എടാ അഞ്ച് വര്‍ഷമായിട്ടും ഇതൊന്നും നിനക്കറിയില്ലേ! ശ്രീനിയുടെ ഇഷ്ടം ചോദിച്ചപ്പോള്‍ പേളി നല്‍കിയ മറുപടി

ബിഗ് ബോസില്‍ മത്സരിച്ചപ്പോഴായിരുന്നു പേളി മാണിയും ശ്രിനിഷ് അരവിന്ദും പ്രണയത്തിലായത്. ഇനി ഇവിടെ തുടരാന്‍ പറ്റില്ല, എങ്ങനെയെങ്കിലും പുറത്തേക്ക് പോയാല്‍ മതിയെന്ന് പറഞ്ഞ് ഷോയില്‍ നിന്നും പിന്‍വാങ്ങാനുള്ള തീരുമാനത്തിലായിരുന്നു പേളി. അതിനിടയിലാണ് ശ്രീനി സപ്പോര്‍ട്ടുമായെത്തിയത്. ആ ബന്ധം പിന്നീട് പ്രണയമായി മാറുകയായിരുന്നു. ഇനിയുള്ള ജീവിതം ഒന്നിച്ചാവാമെന്ന് ഇരുവരും തീരുമാനിക്കുകയായിരുന്നു. ഈ ബന്ധത്തിന് അധികം ആയുസില്ലെന്ന് പറഞ്ഞവരെക്കൊണ്ട് തിരുത്തിപ്പറയിപ്പിക്കുകയായിരുന്നു ഇരുവരും. നിലയ്ക്കും നിതാരമൊപ്പമായി സന്തോഷകരമായ കുടുംബജീവിതം നയിക്കുകയാണ് ഇവര്‍.

കരിയറിലെയും ജീവിതത്തിലെയും കാര്യങ്ങളെല്ലാം പേളി ആരാധകരോട് പറയാറുണ്ട്. യൂട്യൂബ് ചാനലിലൂടെ പങ്കിടുന്ന വിശേഷങ്ങള്‍ ക്ഷണനേരം കൊണ്ട് തന്നെ ശ്രദ്ധിക്കപ്പെടാറുണ്ട്. പേളിയും ശ്രീനിയും ഒന്നിച്ചുള്ള പുതിയ വീഡിയോ ഇതിനകം തന്നെ ശ്രദ്ധേയമായിക്കഴിഞ്ഞിട്ടുണ്ട്. മൂന്ന് ലക്ഷത്തിലധികം പേരാണ് വീഡിയോയുടെ കാഴ്ചക്കാര്‍. നമ്മള്‍ പെര്‍ഫെക്ട് മാച്ചാണോയെന്നായിരുന്നു പേളിയുടെ ചോദ്യം. ശ്രീനിയുടെ ഇഷ്ടങ്ങളും താല്‍പര്യങ്ങളെക്കുറിച്ചുമൊക്കെയുള്ള ചോദ്യങ്ങളായിരുന്നു മിക്കതും. ചില ഉത്തരങ്ങള്‍ പേളി ശരിയാക്കി. മറ്റ് ചിലതാവട്ടെ മാറിപ്പോവുകയും ചെയ്തു.

അഞ്ച് വര്‍ഷമായിട്ടും നിനക്ക് ഇതൊന്നും മനസിലായില്ലേ എന്ന് പേളി ശ്രീനിയോട് ചോദിക്കുന്നുണ്ടായിരുന്നു. തന്റെ ഇഷ്ടങ്ങളില്‍ പലതും പേളിക്ക് വേണ്ടി മാറ്റിവെച്ചതിനെക്കുറിച്ചായിരുന്നു ശ്രീനി പറഞ്ഞത്. പൊതുവെ ചക്ക ഇഷ്ടമുള്ള ആളാണ് ശ്രീനി. എന്നാല്‍ പേളി ചക്ക കഴിക്കാത്തത് കൊണ്ട് ആ ഇഷ്ടം മാറ്റിയെന്നായിരുന്നു ശ്രീനി പറഞ്ഞത്. വീട്ടില്‍ പോവുമ്പോള്‍ ചക്ക കഴിക്കാറുണ്ടെന്നും പറയാറുണ്ടായിരുന്നു. എന്റെ കൂടെയുള്ളപ്പോള്‍ തണ്ണിമത്തനല്ലേ കഴിക്കുന്നത്, പിന്നെ ഈ ഇഷ്ടം ഞാനെങ്ങനെ അറിയാനാണെന്നായിരുന്നു പേളിയുടെ ചോദ്യം.

നിങ്ങള്‍ പെര്‍ഫെക്ട് മാച്ചാണെന്ന് പറയാന്‍ ഈ ഉത്തരങ്ങളൊന്നും വേണ്ട, അത് ഞങ്ങള്‍ പണ്ടേ പറഞ്ഞതല്ലേയെന്നായിരുന്നു ആരാധകരുടെ ചോദ്യം. മുഖത്ത് ചിരിയോടെയല്ലാതെ ഈ വീഡിയോ കാണാനാവില്ല. മടുപ്പില്ലാതെ കാണാനാവുന്ന വീഡിയോ, ശ്രീനി പേളിയെ നന്നായി മനസിലാക്കിയിട്ടുണ്ട് അങ്ങനെ പോവുന്നു ആരാധകരുടെ കമന്റുകള്‍. നേരത്തെ പേളിയെക്കുറിച്ചുള്ള ചോദ്യങ്ങള്‍ക്ക് കൃത്യമായ ഉത്തരം പറഞ്ഞ് ഗെയിമില്‍ വിജയിച്ചത് ശ്രീനിയായിരുന്നു. ഡാഡിയേയും ശ്രീനിയേയും ഇരുത്തി തന്നെക്കുറിച്ചുള്ള ചോദ്യങ്ങള്‍ ചോദിക്കുകയായിരുന്നു പേളി. ശ്രീനി തന്നെയാണ് പേളിയെ കൂടുതലായി മനസിലാക്കേണ്ടത്, നിങ്ങള്‍ രണ്ടുപേരും സന്തോഷത്തോടെ കഴിയുന്നത് കാണുമ്പോളാണ് എനിക്ക് സന്തോഷമെന്നായിരുന്നു ഡാഡി പറഞ്ഞത്.

@All rights reserved Typical Malayali.