സൊനാക്ഷിയ്ക്ക് വിവാഹം ശേഷം സഹീര്‍ നല്‍കിയത് രണ്ട് കോടി വിലമതിയ്ക്കുന്ന വിവാഹ സമ്മാനം!
കഴിഞ്ഞ രണ്ട് മൂന്ന് ദിവസമായി സൊനാക്ഷി സിന്‍ഹയുടെയും സഹീര്‍ ഇഖ്ബാലിന്റെയും വിവാഹ വിശേഷങ്ങള്‍ തന്നെയാണ് ബോളിവുഡ് സിനിമാ ലോകം മുഴുവന്‍. സോഷ്യല്‍ മീഡിയയിലും വിവാഹ ചിത്രങ്ങളും, വിവാഹത്തിന് ശേഷം നടന്ന റിസപ്ഷന്റെ ചിത്രങ്ങളും നിറഞ്ഞു നില്‍ക്കുന്നു. ഇപ്പോഴിതാ വിവാഹത്തിന് ശേഷം തന്റെ പ്രിയതമയ്ക്ക് സഹീര്‍ നല്‍കിയ സമ്മാനത്തെ കുറിച്ചുള്ള വാര്‍ത്തകളാണ് പുറത്തുവരുന്നത്.
താലികെട്ടി, സൊനാക്ഷിയെ സ്വന്തമാക്കിയതിന് ശേഷം സഹീര്‍ ഇഖ്ബാല്‍ ഭാര്യയ്ക്ക് ഏറ്റവും ആദ്യം വാങ്ങി കൊടുത്തത് രണ്ട് കോടിയോളം വുലമതിക്കുന്ന സമ്മാനമാണ്. മറ്റൊന്നുമല്ല, ബിഎംഡബ്ല്യു ഐ7 ഇലട്രിക് സെഡന്‍ ആണെന്നാണ് ഐഎഎന്‍എസ് റിപ്പോര്‍ട്ട്.
ബോളിവുഡിലെ പതിവ് വിവാഹ സങ്കല്‍പങ്ങളെ തിരുത്തിയെഴുതിയ വിവാഹമായിരുന്നു സൊനാക്ഷിയുടെയും സഹീര്‍ ഇഖ്ബാലിന്റെയും. മുംബൈയിലെ, ബാന്ദ്രയില്‍ ഉള്ള സൊനാക്ഷിയുടെ അപാര്‍ട്‌മെന്റില്‍ വച്ച് വിവാഹം രജിസ്റ്റര്‍ ചെയ്തു. വിവാഹത്തിന്, അമ്മയുടെ വിവാഹ സാരിയുടുത്ത് എത്തിയ സൊനാക്ഷി, വലിയ മേക്കപ്പുകളൊന്നും ഇല്ലാതെ, സിംപ്ലിസിറ്റികൊണ്ട് ശ്രദ്ധ നേടി.
അതിന് ശേഷം സിനിമാ സുഹൃത്തുക്കള്‍ക്ക് വേണ്ടി ഒരു സത്കാരപ്പാര്‍ട്ടി ഒരുക്കിയിരുന്നു. സല്‍മാന്‍ ഖാനും, കാജോളും, രേഖയും, അനില്‍ കപൂറും അചക്കം നിരവധി ബോളിവുഡ് താരങ്ങള്‍ വിവാഹ സല്‍ക്കാരത്തില്‍ പങ്കെടുക്കാനെത്തി. ആ ചിത്രങ്ങളും സോഷ്യല്‍ മീഡിയ ഏറ്റെടുത്തു. വിവാഹ റിസപ്ഷനും സൊനാക്ഷി സിംപിള്‍ ലുക്കും, സ്റ്റൈലും മെയിന്റൈന്‍ ചെയ്തു. ചുവന്ന ബനാറസ് സാരിയായിരുന്നു വധുവിന്റെ വേഷം.
ഏഴ് വര്‍ഷത്തെ പ്രണയത്തിന് ശേഷം, പല എതിര്‍പ്പുകളും അവഗണിച്ചാണ് സൊനാക്ഷിയും സഹീറും ഒന്നിച്ചത്. അതും, ആദ്യമായി കണ്ട അതേ ദിവസം. മറ്റൊരു മതത്തില്‍ പെട്ട ആളെ മകള്‍ വിവാഹം ചെയ്യുന്നതില്‍ ആദ്യം സൊനാക്ഷിയുടെ കുടുംബത്തിന് യോജിപ്പ് ഉണ്ടായിരുന്നില്ല, പിന്നീട് എല്ലാം എല്ലാവരും അംഗീകരിച്ചു. രണ്ട് കുടുംബത്തിന്റെയും, മതത്തിന്റെയും സാന്നിധ്യത്തില്‍ ഞങ്ങള്‍ വിവാഹിതരായി എന്നാണ് സൊനാക്ഷി പറഞ്ഞത്.
ദബാംഗ് എന്ന സല്‍മാന്‍ ഖാന്‍ ചിത്രത്തിലൂടെയായിരുന്നു സൊനാക്ഷി സിന്‍ഹയുടെ സിനിമാ അരങ്ങേറ്റം. ആദ്യ ചിത്രം തന്നെ വന്‍ ഹിറ്റായിരുന്നു. തുടര്‍ന്ന് വളരെ പെട്ടന്ന് ബോളിവുഡിലെ മുന്‍നിര നായികാ നിരയിലേക്ക് എത്താന്‍ സൊനാക്ഷിയ്ക്ക് സാധിച്ചു. ലിങ്ക എന്ന ചിത്രത്തില്‍ രജിനികാന്തിന്റെ നായികയായി എത്തിയ നടി സൗത്ത് ഇന്ത്യന്‍ സിനിമകളിലും സാന്നിധ്യം അറിയിച്ചിട്ടുണ്ട്.
നോട്ട് ബുക്ക്, ഡബിള്‍ എക്‌സ് എല്‍, റുസ്ലാന്‍ എന്നീ സിനിമകളില്‍ അഭിനയിച്ചിട്ടുള്ള നടനാണ് സഹീര്‍ ഇഖ്ബാല്‍. 2022 ല്‍ പുറത്തിറങ്ങിയ ഡബിള്‍ എക്‌സ് എല്‍ എന്ന ചിത്രത്തിലൂടെയാണ് സൊനാക്ഷിയുമായി അടുത്തതും പ്രണയത്തിലായതും.
@All rights reserved Typical Malayali.
Leave a Comment