ആറാട്ടണ്ണൻ, പെരേര, തൊപ്പി…; ബിഗ് ബോസിലേക്ക് ഈ വൈറൽ താരങ്ങളും? പൊളിച്ചേനെയെന്ന് സോഷ്യൽ മീഡിയ

ഒരുപക്ഷേ ടെലിവിഷൻ പ്രേക്ഷകർ ഇത്രയേറെ കാത്തിരിക്കുന്ന ഒരു റിയാലിറ്റി ഷോ വേറെയുണ്ടാകില്ല. ആരാധകരെ പല ഫാൻ ആർമികളായി തിരിച്ച് സോഷ്യൽ മീഡിയിൽ അവർക്ക് വേണ്ടി ചർച്ചകൾ നടത്തുന്ന മറ്റൊരു ടെലിവിഷൻ ഷോ ഉണ്ടോ എന്നതും സംശയമാണ്. പറഞ്ഞുവരുന്നത് ബിഗ് ബോസിനെക്കുറിച്ച് തന്നെ. ബിഗ് ബോസ് മലയാളം ആറാം സീസണിന് ഇന്നാണ് തുടക്കമാകുന്നത്. ആരാകും ഇത്തവണത്തെ മത്സരാർഥികൾ എന്ന ചർച്ച ഇതിനോടകം സജീവമായിട്ടുണ്ട്. പതിവിന് വിപരീതമായി രണ്ട് മത്സരാർഥികളെ ഇതിനോടകം തന്നെ മോഹൻലാൽ പ്രഖ്യാപിക്കുകയും ചെയ്തിട്ടുണ്ട്. ഇത്തണ ബിഗ് ബോസിൽ ഈ മത്സരാർഥികൾ ഉണ്ടെങ്കിൽ ഷോ പൊളിച്ചേനെയന്നാണ് സോഷ്യൽ മീഡിയ പറയുന്നത്. ആ താരങ്ങൾ ആരൊക്കെയെന്ന് നോക്കാം.

പതിവിന് വിപരീതമായി ഒട്ടേറെ പുതുമകളുമായാണ് ഇത്തവണത്തെ ബിഗ് ബോസ് പ്രേക്ഷകരിലേക്ക് എത്തുന്നത്. അതിൽ ആദ്യത്തേത് മതസരാർഥികെ ആദ്യമേ പ്രഖ്യാപിച്ച തീരുമാനം തന്നെയായിരുന്നു. കഴിഞ്ഞയാഴ്ചയാണ് ഉദ്ഘാടന എപ്പിസോഡിന് ഒരാഴ്ച മുൻപ് തന്നെ മോഹൻലാൽ രണ്ട് പേരുകൾ പ്രഖ്യാപിച്ചത്. കോമണര്‍ വിഭാഗത്തിലെത്തുന്ന കായികാധ്യാപികയും ബൈക്ക് റൈഡറുമായ റസ്മിന്‍ ബായ്‍, യാത്രകള്‍ ഇഷ്ടപ്പെടുന്ന നിഷാന എന്നിവരാണ് ഈ രണ്ട് പേർ. സാധാരണക്കാരുടെ പ്രതിനിധികളായാണ് ഇവർ ഷോയിൽ പങ്കെടുക്കുക.

‘കളി മാറുകയാണ്. മാറ്റുകയാണ്. ബിഗ് ബോസ് സീസൺ 6, ഒന്ന് മാറ്റി പിടിച്ചാലോ’ എന്ന ക്യാപ്ഷനോടെയാണ് ബിഗ് ബോസ് സീസൺ 6 എത്തുന്നത്. അതുകൊണ്ട് തന്നെ പുതിയ കളിയിൽ ആരൊക്കെയാകും പങ്കെടുക്കുക എന്നറിയാനുള്ള കാത്തിരിപ്പിലാണ് ആരാധകർ. മണിക്കൂറുകൾക്കുള്ളിൽ തന്നെ ആ പേരുകൾ പുറത്ത് വരികയും ചെയ്യും. അതേസമയം നിരവധി താരങ്ങളുടെ പേരുകളുമായി സാധ്യതാ പട്ടിക ഇതിനോടകം തന്നെ സജീവമാണ്. സീരിയൽ താരങ്ങളുടെയും സോഷ്യൽ മീഡിയ താരങ്ങളുടെയും പേരുകളാണ് കൂടുതലും ഉയർന്നുകേൾക്കുന്നത്.

