കൊച്ചച്ചൻ വാങ്ങി ആദിത്യമോൾക്കു കൊടുത്ത ഫോൺ; പക്ഷേ, ഇങ്ങനെയുണ്ടാകുമെന്നു പ്രതീക്ഷിച്ചില്ല

തൃശൂർ: തിരുവില്വാമലയിൽ മൊബൈൽ ഫോൺ പൊട്ടിത്തെറിച്ച് എട്ടു വയസ്സുകാരി മരിച്ച സംഭവത്തിൽ വിദഗ്ദ പരിശോധനയ്ക്ക് പോലീസ്. വീട്ടിനുള്ളിലുണ്ടായ പൊട്ടിത്തെറിയിലാണ് എട്ട് വയസുകാരി മരിച്ചത്. പട്ടിപ്പറമ്പ്‌ കുന്നത്ത്‌ വീട്ടിൽ അശോക്‌ കുമാറിന്‍റെ മകൾ ആദിത്യശ്രീയാണ്‌ മരിച്ചത്‌. ചാർജ്ജ് ചെയ്യുകയായിരുന്ന ഫോണിൽ കുട്ടി വീഡിയോ കാണുന്നതിനിടെ ഫോൺ പൊട്ടിത്തെറിക്കുകയായിരുന്നുവെന്നാണ് പ്രാഥമിക നിഗമനം. സംഭവത്തിൽ പഴയന്നൂർ പോലീസ് വിശദമായ അന്വേഷണം ആരംഭിച്ചിട്ടുണ്ട്.തിരുവില്വാമല പട്ടിപ്പറമ്പിലാണ് സംഭവം. പൊട്ടിത്തെറിയുടെ ശബ്ദം കേട്ടതായി അയൽവാസികളും പറഞ്ഞു. മൂന്ന് വർഷം മുൻപ് വാങ്ങിയ സെക്കൻഡ് ഹാൻഡ് ഫോണിലാണ് കുട്ടി വീഡിയോ കണ്ടു കൊണ്ടിരുന്നത്. ഫോറൻസിക് വിദഗ്ധർ സ്ഥലത്തെത്തി പരിശോധന തുടങ്ങി. പഴയന്നൂർ പോലീസും അന്വേഷണം ആരംഭിച്ചു.മരിച്ച ആദിത്യശ്രീയുടെ അച്ഛൻ അശോക് കുമാർ മുന്‍ പഴയന്നൂർ ബ്ലോക്ക് പഞ്ചായത്ത് അംഗമാണ്.

ആശോക് കുമാറിന്‍റെ സഹോദരൻ മൂന്നു വർഷം മുൻപു പാലക്കാട്ടുനിന്നു വാങ്ങി നൽകിയ ഫോണാണ് പൊട്ടിത്തെറിച്ചത്. കഴിഞ്ഞ വർഷം അവിടെ ചെന്നു തന്നെ ബാറ്ററി മാറ്റിയിരുന്നു. ഏറെ നേരം വിഡിയോ കണ്ടപ്പോൾ ഫോൺ ചൂടായി പൊട്ടിത്തെറിച്ചതാകാമെന്നാണു പോലീസിന്‍റെ നിഗമനം. മറ്റു വിവരങ്ങൾ ഫൊറൻസിക് പരിശോധനയ്ക്കു ശേഷമേ വ്യക്തമാകൂ.പൊട്ടിത്തെറി നടക്കുന്ന സമയത്ത് കുട്ടിയും മുത്തശ്ശിയും മാത്രമാണു വീട്ടിലുണ്ടായിരുന്നത്. മുത്തശ്ശി ഭക്ഷണം എടുക്കാനായി അടുക്കളയിലേക്കു പോയപ്പോഴായിരുന്നു അപകടം. കുട്ടിയുടെ മുഖത്ത് ഗുരുതരമായി പരിക്കേറ്റിട്ടുണ്ട്. വലതു കൈവിരലുകൾ അറ്റുപോകുകയും കൈപ്പത്തി തകരുകയും ചെയ്തിട്ടുണ്ടെന്ന് പോലീസ് പറഞ്ഞു. മൃതദേഹം പോസ്റ്റ്മോർട്ടം നടപടികൾക്കായി തൃശൂർ മെഡിക്കൽ കോളേജിലേക്ക് മാറ്റി.

@All rights reserved Typical Malayali.