ഒരു ചലനവുമില്ലാതെ ഇരുന്ന് പോയി! ഭര്‍ത്താവിനെ നഷ്ടമായ ആ ദിവസം ഓര്‍ത്തെടുത്ത് താര കല്യാണ്‍
അഭിനേത്രിയും നര്‍ത്തകിയുമായ താര കല്യാണ്‍ യൂട്യൂബ് ചാനലുമായി സജീവമാണ്. അഭിനയ ലോകത്തെയും വ്യക്തി ജീവിതത്തിലെ കാര്യങ്ങളെക്കുറിച്ചുള്ള വിശേഷങ്ങളുമെല്ലാം പങ്കിടാറുണ്ട്. ഭര്‍ത്താവിനെക്കുറിച്ചുള്ള ഓര്‍മ്മകളായിരുന്നു പുതിയ വീഡിയോയില്‍. 7 വര്‍ഷം മുന്‍പായിരുന്നു രാജേട്ടന്റെ വിയോഗം. അദ്ദേഹത്തിന്റെ വിയോഗവുമായി ബന്ധപ്പെട്ട് പല തരത്തിലുള്ള വാര്‍ത്തകളായിരുന്നു പ്രചരിച്ചത്. അവരവരുടെ മനോധര്‍മ്മത്തിന് അനുസരിച്ച് വാര്‍ത്തകള്‍ മെനയുകയായിരുന്നു പലരും. ഇങ്ങനെയൊക്കെയാണ് ആളുകള്‍ സംസാരിക്കുന്നതെന്ന് എന്നോട് ചിലര്‍ പറഞ്ഞിരുന്നു. അന്ന് ഞാന്‍ അതേക്കുറിച്ചൊന്നും ബോതേര്‍ഡായിരുന്നില്ല.
അദ്ദേഹം പോയതിന് ശേഷം ഞാന്‍ ആരോടും സംസാരിക്കാറില്ലായിരുന്നു. കൊച്ചിയില്‍ വെച്ചായിരുന്നു അദ്ദേഹം മരിച്ചത്. അത് കഴിഞ്ഞ് തിരികെ തിരുവനന്തപുരത്തേക്ക് വന്നു. താമസിക്കാന്‍ സ്ഥലമില്ലായിരുന്നു, അങ്ങനെ അതിന് പിറകെയായി. അതുകഴിഞ്ഞ് സൗഭാഗ്യയുടെ വിവാഹം, കൊവിഡ്, സുധാപ്പൂവിന്റെ ജനനം. പിന്നെ എനിക്ക് അസുഖമായി. ശബ്ദം വരുന്നു, പോവുന്നു, ഓപ്പറേഷന്‍ ചെയ്യുന്നു, പിന്നെയും ശബ്ദം വരുന്നു. അതിനിടയില്‍ അമ്മയേയും നഷ്ടമായി. ഇതൊക്കെ കൊണ്ടാണ് ഇത്രയും കാലത്തിനിടയില്‍ രാജേട്ടന്റെ വിയോഗ സമയത്ത് സംഭവിച്ച കാര്യങ്ങളെക്കുറിച്ച് പറയാന്‍ പറ്റാതെയിരുന്നത്.
മറക്കാന്‍ പറ്റുന്ന കാര്യമേയല്ലല്ലോ അത്. 30 വയസുള്ള സമയത്താണ് രാജേട്ടന്‍ ഡയബറ്റിക്കാണെന്ന് മനസിലാക്കിയത്. പാരമ്പര്യമായി കിട്ടിയതായിരുന്നു അത്. പെട്ടെന്ന് അസുഖം വരുന്ന പ്രകൃതമായിരുന്നു. പനിയായിരുന്നു ആദ്യം വന്നത്. അന്ന് ഞാന്‍ ഒരു ലൊക്കേഷനിലായിരുന്നു. അച്ഛന് അസുഖം കൂടുതലാണ്, ആശുപത്രിയിലേക്ക് മാറ്റുകയാണെന്ന് സൗഭാഗ്യ പറഞ്ഞിരുന്നു. എങ്ങനെയൊക്കെയോ ഷൂട്ട് അവസാനിപ്പിച്ച് ഞാനും എത്തുകയായിരുന്നു. പനി മാറിക്കഴിഞ്ഞപ്പോള്‍ അദ്ദേഹം ഭക്ഷണം കഴിക്കുന്നില്ലായിരുന്നു. വെറുതെയൊരു സന്ദര്‍ശനത്തിന് എന്ന പോലെയായി ഡോക്ടര്‍ വീട്ടില്‍ വന്നിരുന്നു. ഞാന്‍ കൊണ്ടുപോവുകയാണെന്ന് പറഞ്ഞ് അദ്ദേഹം രാജേട്ടനെ കൂടെക്കൂട്ടുകയായിരുന്നു. അസുഖം കുറച്ച് കൂടുതലാണെന്നറിഞ്ഞതോടെ അമൃതയിലേക്ക് മാറ്റുകയായിരുന്നു. ഒന്‍പത് ദിവസം ഐസിയുവിലായിരുന്നു അദ്ദേഹം.