ബിഗ് ബോസിന്‍റെ പ്രമോഷൻ വീഡിയോകൾ പുറത്തുവന്നപ്പോൾ തന്നെ പല പേരുകളും സോഷ്യൽ മീഡിയയിൽ ചർച്ചയായിരുന്നു അതിൽ ഒന്നാണ് സിനിമ റിവ്യൂകളിലൂടെ ശ്രദ്ധേയനായ ആറാട്ടണ്ണന്‍ എന്ന സന്തോഷ് വർക്കിയുടേത്. സിനിമ തിയേറ്റുകളുടെ പുറത്ത് ഓൺലൈൻ ചാനലുകൾക്ക് റിവ്യൂ നൽകിയും സോഷ്യൽ മീഡിയയിൽ വീഡിയോകളിലൂടെയും ശ്രദ്ധിക്കപ്പെട്ട വ്യക്തിയാണ് സന്തോഷ് വർക്കി. ആറാട്ടണ്ണൻ ബിഗോ ബോസിലെത്തിയാൽ. ബിഗ് ബോസ് ഹൗസ് വേറെ ലെവലായിരിക്കുമെന്നാണ് സോഷ്യൽ മീഡിയ പറയുന്നത്.

ആറാട്ടണ്ണൻ ഉണ്ടെങ്കിൽ പ്രസംഗ അണ്ണൻ എന്നറിയപ്പെടുന്ന അലിൻ ജോസ് പെരേരയും ഉണ്ടാകുമെന്നാണ് സോഷ്യൽ മീഡിയയുടെ വാദം. ആറാട്ടണ്ണന് പിന്നാലെ റിവ്യൂ പറഞ്ഞ് ശ്രദ്ധനേടിയ വ്യക്തിയാണ് പെരേരയും. സിനിമ റിലീസ് ദിവസങ്ങളിൽ തിയേറ്ററുകളിലെത്തി ഡാൻസ് കളിച്ച് പാട്ട് പാടി റിവ്യൂ പറഞ്ഞാണ് അലിൻ ജോസ് പെരേര ശ്രദ്ധ നേടിയത്. അച്ഛനൊപ്പമുള്ള ഷോർട് ഫിലിമുമായി അലിൻ ജോസ് സോഷ്യൽ മീഡിയയിലെത്തിയിരുന്നു. തിയേറ്ററിന് പുറത്തെ ആറാട്ടണ്ണൻ – പ്രസംഗ അണ്ണൻ കോമ്പോ ബിഗ് ബോസിലുണ്ടാകുമോയെന്ന് വൈകാതെ അറിയാം.

ഇത്തവണത്തെ ബിഗ് ബോസിൽ വിവാദ യൂട്യൂബർ തൊപ്പിയെന്ന പേരിൽ അറിയപ്പെടുന്ന നിഹാദ് ഉണ്ടാകുമോയെന്നാണ് ഒരുവിഭാഗം ഉറ്റുനോക്കുന്നത്. അശ്ലീല പദ പ്രയോഗത്തിന്‍റെ പേരിൽ പോലീസ് നടപടിയും മറ്റും നേരിടേണ്ടി വന്നതോടെയാണ് ഓൺലൈനിന് പുറത്തും തൊപ്പി താരമായത്. വിവാദങ്ങൾക്ക് ശേഷം പല ഓൺലൈൻ മീഡിയകളുടെയും അഭിമുഖങ്ങളിലും നിഹാദ് എത്തിയിരുന്നു. ഇയാൾ ബിഗോ ബോസ് ഹൗസിലുണ്ടെങ്കിൽ ഷോ എങ്ങനെയാകും മുന്നോട്ടുപോവുകയെന്ന രസകരമായ ചോദ്യങ്ങളാണ് സോഷ്യൽ മീഡിയയിൽ വരുന്നത്.

@All rights reserved Typical Malayali.