അമൃതയല്ല, വര്‍ഷയായിരുന്നു ശരി! എട്ട് വര്‍ഷത്തിന് ശേഷം ചന്ദനമഴ വീണ്ടും വൈറലാവുമ്പോള്‍ വില്ലത്തി വര്‍ഷ ഹാപ്പിയാണ്? വിശേഷങ്ങള്‍ പങ്കുവച്ച് ശാലുകുര്യന്‍

മലയാള ടെലിവിഷന്‍ ലോകത്ത് വൈറലായ സീരിയലുകളിലൊന്നാണ് ചന്ദനമഴ. 2014 മുതല്‍ 2018 വരെ ടെലിക്കാസ്റ്റ് ചെയ്തിരുന്ന സീരിയല്‍ ഇന്ന് 2024 ല്‍ വീണ്ടും സോഷ്യല്‍ മീഡിയയില്‍ വൈറലാവുന്നു. സീരിയലിലെ പല ഷോട്ടുകളും ട്രോളന്മാര്‍ വൈറലാക്കുമ്പോള്‍, ഇത്രവര്‍ഷം കഴിഞ്ഞും ആ കഥാപാത്രങ്ങള്‍ ജനങ്ങള്‍ ഓര്‍ത്തിരിക്കുന്നല്ലോ എന്ന സന്തോഷത്തിലാണ് സീരിലില്‍ വര്‍ഷ എന്ന കഥാപാത്രമായി എത്തിയ ശാലു കുര്യന്‍.

ഉത്തമ പത്‌നി, മരുമകള്‍ എന്ന നിലയില്‍ എത്തിയ നായിക അമൃതയെക്കാള്‍ മിക്ക പ്രേക്ഷകര്‍ക്കും ഇഷ്ടം അല്പം വില്ലത്തരം ഉണ്ടെങ്കിലും വര്‍ഷയോട് തന്നെയായിരുന്നു. അടുക്കളയില്‍ ഒതുങ്ങിക്കൂടി, ഭര്‍ത്താവിന്റെയും അമ്മായിയമ്മയുടെയും ഇഷ്ടങ്ങള്‍ക്കനുസരിച്ച് ജീവിക്കുന്ന അമൃതയല്ല, തന്റെ ഇഷ്ടങ്ങളും താത്പര്യങ്ങളും മറ്റാര്‍ക്ക് വേണ്ടിയും മാറ്റാത്ത പറയാനുള്ളത് വെട്ടിത്തുറന്ന് പറയുന്ന വര്‍ഷ തന്നെയായിരുന്നു ശരി എന്ന് ഇന്നത്തെ പ്രേക്ഷകര്‍ പറയുന്നു. വീണ്ടും സീരിയല്‍ സോഷ്യല്‍ മീഡിയയില്‍ വൈറലാവുന്ന പശ്ചാത്തലത്തില്‍ ശാലു കുര്യന്‍ സമയം മലയാളത്തോട് സംസാരിക്കുന്നു.

മറ്റൊരു സീരിയലിനും കിട്ടാത്ത സ്വീകരണമാണ് ഏഴെട്ട് കൊല്ലം മുന്‍പ് അവസാനിച്ച ഒരു സീരിയലിന് ഇപ്പോള്‍ കിട്ടുന്നത്. അന്ന് കിട്ടിയ അതേ സ്വീകരണ ഇന്നും കിട്ടുന്നു. സോഷ്യല്‍ മീഡിയയില്‍ സീരിയലിലെ ക്ലിപ്‌സുകള്‍ വൈറലാവുമ്പോള്‍ ആദ്യ എപ്പിസോഡ് മുതല്‍ ആളുകള്‍ കാണുന്നു എന്നൊക്കെ കേള്‍ക്കുമ്പോള്‍ സന്തോഷമുണ്ട്. വീണ്ടും നമ്മളെ ലൈം ലൈറ്റില്‍ നിര്‍ത്തിക്കൊണ്ട്, ആ കഥാപാത്രത്തെ വീണ്ടും ചെയ്യുന്നതരം ഫീല്‍ കൊണ്ടു തന്നത് ട്രോളന്മാരാണ്.

