എന്റെ ജീവിതത്തില്‍ എല്ലാം അവനാണ്! ഇപ്പോഴത്തെ നേട്ടങ്ങളിലേക്ക് എന്നെ നയിച്ചതും സായി! മകനെക്കുറിച്ച് നവ്യ നായര്‍

ഇഷ്ടമെന്ന ചിത്രത്തിലൂടെ അഭിനയിച്ച് തുടങ്ങിയതാണ് നവ്യ നായര്‍. ആദ്യ സിനിമയുടെ പേര് പോലെ തന്നെ മലയാളികളുടെ ഇഷ്ട നായികയായി മാറുകയായിരുന്നു നവ്യ. വൈവിധ്യമാര്‍ന്ന ഒട്ടനവധി കഥാപാത്രങ്ങളെയാണ് താരം അവതരിപ്പിച്ചത്. വിവാഹത്തോടെയായി സിനിമയില്‍ നിന്നും മാറി നിന്നിരുന്നു. വികെ പ്രകാശ് സംവിധാനം ചെയ്ത ഒരുത്തിയിലൂടെയായി വീണ്ടും തിരിച്ചെത്തിയിരുന്നു.

കുട്ടിക്കാലം മുതലേ തന്നെ നൃത്തം നവ്യയ്‌ക്കൊപ്പമുണ്ടായിരുന്നു. തിരക്കുകള്‍ക്കിടയിലും നൃത്തത്തെ കൂടെക്കൂട്ടിയിരുന്നു. മാതംഗിയെന്ന ഡാന്‍സ് സ്‌കൂളും നടത്തുന്നുണ്ട് നവ്യ. അടുത്തിടെയായിരുന്നു യൂട്യൂബ് ചാനല്‍ തുടങ്ങിയത്. പ്രേക്ഷകരുടെ ചോദ്യങ്ങള്‍ക്കും നവ്യ മറുപടി നല്‍കാറുണ്ട്. അടുത്തിടെയൊരു ക്യുആന്‍ഡ്എ വീഡിയോയുമായി നവ്യ എത്തിയിരുന്നു. കരിയറിലെ മാത്രമല്ല ജീവിതത്തിലെ കാര്യങ്ങളെക്കുറിച്ചുള്ള ചോദ്യങ്ങള്‍ക്കും മറുപടി നല്‍കിയിരുന്നു.

ജീവിതത്തിലെ ഏറ്റവും വലിയ സമ്മാനത്തെക്കുറിച്ചുള്ള ചോദ്യവുമുണ്ടായിരുന്നു ലിസ്റ്റില്‍. എന്റെ ബിഗസ്റ്റ് ഗിഫ്റ്റായിട്ട് തോന്നിയതിലൊന്ന് എന്റെ മകനാണ്. അവനാണ് എല്ലാം. എന്റെ ജീവിതത്തില്‍ ഞാനിപ്പോള്‍ എന്തായിത്തീര്‍ന്നിട്ടുണ്ടോ, അതിലേക്ക് എന്നെ നയിച്ചത് എന്റെ മകനാണ്. അതൊരു വലിയ കഥയാണ്. എങ്ങനെയാണ് പറയേണ്ടതെന്നറിയില്ല. എപ്പോഴെങ്കിലും ഞാന്‍ പറയും.

പിന്നെ എനിക്ക് തോന്നിയിട്ടുള്ള കാര്യം എന്റെ എംപതിയാണ്. ഒരാളുടെ വേദന കണ്ടാല്‍ എനിക്കത് ഫീല്‍ ചെയ്യാനും മനസിലാക്കാനും പറ്റും. ആ എംപതിയുള്ളത് കൊണ്ടാണ് അഭിനയിക്കാനും, സഹായിക്കാനും, ആസ്വദിക്കാനുമൊക്കെ പറ്റുന്നത്. പാവപ്പെട്ടൊരാളുടെ വിഷമത കേള്‍ക്കാന്‍ കഴിയുന്നത് അതുകൊണ്ടാണ്. ഈശ്വരന്‍ തന്നൊരു ഗിഫ്റ്റായി കാണുന്നു അതിനെ. വേറൊരു ഗിഫ്റ്റ് നന്ദനമാണ്. അത് ഗുരുവായൂരപ്പന്‍ തന്ന സമ്മാനമായി കാണുന്നു.

സിനിമ ചെയ്യാന്‍ പറ്റിയത് ജീവിതത്തിലെ വലിയ നേട്ടങ്ങളിലൊന്നായാണ് ഞാന്‍ കാണുന്നതെന്നും നവ്യ വ്യക്തമാക്കിയിരുന്നു. ഡാന്‍സറായിരിക്കാന്‍ പറ്റുന്നതിലും സന്തോഷമുണ്ട്. ഈ ജീവിതം തന്നെ എനിക്കൊരു ബോണസാണ്. ഇതില് കിട്ടിയതെല്ലാം എനിക്ക് അച്ചീവ്‌മെന്‍സാണ്. അച്ഛന്‍, അമ്മ, മോന്‍, നിങ്ങള്‍ തരുന്ന സ്‌നേഹം എല്ലാം എന്റെ നേട്ടങ്ങളാണ്. എത്രയോ പേര്‍ എന്നെ കാണാനായി കാത്തിരിക്കുന്നു. എന്റെ കൂടെ നിന്ന് ഫോട്ടോ എടുക്കുന്നു. എന്റെ മുഖം കൈയ്യില്‍ ടാറ്റു ചെയ്തിരിക്കുന്നു. ഇതൊക്കെ എന്റെ നേട്ടമല്ലേ, എന്റെ മുജ്ജന്മ സുകൃതം. എന്നെ ആത്മാര്‍ത്ഥമായി സ്‌നേഹിക്കുന്ന ഒരുപാട് പേരെ എനിക്കറിയാം.അതെന്റെ ഭാഗ്യമായാണ് കരുതുന്നത് എന്നും നവ്യ പറയുന്നു.

@All rights reserved Typical Malayali.