ആര് എന്തു പറഞ്ഞാലും അത് മാത്രം ഞാന്‍ ചെയ്യില്ല; 4 വയസ്സില്‍ തുടങ്ങി 40 വര്‍ഷത്തെ അഭിനയ ജീവിതം, തന്റെ വിജയത്തിന്റെ രഹസ്യം വെളിപ്പെടുത്തി മീന!
നാലാം വയസ്സില്‍ തുടങ്ങിയതാണ് മീനയുടെ അഭിനയ ജീവിതം. നാല്‍പത് വര്‍ഷങ്ങളായി, അഞ്ച് ഭാഷകളിലായി എണ്ണിയാല്‍ തീരാത്ത അത്രയും സിനിമകള്‍. അതില്‍ ഭൂരിഭാഗവും സൂപ്പര്‍ സ്റ്റാര്‍സിനൊപ്പം, കൂടുതലും ഹിറ്റുകള്‍. ഇപ്പോള്‍ ഏറ്റവും പുതിയ ചിത്രമായ അനന്തപുരം ഡയറീസിന്റെ പ്രമോഷന്‍ തിരക്കിലാണ് ഇപ്പോള്‍ നടി. അതിനിടയില്‍ അത്രയും വര്‍ഷത്തെ തന്റെ വിജയ രഹസ്യം എന്താണ് എന്ന് മീന വെളിപ്പെടുത്തി.
നാല്‍പത് വര്‍ഷം, ബാലതാരമായി തുടങ്ങി, ഇന്നും നായിക റോളില്‍ തന്നെ നിറഞ്ഞു നില്‍ക്കുന്നു. എന്താണ് അതിന്റെ വിജയ രഹസ്യം എന്ന് ചോദിച്ചപ്പോള്‍ മീന തന്റെ സ്വതസിദ്ധമായ ശൈലിയില്‍ ചിരിച്ചു, എന്നിട്ട് പറഞ്ഞു എന്റെ ഹാര്‍ഡ് വര്‍ക്ക് തന്നെയാണ്. അത്രയധികം കഷ്ടപ്പെട്ടിട്ടുണ്ട്. ആത്മാര്‍ത്ഥതയും കഷ്ടപ്പെടാനുള്ള മനസ്സുമാണ് തന്നെ ഇവിടെ വരെ എത്തിച്ചത് എന്ന് മീന വിശ്വസിക്കുന്നു.
ഒരു സിനിമ കമ്മിറ്റ് ചെയ്യാന്‍ എനിക്ക് കുറച്ച് സമയം എടുക്കും. പക്ഷേ, അത് കമ്മിറ്റ് ചെയ്ത് കഴിഞ്ഞാല്‍ പിന്നെ ആത്മാര്‍ത്ഥമായി അതിനൊപ്പം നില്‍ക്കും. ആ സമയത്ത് മറ്റൊരു സൂപ്പര്‍ സ്റ്റാറിന്റെ ബിഗ്ഗ് ബജറ്റ് ചിത്രം വന്നാല്‍, എങ്കില്‍ പിന്നെ ഇവിടെ നോ പറഞ്ഞ്, അവിടെ ഡേറ്റ് കൊടുക്കുന്ന ശീലം എനിക്കില്ല. ആര് എന്തു പറഞ്ഞാലും അത് ഞാന്‍ ചെയ്യില്ല. ഏറ്റെടുത്തു കഴിഞ്ഞാല്‍ അത് എന്റെ സിനിമയാണ്. അതിനോട് നൂറ് ശതമാനം ആത്മാര്‍ത്ഥത കാണിക്കും.
പിന്നെ ഒരുപാട് കഷ്ടപ്പെട്ടിട്ടുണ്ട്. ഇപ്പോള്‍ അതിനെ കുറിച്ച് പറഞ്ഞ്, ആ വില നഷ്ടപ്പെടുത്തുന്നില്ല. നാല്‍പത്തിയെട്ട് മണിക്കൂര്‍ നേരം ഉറങ്ങാതെയൊക്കെ ഷൂട്ട് ചെയ്യുമായിരുന്നു. പ്ലെയിന്‍ യാത്രയില്‍ കിട്ടുന്ന ഒരു മണിക്കൂറൊക്കെയാണ് ഉറങ്ങിയത്. കഥ കേള്‍ക്കുന്നതും, ഭക്ഷണം കഴിക്കുന്നതും എല്ലാം യാത്രയിലാണ്. ഉറങ്ങിപ്പോയാല്‍, കൂടെ ഉള്ള സഹായികള്‍ വന്ന് വിളിക്കും. അത്രയധികം കഷ്ടപ്പെട്ടിട്ടാണ് ഓരോ സിനിമകളും പൂര്‍ത്തിയാക്കിയത്.
കൂടെ ജോലി ചെയ്ത ഒരു ആക്ടര്‍ക്കും ഒരു പ്രൊഡ്യൂസര്‍ക്കും ഒരു സംവിധായകനും ഞാന്‍ കാരണം പ്രശ്‌നമുണ്ടായിട്ടില്ല. അത് ഞാന്‍ പ്രത്യേകം ശ്രദ്ധിച്ചിരുന്നു- മീന പറഞ്ഞു. പക്ഷേ ഇന്ന് അത്ര തിരക്കുകളില്ല. കുടുംബത്തിനാണ് കൂടുതല്‍ പ്രാധാന്യം. കുടുംബത്തെ വിട്ട് ഷൂട്ടിങിന് വേണ്ടി വരുമ്പോള്‍ അത്രയും എന്നെ ആകര്‍ഷിക്കുന്ന സിനിമയായിരിക്കണം. വീട്ടിലായിരിക്കുമ്പോള്‍ ഞാന്‍ എന്റെ മകളുടെ അമ്മയാണ്. അവളുടെ കാര്യങ്ങളൊക്കെ നോക്കി കൂടെ ഇരിക്കാനാണ് എനിക്കിഷ്ടം.
ഗോസിപ്പുകളും വിവാദങ്ങളും അന്നും ഇന്നും എന്നെ ബാധിച്ചിട്ടില്ല എന്നും മീന പറഞ്ഞു. അന്ന് മാഗസിനുകളില്‍ എഴുതുകയാണ് എങ്കില്‍, ഇന്ന് അത് സോഷ്യല്‍ മീഡിയയില്‍ എഴുതുന്നു. അന്ന് അതൊന്നും വായിക്കാനുള്ള സമയം ഉണ്ടായിരുന്നില്ല. ഇന്ന് വായിക്കാന്‍ നേരമുണ്ട്, വായിക്കാറുണ്ട്. പക്ഷെ അതിന് എന്റെ ഇമോഷന്‍സിനെ തൊട്ട് കഴിക്കാന്‍ കഴിയില്ല. അതൊന്നും എന്നെ ബാധിക്കുന്നതല്ല. അര്‍ഹിക്കുന്ന അവഗണനയോടെ ഒഴിവാക്കും- മീന പറഞ്ഞു.
@All rights reserved Typical Malayali.
Leave a Comment