ട്രോളന്മാര്‍ ഏറ്റെടുക്കുന്ന സീരിയലിലെ പല രംഗങ്ങളും അന്ന് ചെയ്യുമ്പോള്‍ എന്തായിരുന്നു ഫീല്‍. മോര് കാച്ചാന്‍ അറിയില്ലാത്ത മലയാളിയോ?

നോര്‍ത്ത് ഇന്ത്യന്‍ സീരിയലിന്റെ റീമേക് ആയതുകൊണ്ടു തന്നെ ആ സീരിയലില്‍ വരുന്ന ഭൂരിഭാഗം സീനുകളും നോര്‍ത്ത് ഇന്ത്യന്‍ കള്‍ച്ചര്‍ അനുസരിച്ചുള്ളതാണ്. കൂറേ എപ്പിസോഡുകള്‍ കഴിഞ്ഞതിന് ശേഷമാണ് മലയാളം കള്‍ച്ചറിലേക്ക് എത്തിയത്. ലാപ്‌ടോപ് കഴുകുന്ന സീനൊക്കെ അവിടത്തെ സീരിയലില്‍ ഉണ്ടായിരുന്നതാണ്. അക്കൂട്ടത്തിലുള്ളതാണ് താളിച്ച മോരും.

അങ്ങനെ ഒരു അന്യഭാഷാ സീരിയല്‍ കേരളത്തിലേക്ക് എത്തുമ്പോള്‍ മലയാളികള്‍ സ്വീകരിക്കുമോ എന്ന ഭയം ഉണ്ടായിരുന്നോ?

ചന്ദനമഴയുടെ പ്രൊഡ്യൂസര്‍ ജയകുമാര്‍ സാറിന്റെ അടുത്ത് ഞാന്‍ ഈ സംശയം ചോദിച്ചപ്പോള്‍ അദ്ദേഹം പറഞ്ഞിരുന്നത് ‘അതുകൊണ്ടാണ് നോര്‍ത്ത് ഇന്ത്യയില്‍ നിന്ന് ഇവിടെ വന്ന് താമസിക്കുന്നവരാക്കി കഥാപാത്രങ്ങളെ മാറ്റിയത്. മലയാളം സംസാരിക്കുന്ന, കേരളത്തില്‍ താമസിക്കുന്ന നോര്‍ത്ത് ഇ്ന്ത്യക്കാര്‍’ എന്നാണ്. അങ്ങനെയാവുമ്പോള്‍ അതില്‍ വരുന്ന പൂജകളും ഡ്രസ്സിങും എല്ലാം അങ്ങനെയാവും. അപ്പോള്‍ ചോദ്യം ചെയ്യാന്‍ പറ്റില്ലല്ലോ. ഇപ്പോള്‍ ദേശായി കുടുംബത്തെ ഏറ്റെടുത്തിരിക്കുകയാണ് പ്രേക്ഷകര്‍.

അന്ന് വില്ലത്തിയായ വര്‍ഷയാണ് ഇന്ന് നായിക. റിയല്‍ ലൈഫില്‍ വര്‍ഷയെ പോലെയാണ്?

അതെ, പ്രതികരിക്കുന്ന സ്ത്രീകള്‍ വേണം എന്നാണ് ഇപ്പോള്‍ കമന്റുകള്‍ വരുന്നത്. ഇന്ന് സമൂഹത്തിന് ആവശ്യം അമൃതയെ പോലെയുള്ള മരുമകളെ അല്ല, പ്രതികരിക്കുന്ന വര്‍ഷയെ പോലുള്ളവരാണ് എന്ന പറയുന്നുണ്ട്. ഇപ്പോഴത്തെ ഭൂരിഭാകം പെണ്‍കുട്ടികളും അങ്ങനെയാണ്. വിദ്യാഭ്യാസമുള്ള, സ്വന്തം കാലില്‍ നില്‍ക്കാന്‍ പ്രാപ്തിയുള്ള പെണ്‍കുട്ടികളാണ് ഇപ്പോഴുള്ളത്. തന്റെ ഇഷ്ടങ്ങളും താത്പര്യങ്ങളും ഒന്നും മറ്റുള്ളവര്‍ക്ക് വേണ്ടി മാറ്റി വയ്ക്കാറില്ല. സ്വന്തം വ്യക്തിത്വത്തെ അടിച്ചു താഴ്ത്തി ആര് പെരുമാറിയാലും അവര്‍ നോക്കി നില്‍ക്കില്ല. അങ്ങനെ ഒരാള്‍ തന്നെയാണ് ഞാനും. എനിക്ക് എന്റേതായ അഭിപ്രായങ്ങളും ശരിയും തെറ്റും ഉണ്ടാവും. തെറ്റ് വന്നാല്‍ അത് അങ്ങനെ അല്ല എന്ന് പറഞ്ഞ് മനസ്സിലാക്കി തന്നാല്‍ അതനുസരിച്ച് മുന്നോട്ട് പോകും. പക്ഷേ മറ്റൊരാളുടെ അഭിപ്രായം നമ്മുടെ തലയില്‍ അടിച്ചേല്‍പ്പിക്കാന്‍ എന്റെ ഫാമിലിയില്‍ ആരും ശ്രമിക്കാറില്ല, നമ്മുടെ അഭിപ്രായം കൂടെ കേള്‍ക്കാനുള്ള ക്ഷമ എല്ലാവരും കാണിക്കാറുമുണ്ട്.