നിങ്ങള്‍ ഭയങ്കര ലേറ്റായാണ് കൊണ്ടുവന്നത് ഞങ്ങള്‍ക്കൊന്നും ചെയ്യാന്‍ പറ്റില്ലെന്ന് കുറച്ച് ഡോക്ടേഴസ് പറയും. ആകെ തളര്‍ന്നിരിക്കുമ്പോള്‍ പേടിക്കാനൊന്നുമില്ല, നമുക്ക് ഹോപ് ഉണ്ടെന്ന് മറ്റ് ഡോക്ടേഴ്‌സ് പറയുമായിരുന്നു. രാജേട്ടനെ നഷ്ടമാവുന്നൊരു അവസ്ഥയെക്കുറിച്ച് അന്നെനിക്ക് ചിന്തിക്കാന്‍ പോലും പറ്റില്ലായിരുന്നു. രാത്രി 10 മണി കഴിഞ്ഞാല്‍ അദ്ദേഹം വീട്ടില്‍ എത്തിയില്ലെങ്കില്‍ ഞാന്‍ വിറയ്ക്കുമായിരുന്നു. അങ്ങനെയുള്ള ഞാന്‍ മരണവാര്‍ത്ത കേട്ടിട്ട് ഒരു ചലനവുമില്ലാതെ ഇരിക്കുകയായിരുന്നു. അതെങ്ങനെ സാധിച്ചു എന്നെനിക്കറിയില്ല. പെട്ടെന്ന് സങ്കടവും സന്തോഷവുമൊക്കെ തോന്നുന്ന ഞാന്‍ ടോട്ടലി ബ്ലാങ്കായി നിന്നു.
ഡയബറ്റിക്കായതിനാല്‍ ഇമ്യൂണിറ്റി കുറവായിരുന്നു. പനി വന്നതോടെ മള്‍ട്ടിപ്പിള്‍ ഓര്‍ഗന്‍ ഫെയിലറായി. ബ്ലഡില്‍ ഇന്‍ഫക്ഷന്‍ കൂടി. അങ്ങനെയൊരു അവസ്ഥയായിരുന്നു അദ്ദേഹത്തെ കൊണ്ടുപോയത്. ദൈവത്തെ പോലെ കണ്ടിരുന്ന ചിലരുടെയൊക്കെ പെരുമാറ്റത്തിലെ മാറ്റമൊക്കെ മനസിലാക്കിയത് അപ്പോഴാണ്. നെഗറ്റീവ് കാര്യങ്ങളൊന്നും പറയുന്നില്ല. വിഷമിച്ചിരിക്കുന്നൊരാളെ എങ്ങനെയൊക്കെ ആശ്വസിപ്പിക്കാമെന്ന് മനസിലാക്കിയത് അതിന് ശേഷമാണ്. ഞാന്‍ സ്ഥിരമായി സാധനങ്ങള്‍ വാങ്ങിയിരുന്ന കടയിലെ ചേട്ടന്‍ വന്ന് എന്റെ തലയിലൊന്ന് തൊട്ടു, ഒരക്ഷരം അദ്ദേഹം സംസാരിച്ചിരുന്നില്ല. അതുപോലെ ഒരു കൂട്ടുകാരി അവളുടെ നെറ്റിയിലെ പൊട്ട് എനിക്ക് വെച്ച് തന്നു. നിന്നെയൊരിക്കലും പൊട്ടില്ലാതെ കാണരുതെന്ന് പറഞ്ഞു. വേദനിച്ചിരിക്കുന്ന ഒരാള്‍ക്ക് എങ്ങനെയൊക്കെ ആശ്വാസം കിട്ടുമെന്ന് സ്വയം തിരിച്ചറിഞ്ഞ നിമിഷങ്ങളായിരുന്നു അതെന്നും താര പറയുന്നു.
@All rights reserved Typical Malayali.
Leave a Comment