8:10 ന് കല്യാണം കഴിഞ്ഞു, പത്ത് മണിയാവുമ്പോഴേക്കും വേഷം മാറി ഷൂട്ടിങിന് പോയി; സുകുമാരനുമായുള്ള കല്യാണത്തെ കുറിച്ച് മല്ലിക

മലയാളത്തിന് നഷ്ടപ്പെട്ട അപൂര്‍വ്വ നടനാണ് സുകുമാരന്‍. പൃഥ്വിരാജ്, ഇന്ദ്രജിത്ത് എന്നീ രണ്ട് മക്കളെയും മലയാള സിനിമയ്ക്ക് തന്ന് മണ്‍മറഞ്ഞ നടന്‍ ഇന്നും മല്ലിക സുകുമാരന്റെ വാക്കുകളിലൂടെ മലയാളികള്‍ക്ക് ജീവിക്കുന്ന ഓര്‍മയാണ്. ഭര്‍ത്താവ് സുകുമാരനെ കുറിച്ചുള്ള ഓര്‍മകള്‍ പങ്കുവയ്ക്കാത്ത മല്ലികയുടെ അഭിമുഖങ്ങളില്ല. അങ്ങനെയുള്ള സുകുമാരന് വേണ്ടി അമൃത ടിവിയില്‍ ‘ഓര്‍മയില്‍ എന്നും സുകുമാരന്‍’ എന്നൊരു ഷോ നടത്തുന്നുണ്ട്. അതില്‍ സുകുമാരന്റെ ജീവിതത്തിലൂടെ കടന്ന് പോയവരെ കുറിച്ചും, അദ്ദേഹത്തിന്റെ നല്ല ഓര്‍മകളെ കുറിച്ചും മല്ലിക പങ്കുവയ്ക്കുന്നു.

മറക്കാന്‍ കഴിയാത്ത തങ്ങളുടെ കല്യാണത്തെ കുറിച്ച് മല്ലിക പറഞ്ഞ വാക്കുകളാണ് ഇപ്പോള്‍ സോഷ്യല്‍ മീഡിയ ഏറ്റെടുത്തിരിയ്ക്കുന്നത്. ആരെയും കൂസാത്ത, ഒരു സമ്പ്രദായങ്ങള്‍ക്കും, കെട്ടുപാടുകള്‍ക്കും അടക്കി നിര്‍ത്താന്‍ കഴിയാത്ത ചിന്താഗതിയായിരുന്നു സുകുമാരന്റേത് എന്ന് നേരത്തെ പല അഭിമുഖങ്ങളിലും മല്ലിക പറഞ്ഞിട്ടുണ്ട്. വിവാഹവും അങ്ങനെ തന്നെയായിരുന്നു. ഇന്റസ്ട്രിയില്‍ അന്ന് തിളങ്ങി നില്‍ക്കുന്ന നടിയുടെയും നടന്റെയും വിവാഹം ആരും അറിയാതെ നടന്ന ഒരു ചെറിയ ചടങ്ങായിരുന്നുവത്രെ!

വിവാഹത്തിന് എനിക്ക് അധികമാരെയും അറിയിക്കാനില്ല, രണ്ട് ചേട്ടന്മാരെയും തിരുവനന്തപുരത്തുള്ള വല്യച്ഛനെയും മാത്രമേ വിളിക്കാനുള്ളൂ എന്ന് സുകുമാരന്‍ പറഞ്ഞുവത്രെ. എനിക്കും അത്രയ്ക്കാരെയും ക്ഷണിക്കാനില്ല എന്ന് മല്ലികയുടെ അച്ഛനും പറഞ്ഞു. എന്നാല്‍ ലളിതമായി ചടങ്ങ് അങ്ങ് നടത്താം എന്ന് തീരുമാനമായി. കല്യാണത്തിനായി സുകുമാരന്‍ രാവിലെ മദ്രാസില്‍ നിന്ന് തിരുവനന്തപുരത്തെത്തി. വഴുതക്കാടുള്ള സുകുമാരന്റെ വീട്ടില്‍ വച്ച് രാവിലെ 7.40 നും 8.10 നും ഉള്ള ശുഭ മുഹൂര്‍ത്തത്തിലാണ് വിവാഹം.