Shalu Kurian

ചന്ദനമഴയ്‌ക്കൊപ്പം തന്നെയാണ് തട്ടീം മൂട്ടീം എന്ന ആക്ഷേപഹാസ്യ പരമ്പരയിലും അഭിനയിക്കുന്നത്. അതും കെപിഎസി ലളിത, മഞ്ജു പിള്ള തുടങ്ങിയ വലിയ താരങ്ങള്‍ക്കൊപ്പം?

ഞാന്‍ ആദ്യമായിട്ടാണ് ഒരു സിക് കോം ചെയ്യുന്നത്. അത് തട്ടീം മുട്ടീം ആണ്. സിക് കോം ആണെങ്കിലും സീരിയല്‍ ആണെങ്കിലും ഒരു ഷോയുടെ പകുതിയില്‍ നിന്ന് നമ്മള്‍ കയറുമ്പോള്‍, എപ്പോള്‍ വേണമെങ്കിലും നമ്മളെ എടുത്ത് മാറ്റി എന്ന് വരാം. നമ്മളുടെ റോള്‍ പ്രതീക്ഷിച്ചത് പോലെ ഉയരുന്നില്ല എങ്കില്‍, അത് അനാവശ്യമായി തോന്നിയാല്‍ കഥ ഡൈവേര്‍ട്ട് ചെയ്തു വിടും. തട്ടീം മുട്ടീം എടുക്കുമ്പോള്‍ എനിക്ക് അങ്ങനെ ഒരു ഭയം ഉണ്ടായിരുന്നു. ആ ഷോ തുടങ്ങി പത്ത് വര്‍ഷം കഴിഞ്ഞാണ് ഞാന്‍ അതിന്റെ ഭാഗമാവുന്നത്. കുട്ടിക്കാലം മുതല്‍ ഞാന്‍ കണ്ട ഷോയില്‍ എനിക്കൊരു വേഷം കിട്ടുന്നു എന്ന സന്തോഷം ഉണ്ടെങ്കിലും, ഞാന്‍ കാരണം അതിന്റെ റേറ്റിങില്‍ എന്തെങ്കിലും സംഭവിക്കുമോ എന്ന പേടി വേറെയും. എന്താമെങ്കിലും നമുക്ക് നോക്കാം, നീ വാ എന്ന് പറഞ്ഞത് മഞ്ജു ചേച്ചിയാണ്.

