ഒന്നിച്ചിട്ട് 18 വര്‍ഷങ്ങള്‍; രണ്ട് പെണ്‍മക്കള്‍ക്കൊപ്പം സന്തോഷകരമായ കുടുംബജീവിതം; വിവാഹ വാര്‍ഷികത്തില്‍ ഗിന്നസ് പക്രു പറയുന്നു

പൊക്കമില്ലായ്മയാണ് എന്റെ പൊക്കം എന്ന് കുഞ്ഞുണ്ണി മാഷ് പറഞ്ഞതുപോലെയാണ് പക്രുവിന്റെ വിജയം. മിമിക്രി വേദികളില്‍ നിന്ന് അഭിനയ ലോകത്തേക്ക് എത്തിയ പക്രു, തന്നെ കൊണ്ട് സാധിക്കില്ല എന്ന് പറഞ്ഞ പലതും താണ്ടി, ഗിന്നസ് വേള്‍ഡ് റെക്കോര്‍ഡ് വരെ എത്തി. മലയാളത്തിന് പുറമെ അന്യഭാഷയിലും തന്റെ സാന്നിധ്യം അറിയിച്ച താരം തന്റെ വിശേഷങ്ങള്‍ എല്ലാം സോഷ്യല്‍ മീഡിയയിലൂടെ പങ്കുവയ്ക്കാറുണ്ട്.

വിവാഹ വാര്‍ഷികമവുമായി ബന്ധപ്പെട്ട ഇന്‍സ്റ്റഗ്രാം പോസ്റ്റുമായി എത്തിയിരിക്കുകയാണ് ഇപ്പോള്‍ പക്രു. വിവാഹ ചിത്രവും, ഇപ്പോഴുള്ള ചിത്രവും പങ്കുവച്ചുകൊണ്ടാണ് പതിനഞ്ച് വര്‍ഷത്തെ ദാമ്പത്യ ജീവിതത്തെ കുറിച്ച് പക്രു എത്തിയത്. ‘ഒന്നിച്ചിട്ട് വര്‍ഷം 18, സ്‌നേഹിക്കുന്നവരുടെ പ്രാര്‍ത്ഥനകള്‍ക്ക് നന്ദി’ എന്നാണ് പക്രു ഇന്‍സ്റ്റഗ്രാമില്‍ കുറിച്ചത്.

നടി അലീന പടിക്കല്‍, റാണി ശരണ്‍, സെന്തില്‍ കൃഷ്ണ, സൗപര്‍ണിക തുടങ്ങിയ സെലിബ്രേറ്റികള്‍ അടക്കമുള്ളവര്‍ ആശംസകളുമായി കമന്റ് ബോക്‌സില്‍ എത്തിയിട്ടുണ്ട്. ആശംസകള്‍ അറിയിച്ചവര്‍ക്ക് പക്രു നന്ദി പറയുകയും ചെയ്തിട്ടുണ്ട്.

2006 ല്‍ ആയിരുന്നു അജയ് കുമാര്‍ എന്ന ഗിന്നസ് പക്രുവിന്റെയും ഗായത്രി മോഹന്റെയും വിവാഹം. 2008 ല്‍ ആയിരുന്നു ആദ്യത്തെ മകളുടെ ജനനം. ദീപ്ത കീര്‍ത്തി അച്ഛന്റെ ബെസ്റ്റ് ഫ്രണ്ടായി വളര്‍ന്നതിന് സോഷ്യല്‍ മീഡിയ സാക്ഷിയാണ്. 2023 ല്‍ രണ്ടാമത്തെ മകള്‍ പിറന്നു, ദ്വീജ കീര്‍ത്തി എന്നാണ് ഇളയകുട്ടിയ്ക്ക് പേരിട്ടത്.

അമ്പിളിയമ്മാവന്‍ എന്ന ചിത്രത്തിലൂടെ 1986 ല്‍ ആണ് അജയകുമാര്‍ അഭിനയ ലോകത്തേക്ക് എത്തുന്നത്. ചെറിയ വേഷങ്ങളിലൂടെ ശ്രദ്ധ നേടിയെടുത്തു. ഒരു മുഴുനീള ചിത്രത്തില്‍ നായകനായി അഭിനയിച്ച ഏറ്റവും പൊക്കം കുറഞ്ഞ നായകന്‍ എന്ന വിശേഷണത്തോടെയാണ് പക്രു ഗിന്നസ് വേള്‍ഡ് റെക്കോര്‍ഡില്‍ ഇടം നേടിയത്. ഇത് കൂടാതെ, കേരള- തമിഴ്‌നാട് സര്‍ക്കാറിന്റെ പുരസ്‌കാരങ്ങളും അഭിനയത്തിന് പക്രു നേടിയെടുത്തിട്ടുണ്ട്.

@All rights reserved Typical Malayali.