കല്യാണം കഴിക്കില്ല, ലിവിങ് റിലേഷന്‍ഷിപ് ഓകെയാണ് പറഞ്ഞ ഐശ്വര്യ ലക്ഷ്മി; നിവിന്റെ നായികയായി തുടക്കം, പേരിന് പിന്നിലെ രഹസ്യം?
ഐശ്വര്യ ലക്ഷ്മിയുടെ ജന്മദിനമാണ് ഇന്ന്. അഭിപ്രായങ്ങളും പ്രതികരണങ്ങളും അവസരങ്ങളെ പേടിച്ച് പറയാതിരിക്കുന്ന നടിമാര്‍ക്കിടയില്‍ ബോള്‍ഡ് ആയിട്ടുള്ള നടിയായിട്ടാണ് ഐശ്വര്യയെ ആരാധകര്‍ കാണുന്നത്. ഇപ്പോള്‍ മലയാള സിനിമയില്‍ നടന്നുകൊണ്ടിരിയ്ക്കുന്ന പ്രശ്‌നങ്ങളില്‍ ഐശ്വര്യ ലക്ഷ്മിയുടെ പ്രതികരണം വൈറലായിരുന്നു. എന്തുകൊണ്ട് താരസംഘടനയായ അമ്മയില്‍ അംഗത്വം എടുത്തില്ല എന്ന ചോദ്യത്തിന്, എനിക്കെന്തെങ്കിലും പ്രശ്‌നം വന്നാല്‍ അമ്മ സംഘടന പ്രതികരിക്കുമെന്ന് വിശ്വാസമില്ല എന്നായിരുന്നു നടിയുടെ പ്രതികരണം.
ഇതുപോലെ തന്നെ വിവാഹത്തെ കുറിച്ച് ഐശ്വര്യ ലക്ഷ്മി പറഞ്ഞ വാക്കുകളും വൈറലായിരുന്നു. തമിഴില്‍ ഗട്ടഗുസ്തി എന്ന സിനിമ ചെയ്തതിന് ശേഷം നല്‍കിയ പ്രമോഷന്‍ പരിപാടിയിലാണ് ഐശ്വര്യ ലക്ഷ്മി വിവാഹത്തെ കുറിച്ച് പ്രതികരിച്ചത്. ഗുസ്തിക്കാരിയായ പെണ്‍കുട്ടി, അത് മറച്ചുവച്ച് വിവാഹം ചെയ്യുന്നതും ദാമ്പത്യ ജീവിതത്തില്‍ പിന്നീടത് എങ്ങനെ ബാധിക്കുന്നു എന്നതും അതിന്റെ അതിജീവനവുമൊക്കെയാണ് സിനിമയുടെ കഥ. റിയല്‍ ലൈഫില്‍ വിവാഹത്തെ കുറിച്ച് ചോദിച്ചപ്പോള്‍ ഞാന്‍ വിവാഹം ചെയ്യില്ല എന്ന് ഐശ്വര്യ വ്യക്തമാക്കിയിരുന്നു.
ലിവിങ് ടുഗെതര്‍ റിലേഷന്‍ഷിപ്പിനോട് എനിക്ക് താത്പര്യക്കുറവില്ല. പാര്‍ട്ണര്‍ ആവാം. പക്ഷേ വിവാഹം സമ്പ്രദായത്തില്‍ നിന്ന്, നിയമത്തിന്റെ നിര്‍ബന്ധത്തിന് സ്‌നേഹിക്കുന്ന അവസ്ഥയോട് താത്പര്യമില്ല. വിവാഹം കഴിച്ചുപോയതുകൊണ്ട്, ഭാര്യയായതുകൊണ്ട് സ്‌നേഹിക്കണം എന്ന് നിര്‍ബന്ധിതമാവും. ഇഷ്ടപ്പെടാം, ഇഷ്ടപ്പെട്ടാല്‍ ഒന്നിച്ചു ജീവിക്കാം. അതല്ല എങ്കില്‍ വേര്‍പിരിയാം. വിവാഹം ചെയ്തു കഴിഞ്ഞിട്ട് വേര്‍പിരിയണം എന്ന് തോന്നിയാല്‍, വീണ്ടും നിയമവും കോടതിയും ഒക്കെ കയറി ഇറങ്ങുന്നതിനോട് എനിക്ക് യോജിപ്പില്ല- എന്നാണ് ഐശ്വര്യ ലക്ഷ്മി പറഞ്ഞത്.
തിരുവന്തപുരം കാരിയായ ഐശ്വര്യ ലക്ഷ്മി മോഡലിങിലൂടെയാണ് കരിയര്‍ ആരംഭിച്ചത്. ശ്രീലക്ഷ്മി എന്ന് അച്ഛനും, ഐശ്വര്യ എന്ന് അമ്മയും പേരിട്ട് വിളിച്ചപ്പോള്‍, അത് രണ്ടും ചേര്‍ത്ത് ഐശ്വര്യ ലക്ഷ്മി എന്ന പേര് സ്വീകരിക്കുകയായിരുന്നു എന്ന് നേരത്തെ ഒരു അഭിമുഖത്തില്‍ ഐശ്വര്യ ലക്ഷ്മി പറഞ്ഞിരുന്നു. എംബിബിഎസ് പഠനം പൂര്‍ത്തിയാക്കിയതിന് ശേഷമാണ് ഐശ്വര്യ ലക്ഷ്മി അഭിനയ ലോകത്തേക്ക് വരുന്നത്. നിവിന്‍ പോളിയുടെ നായികയായി ഞണ്ടുകളുടെ നാട്ടില്‍ ഒരിടവേള എന്ന സിനിമയിലൂടെയായിരുന്നു തുടക്കം. പക്ഷേ ഹൈപ്പ് കിട്ടിയത് മായാനദി എന്ന ചിത്രത്തിലൂടെയായിരുന്നു.
വരത്തന്‍, വിജയ് സൂപ്പറും പൗര്‍ണമിയും, ബ്രദേഴ്‌സ് ഡേ, കാണെക്കാണേ തുടങ്ങി ഐശ്വര്യ തിരഞ്ഞെടുത്ത ചിത്രങ്ങളെല്ലാം ഒരു അഭിനേത്രി എന്ന നിലയിലുള്ള താരത്തിന്റെ സെലക്ഷന്‍ സെന്‍സിനെ വെളിവാക്കുന്നതായിരുന്നു. തമിഴില്‍ എത്തിയാല്‍, പൊന്നിയന്‍ സെല്‍വന്‍ പോലൊരു ഹിസ്‌റ്റോറിക് ചിത്രത്തിന്റെ ഭാഗമാവാന്‍ സാധിച്ചു. മണിരത്‌നത്തെ പോലൊരു സംവിധായകന്റെ സിനിമയില്‍ അഭിനയിച്ചതാണ് ഇന്ന് കാണുന്ന നിലയിലേക്ക് ഐശ്വര്യ ലക്ഷ്മിയുടെ മാര്‍ക്കറ്റ് വാല്യു ഉയര്‍ത്തിയത്. മുപ്പത്തിമൂന്നാം വയസ്സിലേക്ക് കടക്കുന്ന ഐശ്വര്യ ലക്ഷ്മിയ്ക്ക് സമയം മലയാളത്തിന്റെ ബര്‍ത്ത്‌ഡേ ആശംസകള്‍.
@All rights reserved Typical Malayali.
Leave a Comment