മറ്റ് സീരിയല്‍ ഷൂട്ടിങ് പോലെയല്ല തട്ടീം മൂട്ടീം ഷൂട്ട് ചെയ്യുന്നത്. സിറ്റുവേഷന്‍ പറയും, അപ്പോള്‍ ഉണ്ടാവുന്നതാണ് ഡയലോഗുകള്‍. പ്രോംമ്ട്ടിങ് ഒന്നും ഉണ്ടാവില്ല. മറ്റ് ആര്‍ട്ടിസ്റ്റുകള്‍ പറയുന്ന ഡയലോഗുകള്‍ ഓര്‍ത്ത് വച്ച്, നമ്മളുടെ കൈയ്യില്‍ നിന്നിട്ട് കളിക്കണം. അതിന് അത്യാവശ്യം കോമഡി സെന്‍സും വേണം. ആദ്യത്തെ ഷെഡ്യൂളില്‍ എനിക്കൊട്ടും അതുമായി മാച്ച് ചെയ്യാന്‍ പറ്റുന്നുണ്ടായിരുന്നില്ല. പക്ഷെ ആ ക്രൂ മൊത്തം എന്നെ നന്നായി ഹെല്‍പ് ചെയ്തു. അവരുമായി സൗഹൃദത്തിലായതിന് ശേഷം പിന്നെ അതൊന്നും ഒരു പ്രശ്‌നമേ അല്ലായിരുന്നു. ആക്ഷന്‍ പറഞ്ഞാല്‍ പിന്നെ കഥാപാത്രമായി മാറാന്‍ കൂടുതല്‍ സമയമൊന്നും വേണ്ട.

കെപിഎസി ലളിതയ്‌ക്കൊപ്പമുള്ള അനുഭവം എങ്ങനെയായിരുന്നു, എന്തെങ്കിലും ഉപദേശം തന്നോ?

അഭിനയിക്കരുത് എന്ന് പറഞ്ഞു. അഭിനയിക്കുയല്ല വേണ്ടത്, പെരുമാറിയാല്‍ മാത്രം മതി. നീ എങ്ങനെയാണോ അങ്ങനെ തന്നെ നില്‍ക്കുകയും സംസാരിക്കുകയും ചെയ്യുക. എന്തും പറയാം, പക്ഷെ ആ സിറ്റുവേഷന് അകത്ത് നിന്നുകൊണ്ടായിരിക്കണം. വളരെ കാഷ്വലായി പെരുമാറിയാല്‍ മാത്രം മതി എന്ന് പറഞ്ഞു തന്നത് ലളിതാമ്മയാണ്

സിനിമയിലേക്ക് എത്തുമ്പോള്‍ എന്താണ് അഭിനയത്തിലെ വ്യത്യാസം?

സിനിമകള്‍ ഞാന്‍ ചെയ്തിട്ടുണ്ട്, പക്ഷെ അത്ര സജീവമായിരുന്നില്ല. അങ്ങനെ അറിയപ്പെടുന്ന കഥാപാത്രങ്ങളൊന്നും ചെയ്തിട്ടില്ല, എല്ലാം ചെറിയ ചെറിയ വേഷങ്ങളായിരുന്നു. അന്ന് ഓരോ കഥാപാത്രങ്ങളും നോക്കി നോക്കി എടുക്കാനുള്ള വിവരവും പക്വതയും ഒന്നും ഉണ്ടായിരുന്നില്ല. ഇപ്പോഴാണല്ലോ അഭിനയത്തെ കുറച്ച് കൂടെ സീരിയസായി നോക്കി കാണുന്നത്. അന്നത്തെ അപേക്ഷിച്ച് ഇന്ന് ഷൂട്ടിങില്‍ വലിയ വ്യത്യാസമുണ്ട് എന്ന് പറഞ്ഞു കേട്ടിട്ടുണ്ട്. ടെക്‌നിക്കുകള്‍ മാറിയല്ലോ. എന്റെ അനുഭവത്തില്‍ എല്ലാ അഭിനയവും ഒരുപോലെയായിരുന്നു

ശാലു കുര്യന്റെ വെയിറ്റ് ലോസ് ജേര്‍ണി ഭയങ്കര ഇന്‍സ്‌പെയറിങ് ആയിരുന്നു. പെട്ടന്ന് വണ്ണം കുറയ്ക്കാനുള്ള കാരണം?

