ചിങ്ങപ്പുലരിയില്‍ ഞാന്‍ വീണ്ടും തുടങ്ങുന്നുവെന്ന് പേളി മാണി! ഞാനും വരുന്നുണ്ടെന്ന് പറഞ്ഞ് അമല പോളും

ടെലിവിഷന്‍ പ്രേക്ഷകര്‍ക്ക് ഏറെയിഷ്ടമുള്ള താരമാണ് പേളി മാണി. അഭിനയവും പാട്ടും അവതരണവുമെല്ലാം പരിചിതമാണെന്ന് പേളി ഇതിനകം തെളിയിച്ചതാണ്. സോഷ്യല്‍മീഡിയയിലും സജീവമായ പേളി പങ്കിടുന്ന വിശേഷങ്ങള്‍ പെട്ടെന്ന് തന്നെ വൈറലായി മാറാറുണ്ട്. ബിഗ് ബോസില്‍ മത്സരിച്ചതോടെയായിരുന്നു പ്രേക്ഷകര്‍ പേളിയെ അടുത്തറിഞ്ഞത്. നടനായ ശ്രിനിഷ് അരവിന്ദുമായുള്ള പ്രണയം മത്സരത്തിലെ നിലനില്‍പ്പിന് വേണ്ടിയാണെന്നായിരുന്നു വിമര്‍ശനങ്ങള്‍. എന്നാല്‍ ജീവിതകാലം മുഴുവനും ശ്രീനി കൂടെയുണ്ടാവണമെന്നാണ് ആഗ്രഹം എന്നായിരുന്നു പേളി പറഞ്ഞത്. ഷോ കഴിഞ്ഞ് വൈകാതെ തന്നെ ഇരുവരും ഒന്നിക്കുകയായിരുന്നു. കുടുംബാംഗങ്ങളും സുഹൃത്തുക്കളുമെല്ലാം ഇവരുടെ തീരുമാനത്തെ പിന്തുണച്ചിരുന്നു.

വിവാഹ ശേഷമുള്ള വിശേഷങ്ങളും പേളി യൂട്യൂബ് ചാനലിലൂടെ പങ്കിടാറുണ്ട്. പുതിയ ഫ്‌ളാറ്റ് വാങ്ങിയപ്പോഴും സ്റ്റുഡിയോ തുടങ്ങിയപ്പോഴുമെല്ലാം രക്ഷിതാക്കളെയും കൂടെക്കൂട്ടിയിരുന്നു പേളി. ഹിന്ദു-ക്രിസ്ത്യന്‍ മതാചാരപ്രകാരമായാണ് ചടങ്ങുകളെല്ലാം ചെയ്തത്. ഇവിടെ എല്ലാവരുമുണ്ടെന്നായിരുന്നു ചോദിച്ചവരോട് പേളി പറഞ്ഞത്. രണ്ട് കുടുംബത്തെയും ചേര്‍ത്ത് നിര്‍ത്തുന്ന പേളിയുടെ മനസ് അംഗീകരിക്കപ്പെടേണ്ടതാണെന്നായിരുന്നു ആരാധകരെല്ലാം പറഞ്ഞത്.

ഇപ്പോഴിതാ ചിങ്ങപ്പുലരിയില്‍ ഭരതനാട്യം ക്ലാസിന് ചേര്‍ന്നതിന്റെ സന്തോഷം പങ്കുവെച്ചിരിക്കുകയാണ് പേളി. നിലയും നിതാരയും ശ്രീനിയും എല്ലാം പേളിക്കൊപ്പമുണ്ട്. അബാദ് റാം മോഹന്റെ കീഴിലാണ് പേളിയുടെ നൃത്തപഠനം. പുതുവര്‍ഷം, പുതുനൂറ്റാണ്ട്, പുതിയ ശിഷ്യര്‍ എന്ന ക്യാപ്ഷനോടെയാണ് പേളിക്കൊപ്പമുള്ള ഫോട്ടോ അബാദ് പങ്കുവെച്ചത്.

ഇന്ന് ചിങ്ങം ഒന്ന്, മലയാളം കലണ്ടറിലെ പുതുവര്‍ഷം. വര്‍ഷങ്ങളായി ചെയ്യാനിരുന്നൊരു കാര്യം ഞാന്‍ ഇന്ന് ചെയ്യുകയാണ്. ഭരതനാട്യത്തിലേക്ക് തിരിച്ച് വരികയാണ്. എന്റെ ഗുരു അബാദ് വന്നു, ഞാന്‍ അദ്ദേഹത്തിന് ഗുരുദക്ഷിണ നല്‍കി ശിഷ്യത്വം സ്വീകരിച്ചു. ആദ്യത്തെ ചുവട് വെച്ചപ്പോള്‍ എന്റെ ഹൃദയം ഒരിക്കലും മറന്ന് പോവാത്തൊരു കാര്യം ചെയ്തത് പോലെയാണ് എനിക്ക് തോന്നിയത്.

കുട്ടിക്കാലത്തെ ഞാന്‍ ഭരതനാട്യം പഠിച്ചിരുന്നു. താര കല്യാണ്‍ ആയിരുന്നു എന്റെ ആദ്യത്തെ ഗുരു. ഞാനൊരു നര്‍ത്തകി കൂടിയാണെന്ന കാര്യം എനിക്ക് എന്റെ മക്കള്‍ക്ക് മുന്നില്‍ കാണിക്കണമായിരുന്നു. ശരീരം കൊണ്ട് ആദ്യമായി തോന്നുമെങ്കിലും ഞാനുമൊരു നര്‍ത്തകിയാണെന്നുമായിരുന്നു പേളി കുറിച്ചത്.

വേഗം പോയ്‌ക്കോ, ഞാനും വൈകാതെ നിങ്ങളുടെ കൂടെ വരുമെന്നായിരുന്നു അമല പോള്‍ പറഞ്ഞത്. അമ്മായിക്കൊപ്പം ഞങ്ങളും കൂടാമെന്നായിരുന്നു റിതികയും ശ്രുതികയും പറഞ്ഞത്. ആര്യ, ദീപ്തി വിധുപ്രതാപ്, ശ്രുതി രജനികാന്ത് തുടങ്ങി നിരവധി പേരായിരുന്നു പേളിക്ക് ആശംസ അറിയിച്ച് എത്തിയിട്ടുള്ളത്.

@All rights reserved Typical Malayali.