കാത്തിരിപ്പിന് ഫലം കണ്ടു, ചിരിപ്പിച്ച് കൊന്ന് പേളിയും ജിപിയും; ഗോപിക ഒന്ന് നോക്കിയാല്‍ മതി, ജിപി പതറും എന്ന്!

ഡി ഫോര്‍ ഡാന്‍സ് എന്ന റിയാലിറ്റി ഷോയിലൂടെ പ്രേക്ഷക പ്രിയം നേടിയ കോമ്പോ ആണ് പേളി മാണിയും ഗോവിന്ദ് പദ്മസൂര്യയും. ഇരുവരും ഒന്നിച്ചപ്പോഴൊക്കെ ആരാധകര്‍ക്ക് ചിരിക്കാനുള്ള വകയും ഉണ്ടായിരുന്നു. ഷോ പത്ത് വര്‍ഷം മുന്‍പ് അവസാനിച്ചുവെങ്കിലും പേളിയും ജിപിയും തമ്മിലുള്ള സൗഹൃദം ഇന്നും തുടരുന്നു. ജിപിയുടെ പുതിയ ചിത്രമായ മനോരാജ്യത്തിന്റെ പ്രമോഷനുമായി ബന്ധപ്പെട്ട് ഇരുവരും വീണ്ടും ഒന്നിക്കുകയാണ്.

പേളി മാണി ഷോയില്‍ ജിപി അതിഥിയായി എത്തുകയായിരുന്നു. നീണ്ട പത്ത് വര്‍ഷത്തിന് ശേഷമാണ് പേളിയും ജിപിയും ഒരുമിച്ചൊരു ഷോയില്‍ എത്തുന്നത് എന്ന പ്രത്യേകതയുണ്ട്. പേളിയുടെ ഫോളോവേഴ്‌സ് ഒരുപാട് ആവശ്യപ്പെട്ട ഒരു കോമ്പോ കൂടെയായിരുന്നു ഇത്. ആ കാത്തിരിപ്പിന് വിലകല്‍പ്പിക്കുന്നതാണ് നാല്‍പ്പത്തിനാല് മിനിട്ട് ദൈര്‍ഘ്യമുള്ള പേളി മാണി ഷോയിലെ ആദ്യ പാര്‍ട്ട്. ഫുള്‍ വീഡിയോ കണ്ട് ചിരി കണ്‍ട്രോള്‍ ചെയ്യാന്‍ ഇത്തിരി പാടുപെടും എന്ന് പ്രത്യേകം പറയേണ്ടതില്ല.

ഡി ഫോര്‍ ഡാന്‍സിന്റെ കാലത്തുള്ള ഇരുവരുടെയും ഒന്നാം രാഗം പാടി എന്ന പാട്ടും തേങ്ങാക്കൊല മാങ്ങാത്തൊലി വിശേഷങ്ങളും എല്ലാം വീണ്ടും അനുസ്മരിക്കുന്നത് പ്രേക്ഷകര്‍ക്ക് നൊസ്റ്റാള്‍ജിയ നല്‍കുന്നതാണ്. മനോരാജ്യം എന്ന ചിത്രത്തിന്റെ വിശേഷത്തെക്കാള്‍ പ്രേക്ഷകര്‍ അറിയാന്‍ ആഗ്രഹിക്കുന്നതും ആസ്വദിയ്ക്കുന്നതും ഇവര്‍ രണ്ട് പേരും ഒരുമിക്കുമ്പോഴുള്ള തല്ലു കൂടലും ചളിയും വര്‍ത്തമാനവും തന്നെയാണ്.

ഷോയില്‍ വിവാഹ ശേഷമുള്ള ജീവിതത്തെ കുറിച്ച് പേളി മാണി ചോദിയ്ക്കുന്നുണ്ട്. ഗോപിക ഡി ഫോര്‍ ഡാന്‍സ് മുതലെ ജിപി – പേളി ഫാന്‍ ആയിരുന്നുവത്രെ. വിവാഹത്തിന് ശേഷം എന്റെ കാര്യത്തില്‍ തീരുമാനമായി. പക്ഷേ അവള്‍ക്കിപ്പോഴും പേളിയോട് ഭയങ്കര ഇഷ്ടമാണ്. ഗോപികയെയും കൂട്ടി പേളിയുടെ വീട്ടില്‍ വന്നപ്പോഴും പെരുമാറ്റത്തില്‍ പേളി അത് നിലനിര്‍ത്തി എന്നാണ് ജിപി പറയുന്നത്. ഗോപിക വളരെ സ്വീറ്റ് ായിട്ടുള്ള വ്യക്തിയാണ് എന്ന് പേളിയും പറയുന്നു.

വിവാഹത്തിന് ശേഷം താന്‍ പഠിച്ച കാര്യങ്ങളെ കുറിച്ച് തമാശയോടെ ജിപി പറയുന്നുണ്ട്. ഗോപികയുടെ ഓരോ നോട്ടത്തിലൂടെയാണത്രെ ജിപി ഇപ്പോള്‍ അച്ചടക്കം പഠിക്കുന്നത്. പക്ഷേ എന്തൊക്കെയാമെങ്കിലും വിവാഹ ശേഷമുള്ള ജീവിതം സൂപ്പറാണ്. വളരെ ആസ്വദിയ്ക്കുന്നു. ഇപ്പോള്‍ ഞങ്ങള്‍ക്ക് കൂടുതലും യാത്രകള്‍ തന്നെയാണ്. ഒരുമിച്ചുള്ള യാത്ര വളരെ രസകരമാണ്. പെട്ടി പാക്ക് ചെയ്യുന്ന കാര്യം പറഞ്ഞാലേ റെഡി- ഗോവിന്ദ് പദ്മസൂര്യ പറഞ്ഞു.

@All rights reserved Typical Malayali.