അന്ന് തന്നെയാണ് തോപ്പില്‍ ഭാസി സംവിധാനം ചെയ്യുന്ന എന്റെ നീലാകാശം എന്ന സിനിമയുടെ ഷൂട്ടിങ് ആരംഭിയ്ക്കുന്നത്. കൊല്ലത്ത് നീലാഹോട്ടലില്‍ വച്ചിട്ടാണ് ഷൂട്ടിങ്. അവിടെ തോപ്പില്‍ ഭാസി സാറും എസ്‌കെ നായര്‍ സാറും മലയാറ്റൂര്‍ സാറുമൊക്കെ സ്ഥിരം അവിടെയാണ്. രാവിലെ തിരുവനന്തപുരത്തെത്തിയ സുകുയേട്ടന്‍ ഭാസി സാറിനെ വിളിച്ച്, ഞാന്‍ എത്താന്‍ പത്ത് മണിയാവും, ചെറിയൊരു ചടങ്ങുണ്ട് എന്ന് മാത്രം വിളിച്ചു പറഞ്ഞു. അപ്പോഴേക്കും മല്ലികയും സുകുമാരനും വിവാഹിതരാകുന്നു എന്ന വാര്‍ത്ത ഇന്റസ്ട്രിയില്‍ സംസാര വിഷയമായിരുന്നു. പക്ഷേ അതേക്കുറിച്ചൊന്നും ഭാസി സര്‍ ചോദിച്ചില്ല, ഇദ്ദേഹം പറഞ്ഞുമില്ല.

ചെറിയ രീതിയില്‍ വീട്ടില്‍ വച്ച് താലികെട്ടും ചടങ്ങും കഴിഞ്ഞു. കുറച്ച് നേരം കഴിഞ്ഞപ്പോഴേക്കും കല്യാണ വേഷമെല്ലാം മാറി ഒരു കൈലിയും ഷര്‍ട്ടും ഇട്ട് സ്ഥിരം ഷൂട്ടിങിന് പോകുന്ന വേഷത്തില്‍ സുകുയേട്ടന്‍ ഇറങ്ങി വന്നു. അമ്മ ചോദിച്ചപ്പോള്‍, അന്നമാണമ്മേ എന്ന് മറുപടിയും കൊടുത്തു. രണ്ട് ഇഡ്ഡലിയും തിന്ന് ലൊക്കേഷനിലേക്ക് പോയി. അവിടെ വച്ച് തോപ്പില്‍ ഭാസി സാറോട് മാത്രം കല്യാണം കഴിഞ്ഞു എന്ന കാര്യം പറഞ്ഞു. ആദ്യകാല നടി മീനയും ആ സിനിമയില്‍ അഭിനയിക്കുന്നുണ്ടായിരുന്നു, ‘നിന്റെ കല്യാണമാണെന്ന് കേട്ടല്ലോ സുകുവേ?’ എന്ന് ചോദിച്ചപ്പോള്‍ ‘പിന്നെ രാവിലെ തന്നെ കല്യാണം കഴിഞ്ഞ് ഞാന്‍ ലൊക്കേഷനിലേക്ക് വരുന്നല്ലേ!’ എന്ന് അവര്‍ക്ക് മറുപടി കൊടുത്തു. കല്യാണം കഴിഞ്ഞ കാര്യം പറഞ്ഞതുമില്ല. അത്രയും സിംപിളായിരുന്നു സുകുയേട്ടന്‍ എന്ന് മല്ലിക പറയുന്നു.

@All rights reserved Typical Malayali.