അന്യപുരുഷന്മാര്‍ മുസ്ലീം സ്ത്രീകളുടെ മുടി കാണാന്‍ പാടില്ല, നടിയായത് കൊണ്ടാണ് ഞാന്‍ ഇങ്ങനെ; തെസ്‌നി ഖാന്‍ പറയുന്നു
വളരെ ചെറുപ്പത്തിലേ അഭിനയ ലോകത്തിലേക്ക് വന്നതാണ് തെസ്‌നി ഖാന്‍. മജീഷ്യനായ അച്ഛന്റെ പിന്തുണയായിരുന്നു തെസ്‌നിയ്ക്ക് സിനിമാ ലോകത്തിലേക്കുള്ള എന്‍ട്രി നല്‍കിയത് എന്ന് പലപ്പോഴും നടി പറഞ്ഞിട്ടുണ്ട്. കോമഡി സ്‌കിറ്റുകളില്‍ സജീവമായിരുന്ന തെസ്‌നി അക്കാലത്ത് (ഇപ്പോഴും) സ്‌റ്റേജ് ഷോകള്‍ ധാരാളം ചെയ്തിട്ടുണ്ട്. അത് വഴിയാണ് അഭിനയത്തിലും സജീവമായത്.
സഹതാര വേഷങ്ങളില്‍ എത്തിയ തെസ്‌നി ഇന്നും അഭിനത്തില്‍ സജീവമാണ്. നടി ആനി അവതരിപ്പിയ്ക്കുന്ന, അമൃത ടിവിയിലെ ആനീസ് കിച്ചണ്‍ എന്ന ഷോയില്‍ പങ്കെടുക്കവെ ഇഫ്താര്‍ ഓര്‍മകള്‍ പങ്കുവച്ചു. ഉമ്മ റുഖിയയ്‌ക്കൊപ്പമാണ് തെസ്‌നി ഷോയില്‍ എത്തിയത്. സ്‌പെഷ്യല്‍ ഹൈദരബാദി ബിരിയാണിയാണ് ഉമ്മയ്ക്കും തെസ്‌നിയ്ക്കും വേണ്ടി ആനി പാകം ചെയ്തത്. ഇഫ്താറിനെ കുറിച്ച് തനിക്കറിയാത്ത കാര്യങ്ങളൊക്കെ ആനി ചോദിക്കുമ്പോള്‍ തങ്ങളുടെ വിശ്വാസങ്ങള്‍ ഉമ്മയും തെസ്‌നിയും പങ്കുവച്ചു
ഉമ്മ കോഴിക്കോട്ടുകാരിയാണ്, വാപ്പ കുറ്റിപ്പുറവും. രണ്ട് വീട്ടുകാരും വളരെ ഓര്‍ത്തഡോക്‌സ് ആണ്. ഉപ്പയുടെ വീട്ടിലാണ് അധികം. അവിടെയൊക്കെ ഇപ്പോഴും പഴ ആചാരങ്ങളും വിശ്വാസങ്ങളും എല്ലാം കാത്ത് സൂക്ഷിക്കുന്ന സ്ത്രീകളുണ്ട്. അവിടെയൊക്കെ പുരുഷന്മാര്‍ക്ക് പുറത്തേക്കിറങ്ങാന്‍ ഒരു വഴിയും, സ്ത്രീകള്‍ക്ക് പുറത്തേക്കിറങ്ങാന്‍ മറ്റൊരു വഴിയും ആണ്. പുരുഷന്മാര്‍ക്ക് മുന്നില്‍ വന്ന് സംസാരിക്കാത്ത, വാതിലിന് മറവില്‍ വന്ന് നിന്ന് ആവശ്യങ്ങള്‍ സംസാരിക്കുന്ന സ്ത്രീകള്‍ ഉണ്ടെന്നാണ് തെസ്‌നി ഖാന്‍ പറയുന്നത്.
എന്തിനാണ് തട്ടം ഇടുന്നത് എന്ന് ആനി ചോദിയ്ക്കുന്നുണ്ട്. അന്യ പുരുഷന്മാര്‍ മുസ്ലീം സ്ത്രീകളുടെ മുടി പോലും കാണരുത് എന്നാണ് ഞങ്ങളുടെ വിശ്വാസം. കണ്ണ് മാത്രമേ പുറത്ത് കാണിക്കാന്‍ പാടുള്ളൂ. ഞാന്‍ ഒരു നടി ആയതുകൊണ്ടും, എന്റെ പ്രൊഫഷന്‍ ഇതായത് കൊണ്ടും മാത്രമാണ് ഞാന്‍ തട്ടമിടാതെ വന്നിരിക്കുന്നത്. അല്ലാതെ കോഴിക്കോടോ, കുറ്റിപ്പുറത്തോ പോകുമ്പോള്‍ തട്ടമൊക്കെ ഇട്ട് മാത്രമേ പോവാറുള്ളൂ- തെസ്‌നി ഖാന്‍ പറഞ്ഞു.
പഴയകാല നോമ്പ് തുറ ഓര്‍മകളാണ് ഉമ്മ പങ്കുവച്ചത്. ആ കാലം തന്നെയാണ് ഏറ്റവും പ്രിയപ്പെട്ടത് എന്ന് ഉമ്മ പറയുന്നു. നോമ്പ് തുറക്കുമ്പോഴുള്ള രീതികളെ കുറിച്ചും ആര്‍ക്കൊക്കെ എപ്പോഴൊക്കെ നോമ്പ് നോല്‍ക്കാം എന്നതിനെ കുറിച്ചും എല്ലാം തെസ്‌നിയും ഉമ്മയും സംസാരിക്കുന്നുണ്ട്.
@All rights reserved Typical Malayali.
Leave a Comment