ഞാന്‍ ഭയങ്കരമായി ഫുഡ് കഴിക്കുന്ന ആളാണ്. ചന്ദനമഴയുടെ സമയത്തെല്ലാം ഇഷ്ടമുള്ളതൊക്കെ വാങ്ങി കഴിക്കുമായിരുന്നു. അങ്ങനെ അത്യാവശ്യം നന്നായി വണ്ണം വച്ചു. മറ്റുള്ളവര്‍ ‘അയ്യോ നന്നായി തടി വച്ചല്ലോ’ എന്നൊന്നും പറയുന്നത് ഞാന്‍ മൈന്റ് ചെയ്യാറില്ല. ഞാന്‍ തിന്നുണ്ടാക്കിയതാണെന്നങ്ങ് പറയും. പക്ഷെ പ്രസവം കഴിഞ്ഞപ്പോള്‍ അല്പം സീരിയസായി. കൂടാതെ പോസ്റ്റ്പാര്‍ട്ടവും. ഓള്‍റെഡി ഉള്ള വണ്ണവും, പ്രസവ ശേഷമുള്ള വണ്ണവും വന്നതോടെ ആരോഗ്യ പ്രശ്‌നങ്ങളും നേരിട്ടു. കുഞ്ഞിനെ പോലെ എടുക്കാന്‍ പോലും കഴിയാത്ത അവസ്ഥയായി. ആ സമയത്താണ് കൃത്യമായി ഒരു ഡയറ്റീഷന്‍ ലൈഫിലേക്ക് വന്നത്. കൊവിഡ് കാലത്തായിരുന്നു. കൃത്യമായ വ്യായാമവും, ഭക്ഷണവും എല്ലാമായി നമ്മളെ പുഷ് ചെയ്യാന്‍ എപ്പോഴും ഒരാളുണ്ടാവുമ്പോള്‍ ഓട്ടോമാറ്റിക്കലി നമ്മള്‍ ആ ഫ്‌ളഓയിലേക്ക് വരും അങ്ങനെ കുറച്ചതാണ്.

അക്ഷരത്തെറ്റ് എന്ന സീരിയല്‍ ചെയ്യുന്നത് വണ്ണം ഉള്ളപ്പോഴായിരുന്നില്ലേ. അതിനാണ് സ്‌റ്റേറ്റ് അവാര്‍ഡും കിട്ടിയത്. ആ അനുഭവത്തെ കുറിച്ച്?

അതെ അതെ, അക്ഷരത്തെറ്റ് കാണുമ്പോള്‍ ഞാന്‍ തന്നെ കരുതും, ഹൊ എന്തൊരു വണ്ണമായിരുന്നു എന്ന്. ജയകുമാര്‍ സര്‍ തന്നെയായിരുന്നു അക്ഷരത്തെറ്റിന്റെയും പ്രൊഡ്യൂസര്‍. ഷൂട്ട് തുടങ്ങുന്നതിന്റെ ഒരു ദിവസം മുന്‍പാണ് എന്നെ വിളിക്കുന്നത്. മറ്റ് പ്രൊഡ്യൂസേഴ്‌സിനെ പോലെയവ്വ, ജയകുമാര്‍ സര്‍ വിളിച്ചുകഴിഞ്ഞാല്‍ നമുക്ക് എന്തെങ്കിലും ചെയ്യാനുള്ള റോളായിരിക്കും എന്നുറപ്പാണ്. പിന്നെ പേമന്റിന്റെ കാര്യം ഒന്നും പ്രത്യേകിച്ച് ചോദിക്കേണ്ടതില്ല. സര്‍ അറിഞ്ഞു തന്നോളും. റെഡിയാണോ എന്ന് ചോദിച്ചപ്പോള്‍ ഓകെയാണ് എന്ന് പറഞ്ഞു. ഞാന്‍ കരുതിയത് തിരുവനന്തപുരത്താണ് ഷൂട്ട് എന്നാണ്. അല്ല, ചെന്നൈയിലാണ് എന്ന് പറഞ്ഞപ്പോള്‍ ഞെട്ടി. കാരണം മറ്റന്നാള്‍ രാവിലെ അവിടെ എത്തണം എന്ന് പറഞ്ഞാല്‍ പെട്ടന്ന് ഇട്ടെറിഞ്ഞ് പോകാന്‍ പറ്റില്ലല്ലോ. അന്ന് മക്കളൊന്നും ആയിട്ടില്ല. കല്യാണം കഴിഞ്ഞതാണ്. ഭര്‍ത്താവിനോട് ചോദിച്ചപ്പോള്‍ അദ്ദേഹം പൂര്‍ണ സമ്മതും. അങ്ങനെ ഞങ്ങള്‍ രണ്ടു പേരും കൂടെയാണ് പോയത്. നല്ല അനുഭവം ആയിരുന്നു. രണ്ട് സീരിയലുകള്‍ കൊളാബ് ചെയ്ത് പോകുന്ന തരം ആയിരുന്നു അത് പോയിരുന്നത്. പക്ഷേ അപ്പോഴേക്കും ഞാന്‍ കണ്‍സീവ് ആയി, കൊവിഡ് കാലവും വന്നു, സീരിയല്‍ അവസാനിപ്പിക്കേണ്ടി വന്നു. പിന്നീട് എന്റെ മാതാവ് എന്ന സീരിയലില്‍ ജോയിന്‍ ചെയ്ത്, ഷൂട്ട് തുടങ്ങിയ ആദ്യത്തെ ദിവസമാണ് സ്‌റ്റേറ്റ് അവാര്‍ഡ് പ്രഖ്യാപിച്ചത്. അത് വലിയ സന്തോഷം നല്‍കിയ കാര്യമായിരുന്നു. മാതാവിന്റെ പേരില്‍ തുടങ്ങുന്ന സീരിയലിന് ഇത് നല്ല നിമിത്തമാണെന്ന് എല്ലാവരും പറഞ്ഞു.

