ഏറ്റവും പ്രിയപ്പെട്ടത് ഞങ്ങളുടെ പ്രണയകഥ! 29ാം വിവാഹ വാര്‍ഷിക ദിനത്തില്‍ സോന നായര്‍ പങ്കിട്ട പോസ്റ്റ് വൈറലാവുന്നു

സിനിമയിലും സീരിയലുകളിലുമൊക്കെയായി പ്രേക്ഷകര്‍ക്ക് പരിചിതയായി മാറിയ താരമാണ് സോന നായര്‍. കരിയറിലെ മാത്രമല്ല ജീവിത വിശേഷങ്ങളും അവര്‍ സോഷ്യല്‍മീഡിയയിലൂടെ പങ്കിടാറുണ്ട്. ചാനല്‍ പരിപാടികളിലും സജീവമായി പങ്കെടുക്കാറുണ്ട് സോന. ഒരുകുടയും കുഞ്ഞുപെങ്ങളും എന്ന ടെലി സീരിയലിലൂടെയായിരുന്നു സോനയുടെ കരിയര്‍ തുടങ്ങിയത്. വിമന്‍സ് കോളേജില്‍ പഠിച്ചുകൊണ്ടിരുന്ന സമയത്തായിരുന്നു ടെലി സീരിയലിലേക്ക് അവസരം ലഭിച്ചത്. പാട്ടും ഡാന്‍സുമൊക്കെയായി അന്നേ കലാരംഗത്ത് സജീവമായിരുന്നു സോന. സിനിമകളൊക്കെ കാണാറുണ്ടെങ്കിലും അഭിനേത്രിയായി മാറുന്നതിനെക്കുറിച്ചൊന്നും അന്ന് ചിന്തിച്ചിട്ടേയില്ലായിരുന്നുവെന്ന് സോന പറഞ്ഞിരുന്നു.

പ്രണയവിവാഹമായിരുന്നു സോനയുടേത്. ഇന്‍ഡസ്ട്രിയില്‍ തന്നെയുള്ളൊരാള്‍ ജീവിതപങ്കാളിയായി വന്നതിനാലാണ് താന്‍ ഇന്നും ഈ മേഖലയില്‍ തുടരുന്നതെന്നും സോന പറഞ്ഞിരുന്നു. വീട്ടുകാരായിട്ട് തിരഞ്ഞെടുത്തതല്ല, ഇന്‍ഡസ്ട്രിയിലുള്ള ആള്‍ ജീവിതപങ്കാളിയായി വരണമെന്നുള്ളത് ദൈവനിശ്ചയമായിരിക്കും എന്നായിരുന്നു പ്രണയവിവാഹത്തെക്കുറിച്ച് ചോദിച്ചപ്പോള്‍ സോന പറഞ്ഞത്. ഇടയ്ക്ക് ഉദയനൊപ്പമായി ആനീസ് കിച്ചണിലേക്ക് സോന അതിഥിയായി എത്തിയിരുന്നു. പ്രണയത്തെക്കുറിച്ചും, വിവാഹ ജീവിതത്തെക്കുറിച്ചുമെല്ലാം ആനി ഇവരോട് ചോദിച്ചിരുന്നു.

ഷൂട്ടിംഗിനായി പോയപ്പോഴായിരുന്നു ഉദയനും സോനയും പരിചയപ്പെടുന്നത്. സാമ്പത്തിക പ്രശ്‌നം കാരണം അന്ന് ഷൂട്ട് മുടങ്ങിയിരുന്നു. അവിടെ നിന്ന് തിരിച്ച് പോവാമെന്ന് തീരുമാനിച്ചപ്പോഴായിരുന്നു കാശ് കിട്ടിയെന്നും ഷൂട്ട് മുടങ്ങില്ലെന്നുള്ള വിവരവും ലഭിച്ചത്. അന്നേരമാണ് സോനയുടെ അച്ഛനുമായി പരിചയത്തിലായത്. സംസാരത്തിനിടയില്‍ അദ്ദേഹം കുടുംബകാര്യങ്ങളെക്കുറിച്ചൊക്കെ ചോദിച്ചിരുന്നു. സോനയെ വിവാഹം ചെയ്യുന്നതിനെക്കുറിച്ചൊന്നും ആ സമയത്ത് ചിന്തിച്ചിരുന്നില്ലെന്നും ഉദയന്‍ പറഞ്ഞിരുന്നു.

പിറ്റേ ദിവസം സോന അമ്പലത്തില്‍ പോവാനിറങ്ങിയപ്പോള്‍ ഉദയന്‍ നേര്‍ച്ചയായി ഇടാന്‍ അഞ്ച് രൂപ നല്‍കിയിരുന്നു. അമ്പലത്തിനകത്ത് കയറിയപ്പോള്‍ ആ അഞ്ച് രൂപ വെച്ച് എന്നെ ഉഴിഞ്ഞാണ് കാണിക്കയില്‍ ഇട്ടതെന്ന് സോന പറഞ്ഞത്. എന്തോ ദൈവം തോന്നിപ്പിച്ചതായിരിക്കും അങ്ങനെ ചെയ്യാന്‍. അതിന് മുന്‍പൊരാളോട് ഇഷ്ടമോ പ്രണയമോ ഒന്നും തോന്നിയിരുന്നില്ല. അന്നത്തെ ആ പരിചയമാണ് പിന്നീട് പ്രണയത്തിലേക്ക് വഴിമാറിയത്. വൈകാതെ അത് വിവാഹത്തിലെത്തുകയും ചെയ്തു.

ദാമ്പത്യ ജീവിതം 29ാം വര്‍ഷത്തിലേക്ക് എത്തിയതിന്റെ സന്തോഷം പങ്കുവെച്ചെത്തിയിരിക്കുകയാണ് സോന. ഉദയനൊപ്പമുള്ള ചിത്രങ്ങള്‍ക്കൊപ്പമായാണ് കുറിപ്പ് പങ്കുവെച്ചത്. ഞങ്ങളുടെ പ്രണയകഥ എനിക്കേറെ പ്രിയപ്പെട്ടതാണ്. ഞങ്ങളുടെ വെഡ്ഡിംഗ് ആനിവേഴ്‌സറിയാണ് സെപ്റ്റംബര്‍ 22ന്. ഇങ്ങനെയൊരു പങ്കാളിയെ കിട്ടിയതില്‍ നമ്മള്‍ രണ്ടുപേരും അന്യോന്യം അനുഗ്രഹിക്കപ്പെട്ടവരാണ്. 29 വര്‍ഷത്തെ ഒന്നിച്ചുള്ള ജീവിതം. ദൈവത്തിന് നന്ദിയെന്നുമായിരുന്നു സോന കുറിച്ചത്.

@All rights reserved Typical Malayali.