ചിത്ര ചേച്ചിയില്‍ നിന്നും കണ്ട് പഠിക്കേണ്ട കാര്യമാണ്! പിറന്നാളാശംസയുമായി മഞ്ജു വാര്യര്‍

പാട്ടിനെക്കുറിച്ച് പറയുമ്പോള്‍ മലയാളി മനസിലേക്ക് ആദ്യം വരുന്ന പേരുകളിലൊന്നാണ് കെഎസ് ചിത്ര.എംജി രാധാകൃഷ്ണനായിരുന്നു ചിത്രയെ പിന്നണി ഗാനരംഗത്തേക്ക് കൈപിടിച്ച് കയറ്റിയത്. ആല്‍ബങ്ങളിലൂടെ തുടങ്ങി പിന്നീട് സിനിമയിലും സജീവമാവുകയായിരുന്നു ചിത്ര. അട്ടഹാസം. സ്‌നേഹപൂര്‍വ്വം മീര, ഞാന്‍ ഏകനാണ് തുടങ്ങിയ ചിത്രങ്ങള്‍ക്ക് വേണ്ടിയായിരുന്നു ആദ്യം പാടിയത്. യേശുദാസിനൊപ്പം കച്ചേരികളിലും ഗാനമേളകളിലുമെല്ലാം ചിത്ര പാടാറുണ്ടായിരുന്നു അന്ന്. മലയാള സിനിമയില്‍ നിന്നും നിരവധി അവസരങ്ങള്‍ ലഭിച്ചതോടെ മികച്ച ഗായികയ്ക്കുള്ള ദേശീയ പുരസ്‌കാരവും ചിത്രയെ തേടിയെത്തുകയായിരുന്നു.

ചിത്ര ചേച്ചിയുടെ പാട്ടിനൊപ്പം ചുണ്ടനക്കാനാവുന്നത് വലിയൊരു ഭാഗ്യമാണെന്നാണ് മഞ്ജു വാര്യര്‍ പറഞ്ഞത്. പിറന്നാള്‍ ദിനത്തില്‍ ചിത്രയ്ക്ക് ആശംസ നേര്‍ന്ന് മഞ്ജു എത്തിയിരുന്നു. ഏറെ പ്രിയപ്പെട്ട ചിത്ര ചേച്ചിക്ക് പിറന്നാളാശംസ നേരുന്നുവെന്നായിരുന്നു മഞ്ജു കുറിച്ചത്. ചിത്രയോട് ചേര്‍ന്ന് നിന്നുള്ള ഫോട്ടോയും മഞ്ജു പോസ്റ്റ് ചെയ്തിരുന്നു. ഏറെയിഷ്ടമുള്ള രണ്ടുപേരെയും ഒന്നിച്ച് കാണാനായതിന്റെ സന്തോഷമായിരുന്നു ആരാധകര്‍ പങ്കുവെച്ചത്.

അഭിനയിച്ച ആളും പാടിയ ആളും ഇടയ്ക്ക് വേദികളില്‍ ഒന്നിക്കാറുണ്ട്. മഞ്ജു പാടിക്കേട്ടതില്‍ ഇഷ്ടമുള്ള പാട്ട് ഏതാണെന്ന് ചോദിച്ചപ്പോള്‍ പാമരം പളുങ്ക് കൊണ്ട് എന്നായിരുന്നു ചിത്ര പറഞ്ഞത്. മഞ്ജു ചുണ്ടനക്കുമ്പോള്‍ അത് ചിത്ര പാടിയതാണെന്ന് പലപ്പോഴും തോന്നാറില്ല, അത്രയധികം സിങ്കാണ് ഇവരുടെ ശബ്ദം തമ്മില്‍ എന്നും ആരാധകര്‍ മുന്‍പ് പറഞ്ഞിരുന്നു.

ചിത്ര ചേച്ചിയുടെ അടുത്ത് നില്‍ക്കാന്‍ അവസരം കിട്ടുമ്പോഴെല്ലാം മനസ് സന്തോഷം കൊണ്ട് തുള്ളിച്ചാടും. പറഞ്ഞറിയിക്കാനാവില്ല അ വികാരം. സംഗീതം ഇഷ്ടമുള്ള എല്ലാവരുടെയും വികാരമാണ് ചിത്ര. ചേച്ചിയെക്കുറിച്ച് ആലോചിക്കുമ്പോള്‍ മനസിന് സന്തോഷം തോന്നുന്ന, തണുപ്പ് കിട്ടുന്ന ഗാനങ്ങളാണ് മനസിലേക്ക് വരുന്നത്. നമ്മുടെ കഴിവ് എത്രത്തോളം വലുതാണോ, അത്രത്തോളം നമ്മള്‍ ഡൗണ്‍ റ്റു എര്‍ത്തായിരിക്കുക എന്ന് പറയുന്നത് ചിത്ര ചേച്ചിയില്‍ നിന്നും കണ്ടുപഠിക്കേണ്ട കാര്യമാണെന്നും മഞ്ജു പറഞ്ഞിരുന്നു.
മലയാളികളുടെ, സംഗീതം ഇഷ്ടപ്പെടുന്നവരുടെ വികാരമാണ് ചിത്ര ചേച്ചി. ചിത്ര ചേച്ചിയുടെ പാട്ടുകളില്‍ എല്ലാം എനിക്കിഷ്ടപ്പെട്ടതാണെന്നും മഞ്ജു പറഞ്ഞിരുന്നു. ചേച്ചിയുടെ പാട്ടിനൊപ്പമായി അഭിനയിക്കാന്‍ കഴിഞ്ഞത് വലിയ ഭാഗ്യമായാണ് കാണുന്നതെന്നും മുന്‍പൊരു ഷോയില്‍ മഞ്ജു പറഞ്ഞിരുന്നു. ചിത്രയും മഞ്ജുവും ഒന്നിച്ചുള്ള നിമിഷങ്ങളെല്ലാം ആരാധകരും ആസ്വദിക്കാറുണ്ട്. വീഡിയോകളെല്ലാം വൈറലായി മാറാറുണ്ട്.

@All rights reserved Typical Malayali.