Shalu Kurian
പുരസ്‌കാരങ്ങള്‍ നല്‍കാന്‍മാത്രം മൂല്യമുള്ള സീരിയലുകള്‍ സംഭവിയ്ക്കുന്നില്ല എന്ന പ്രസ്താവന ചര്‍ച്ചയായിരുന്നല്ലോ. അതിനോട് എങ്ങനെ പ്രതികരിക്കുന്നു?

അത് ഞാന്‍ എന്റെ പ്രൊഫഷനെ തന്നെ കുറ്റം പറയുന്നത് പോലെയാവില്ലേ. ഒരു പ്രേക്ഷക എന്ന നിലയില്‍ എനിക്ക് തോന്നിയിട്ടുള്ളത് കുറച്ച് കൂടെ റിയലിസ്റ്റിക്കാവാം എന്നാണ്. തട്ടീം മുട്ടീം പോലുള്ള ഷോകള്‍ വിജയ്ക്കാന്‍ കാരണം ഒന്ന് മെയിനായിട്ടും കോമഡി. രണ്ട് നമ്മള്‍ വീട്ടിലൊക്കെ സംസാരിക്കുന്നത് പോലെ റിയലായിട്ട് സംസാരിച്ചുകൊണ്ടിരിക്കുകയാണ്. അതിന്റെ ആ മേക്കിങ് ആണ് അതിന്റെ ഭംഗി. പക്ഷെ അത് പോലെ സീരിയല്‍ അതുപോലെ കൊണ്ടു പോകാന്‍ ശ്രമിച്ചാല്‍ നടക്കില്ല. ഞങ്ങളുടെ ഇടയിലെ ഒരു ആര്‍ട്ടിസ്റ്റ് പറഞ്ഞത്, അവര്‍ വളരെ റിയലിസ്റ്റിക്കായി ഒരു സീരിയല്‍ കൊണ്ടു പോകാന്‍ ശ്രമിച്ചപ്പോള്‍ ആ സീരിയല്‍ റേറ്റിങില്‍ ഒന്നുമല്ലാതെയായി. അവസാനിപ്പിക്കേണ്ടി വരും എന്ന ഘട്ടത്തില്‍ എത്തിയപ്പോഴാണ് പതിവ് സീരിയല്‍ ചേരുവകളും മസാലകളും ചേര്‍ത്തത്. സത്യത്തില്‍ നിലനില്‍പാണ് പ്രശ്‌നം. ഓഡിയന്‍സ് കാണുന്നത്, താത്പര്യപ്പെടുന്നത് കൊടുത്താലേ നിലനില്‍പുള്ളൂ എന്ന അവസ്ഥയാണ്. റിയലിസ്റ്റിക്കായി സീരിയല്‍ വരണം എന്നത് എന്റെ അഭിപ്രായമാണ്.

സോഷ്യല്‍ മീഡിയയുടെ കടന്നു കയറ്റത്തെ എങ്ങനെ കാണുന്നു. അടുത്തിടെ ശാലു കുര്യന്‍ മരിച്ചു എന്ന തരത്തില്‍ വാര്‍ത്ത കണ്ടിരുന്നു?

