടിന്റെ ഇമോജിയും പോസ്റ്റിനൊപ്പമുണ്ട്. അത് കൂടാതെ കുഞ്ചാക്കോ ബോബന്റെ ഏറ്റവും ഒടുവില്‍ പുറത്തിറങ്ങിയ ബോഗയ്ന്‍വില്ലയുടെ പോസ്റ്ററും, വരാനിരിയ്ക്കുന്ന ഓഫീസര്‍ ഓണ്‍ ഡ്യൂട്ടി എന്ന ചിത്രത്തിന്റെ പോസ്റ്ററും മഞ്ജു പങ്കുവച്ചിട്ടുണ്ട്.
തിരിച്ചുവരവില്‍ മഞ്ജുവിന് ഏറ്റവും അധികം പിന്തുണ നല്‍കിയ നടന്മാരില്‍ ഒരാളാണ് കുഞ്ചാക്കോ ബോബന്. വിവാഹത്തിന് മുന്‍പ് മഞ്ജു വാര്യര്‍ സജീവമമായിരുന്ന കാലത്ത് ഒരു സിനിമ പോലും ചാക്കോച്ചനൊപ്പം ചെയ്തിരുന്നില്ല. ഇരുവരും ഒന്നിച്ച ചെയ്തത് ഒരേ ഒരു മാഗസിന്‍ കവര്‍ ഷൂട്ട് മാത്രമായിരുന്നു. അത് അന്ന് ആരാധകര്‍ ഏറ്റെടുക്കുകയും ചെയ്തിരുന്നു.
14 വര്‍ഷത്തിന് ശേഷം 2014 ല്‍ ഹൗ ഓള്‍ഡ് ആര്‍ യു എന്ന ചിത്രത്തിലൂടെ മഞ്ജു വാര്യര്‍ തിരിച്ചെത്തുമ്പോള്‍ നായകനായി എത്തിയത് കുഞ്ചാക്കോ ബോബനാണ്. നായികാ പ്രാധാന്യമുള്ള ഒരു സിനിമയില്‍ അഭിനയിക്കാന്‍ ഏതൊരു മുന്‍നിര നടനും മടിക്കുന്ന സമയത്ത് കുഞ്ചാക്കോ ബോബന് ആ റോള്‍ ഏറ്റെടുത്ത് ചെയ്തത് പ്രശംസകള്‍ക്ക് അര്‍ഹനാക്കി. പിന്നീട് വേട്ട എന്ന ചിത്രത്തിലാണ് ഇരുവരും ഒന്നിച്ചഭിനയിച്ചത്.
അതിന് ശേഷം സിനിമകള്‍ ഒരുമിച്ച് ചെയ്തില്ലെങ്കിലും, ക്യാമറയ്ക്ക് പിന്നില്‍ നല്ലൊരു സൗഹൃദം സൂക്ഷിക്കുന്ന താരങ്ങളാണ് കുഞ്ചാക്കോ ബോബനും മഞ്ജുവും. കുടുംബത്തോടൊപ്പം ഇവര്‍ നടത്തിയ ചില യാത്രകളുടെ ഫോട്ടോകള്‍ എല്ലാം സോഷ്യല്‍ മീഡിയ ഏറ്റെടുത്തിരുന്നു.
@All rights reserved Typical Malayali.
Leave a Comment