‘സെലിൻ ആണെന്റെ ലോകം’: പ്രണയ അഭ്യൂഹങ്ങൾക്കു പിന്നാലെ ആശംസകളുമായി മാധവ് സുരേഷ്
കഴിഞ്ഞ ദിവസം വൈകുന്നേരത്തോടെയാണ് നടി സെലിനൊപ്പമുള്ള ഏതാനും ഫോട്ടോകളും, മനോഹരമായ, നീണ്ട ഒരു അടിക്കുറിപ്പുമായി സുരേഷ് ഗോപിയുടെ മകന്‍ മാധവ് സുരേഷ് ഇന്‍സ്റ്റഗ്രാമില്‍ എത്തിയത്. സെലിന്‍ ജോസഫിന് പിറന്നാള്‍ ആശംസകള്‍ അറിയിച്ചുകൊണ്ടുള്ളതായിരുന്നു പോസ്റ്റ്. എന്നാല്‍ ഒരു പ്രണയിനിയെ കുറിച്ച് പോലും ഇത്രമനോഹരമായി വര്‍ണിക്കാന്‍ കഴിയാത്ത വിധം, സെലിന്‍ തന്റെ ജീവിതത്തില്‍ എത്രത്തോളം പ്രധാനപ്പെട്ട ആളാണെന്ന് പോസ്റ്റില്‍ താരപുത്രന്‍ വ്യക്തമാക്കുന്നുണ്ട്.
‘എന്റെ ജീവിതത്തില്‍ ഏറ്റവും പ്രധാനപ്പെട്ട ആളെ ആഘോഷിക്കാന്‍ ഇന്ന് ഞാന്‍ ആഗ്രഹിക്കുന്നു. ഇവളാണ് എന്റെ ലോകം. പ്രതിസന്ധികളിലൂടെ പോകുകയായിരുന്ന എന്റെ ജീവിതത്തിലേക്ക് കടന്നുവന്ന, ഒരു പാറപോലെ ശക്തമായി എനിക്കൊപ്പം നിന്നവള്‍. ഒരു മനുഷ്യനെന്ന നിലയിലെ എന്റെ എല്ലാ കുറവുകളും മനസ്സിലാക്കി, അത് പരിഹരിച്ച് ഞാന്‍ മുന്നോട്ട് പോകുന്നുണ്ട് എന്ന് അവള്‍ ഉറപ്പു വരുത്തും. അവളുടെ ചിരി എന്റെ ദിവസങ്ങളെ വെളിച്ചമുള്ളതാക്കുന്നു, അവളുടെ ശബ്ദം എന്റെ കാതുകള്‍ക്ക് ഇമ്പമുള്ളതാണ്. അവളുടെ സാന്നിധ്യം എനിക്ക് ഏറ്റവും വലിയ ഊര്‍ജം നല്‍കുന്നു’ എന്നൊക്കെ പറഞ്ഞുകൊണ്ടാണ് സെലിനൊപ്പമുള്ള മനോഹരമായ ചിത്രങ്ങള്‍ മാധവ് പങ്കുവച്ചത്.
നിമിഷങ്ങള്‍ക്കകം സുരേഷ് ഗോപിയുടെ ഇളയമകന്‍ മാധവ് സുരേഷ്, നടി സെലിനുമായി പ്രണയത്തിലാണ് എന്ന തരത്തില്‍ വാര്‍ത്തകള്‍ പുറത്തുവരികയും ചെയ്തു. കേട്ടവരെല്ലാം അതേറ്റു പിടിക്കുകയും ചെയ്തു. എന്നാല്‍ അത്രയ്ക്ക് അങ്ങോട്ട് പോകേണ്ടതില്ല, സെലിന്‍ എന്റെ ജീവിതത്തില്‍ വളരെ പ്രധാനപ്പെട്ട ഒരാള്‍ തന്നെയാണ്. പക്ഷെ ഞങ്ങള്‍ റിലേഷന്‍ഷിപ്പില്‍ അല്ല എന്ന് പിന്നാലെ മാധവ് വ്യക്തമാക്കുകയും ചെയ്തു.
ഇന്‍സ്റ്റഗ്രാം സ്റ്റോറിയിലൂടെയാണ് തന്റെ പോസ്റ്റിന് കൂടുതല്‍ വ്യക്തത വരുത്തിക്കൊണ്ടുള്ള മാധവ് സുരേഷിന്റെ കുറിപ്പ്. ‘എനിക്കറിയാമായിരുന്നു എന്റെ ക്യാപ്ഷന്‍ അല്പം കടന്ന് പോയി എന്നെനിക്കറിയാം. എന്നാല്‍ നിലവില്‍ ഇപ്പോള്‍ ഞങ്ങള്‍ റിലേഷന്‍ഷിപ്പില്‍ അല്ല. എന്റെ ജീവിതത്തില്‍ വളരെ പ്രധാനപ്പെട്ട ഒരു സ്ഥാനം സെലിനുണ്ട്. അതിനപ്പുറത്തേക്ക് ഒന്നും തന്നെയില്ല. എന്റെ വ്യക്തി ജീവിതത്തില്‍ എന്തെങ്കിലും മാറ്റം സംഭവിക്കുകയാണെങ്കില്‍ നേരിട്ട് തന്നെ അക്കാര്യം ഞാന്‍ നിങ്ങളെ അറിയിക്കുന്നതായിരിക്കും. അതുവരെ എന്റെ വ്യക്തി ജീവിതത്തിലേക്ക് കടന്നുകൊണ്ടുള്ള കിംവദന്തികള്‍ അവസാനിപ്പിക്കുക’ എന്നാണ് സ്റ്റോറിയില്‍ മാധവ് പറഞ്ഞിരിക്കുന്നത്. നേരത്തെ മീനാക്ഷി ദിലീപിനൊപ്പം ചേര്‍ത്ത് മാധവിന്റെ വിവാഹ ഗോസിപ്പുകള്‍ ശക്തമായി പ്രചരിച്ചിരുന്നു.
@All rights reserved Typical Malayali.
Leave a Comment