ഇങ്ങനെ വാര്‍ത്ത കൊടുക്കുന്നതില്‍ അവര്‍ക്കൊരു ആത്മസംതൃപ്തി കിട്ടുന്നുണ്ടെങ്കില്‍ ആയിക്കോട്ടെ. ഞാനും ആ വാര്‍ത്ത കണ്ടിരുന്നു. അവര്‍ കൊടുത്ത ഫോട്ടോകളില്‍ ശരത്ത് അല്ലാതെ മറ്റെല്ലാവരും ഇന്ന് ജീവിച്ചിരിക്കുന്നവരാണ്. യൂട്യൂബ് എന്ന് പറഞ്ഞാല്‍ എന്തായാലും മോണിട്ടേഷന്‍ ആണല്ലോ. എന്തായാലും അവര്‍ക്കതില്‍ നിന്ന് വരുമാനം കിട്ടുന്നുണ്ട്. നമ്മുടെയൊക്കെ ഫോട്ടോ വച്ചാലേ അവര്‍ക്ക് വ്യൂസ് കിട്ടു, പണം കിട്ടൂ. അങ്ങനെ പണം കിട്ടി അവര്‍ വീട്ടിലേക്ക് മരുന്നോ മറ്റോ വാങ്ങുന്നെങ്കില്‍ ആയിക്കോട്ടെ എന്നേ ഞാന്‍ കരുതുന്നുള്ളൂ. ഞാന്‍ ജീവിച്ചിരിപ്പുണ്ട്

ഇത്രയും വര്‍ഷത്തെ അഭിനയ ജീവിതത്തില്‍, ആരാധകരുടെ സ്‌നേഹം എങ്ങനെയാണ് അനുഭവിയ്ക്കുന്നത്?

അന്ധമായി ഇഷ്ടപ്പെടുന്ന ഒരുപാട് പേരുണ്ട്. അവരോടൊക്കെ നന്ദി മാത്രം. എന്നെ എന്ന് മാത്രമല്ല, ചന്ദനമഴ സീരിയലിലെ ഇഷ്ടപ്പെടുന്നവരും ഒരുപാടുണ്ട്. അന്ന് വെറുത്തതിന് ക്ഷമ ചോദിച്ച്, ഇന്ന് സീരിയല്‍ ആദ്യത്തെ എപ്പിസോഡ് മുതല്‍ കാണുന്നവര്‍. അടുത്തിടെ ഒരു കുട്ടി, വിഷ്ണു എന്നാണ് അവന്റെ പേര്, കണ്ണ് കാണില്ല അവന്‍ സീരിയലുകളുടെ അഡിക്ട് ആണ്. അവന്റെ എന്റര്‍ടൈന്‍മെന്റ് ആയിരിക്കും. ചന്ദനമഴയുടെ സീന്‍ നമ്പറും എപ്പിസോഡും വരെ അവനറിയാം. അതെനിക്ക് ഭയങ്കര സന്തോഷം നല്‍കിയ അനുഭവമായിരുന്നു. ഒരു നടി എന്ന നിലയില്‍ ഒരുപാട് അഭിമാനം തോന്നി.

Chandanamazha Varsha: വർഷ എന്ന ഷാലുവിന്റെ വിശേഷങ്ങൾ

പുതിയ പ്രൊജക്ടുകള്‍?

പുതിയ സീരിയല്‍ ഇപ്പോള്‍ മഴവില്‍ മനോരമയില്‍ പുതുതായി ജോയിന്‍ ചെയ്തു. അത് പതിവ് പോലെ വില്ലത്തി വേഷമാണ്. പണ്ടത്തെ പോലെ ഇപ്പോള്‍ വാരിവലിച്ച് സീരിയലുകള്‍ ചെയ്യുന്നില്ല. കുട്ടികള്‍ കൂടെ ഉള്ളത് കൊണ്ട് ഇപ്പോള്‍ അവരുടെ കാര്യങ്ങളും നോക്കണം, എന്നാല്‍ നമ്മുടെ കരിയറും വിടാന്‍ പറ്റില്ല എന്ന രീതിയിലാണ് ഇപ്പോള്‍ മുന്നോട്ട് പോകുന്നത്.

@All rights reserved Typical Malayali.