എനിക്കുള്ളത് എനിക്ക് തന്നെ കിട്ടും, അതാണ് എന്റെ വിശ്വാസം എന്ന് കാവ്യ മാധവന്, നല്ലത് മാത്രം വരണേ എന്ന് പ്രാര്‍ത്ഥിക്കാന്‍ പറ്റില്ലല്ലോ
ഇന്ന് കാവ്യ മാധവന് നാല്‍പതാം പിറന്നാളാണ്. പൂക്കാലം വരവായി എന്ന സിനിമയിലെ കൊച്ചു കുട്ടിയായി എത്തിയതു മുതല്‍ മലയാളികള്‍ക്ക് മുന്നിലായിരുന്നു കാവ്യയുടെ വളര്‍ച്ച. പതിനാലാം വയസ്സില്‍ നായികയായി അരങ്ങേറിയ കാവ്യ പിന്നീട് ചെയ്ത ഓരോ കഥാപാത്രങ്ങളും പ്രേക്ഷകര്‍ക്ക് പ്രിയപ്പെട്ടതാണ്. ദിലീപുമായുള്ള വിവാഹത്തിന് ശേഷം ഇപ്പോള്‍ അഭിനയത്തില്‍ നിന്നെല്ലാം പൂര്‍ണമായും അകന്ന് കഴിയുന്ന കാവ്യ മാധവനെ സ്‌നേഹിക്കുന്ന ആരാധകര്‍ ഇപ്പോഴുമുണ്ട്.
അഭിനയത്തിലേക്ക് ഇല്ല എങ്കിലും, കാവ്യ ഇപ്പോഴും തിരക്കിലാണ്. ബിസിനസ്സും വീട്ടുകാര്യങ്ങളുമൊക്കെയായി ജീവിതം ആസ്വദിയ്ക്കുന്നു. വിവാഹത്തിന് ശേഷം കുറേക്കാലം ക്യാമറ കണ്ണില്‍ നിന്നെല്ലാം അകന്നു നിന്ന കാവ്യ ഇപ്പോള്‍, ലക്ഷ്യയ്ക്ക് വേണ്ടി മോഡലിങ് ചെയ്ത് സജീവമായി നില്‍ക്കുകയാണ്. ശരീര ഭാരം എല്ലാം കുറച്ച്, പഴയതുപോലെ സുന്ദരിയായി കാവ്യ വരുമ്പോള്‍ അതിനെക്കാള്‍ സ്‌നേഹത്തോടെ ആരാധകര്‍ സ്വീകരിക്കുന്നു.
കാവ്യ മാധവന് പിറന്നാള്‍ ആശംസകള്‍ അറിയിച്ച് ഇന്റസ്ട്രിയില്‍ നിന്നുള്ള സുഹൃത്തുക്കളും ആരാധകരും എല്ലാം സോഷ്യല്‍ മീഡിയയില്‍ എത്തി. ആശംസ അറിയിച്ചവര്‍ക്ക് കാവ്യ നന്ദിയും അറിയിച്ചു. അക്കൂട്ടത്തിലാണ് എട്ടൊന്‍പത് വര്‍ഷങ്ങള്‍ക്ക് മുന്‍പൊരു ഓണക്കാലത്ത് കാവ്യ നല്‍കിയ അഭിമുഖവും വൈറലാവുന്നത്. ജീവിതത്തില്‍ നല്ലതായാലും ചീത്തയായാലും എന്തും സ്വീകരിക്കാന്‍ ഞാന്‍ തയ്യാറാണ് എന്ന് അന്ന് ആ അഭിമുഖത്തില്‍ കാവ്യ പറഞ്ഞിരുന്നു.
കലോത്സവ വേദികളിലൂടെയാണ് കാവ്യ അഭിനയ ലോകത്തേക്ക് വരുന്നത്. ചെറുപ്പം മുതലേ മത്സരങ്ങള്‍ കണ്ടു വളര്‍ന്നതാണ്. സിനിമയിലേക്ക് എത്തിയപ്പോഴും അത് അങ്ങനെ തന്നെ. എന്നാല്‍ പുതിയതായി ഒരാള്‍ വരുമ്പോള്‍ എനിക്ക് ഒട്ടും പേടിയില്ല. എനിക്കുള്ളതാണെങ്കില്‍, അത് എനിക്ക് തന്നെ കിട്ടും എന്നതാണ് എന്റെ വിശ്വാസം എന്ന് കാവ്യ പറഞ്ഞിരുന്നു.
എല്ലാ കാലത്തും എനിക്ക് നല്ലത് മാത്രം സംഭവിക്കണേ എന്ന് പ്രാര്‍ത്ഥിക്കാന്‍ കഴിയില്ലല്ലോ. നല്ലതായാലും ചീത്തയായാലും അതില്‍ നിന്ന് എന്തെങ്കിലുമൊക്കെ പഠിക്കാനുണ്ടാവും. അത് അംഗീകരിക്കാന്‍ കഴിയണം. അത്രയേയുള്ളൂ എന്നും കാവ്യ പറഞ്ഞു.
@All rights reserved Typical Malayali.
Leave a Comment