എപ്പോഴും നമുക്ക് നല്ലത് പ്രതീക്ഷിക്കാമല്ലോ! ചെമ്പനീര്‍ പൂവിലേക്ക് തിരിച്ചുവരുന്നുണ്ടോ? ഗോമതി പ്രിയയുടെ പോസ്റ്റ് ഏറ്റെടുത്ത് ആരാധകര്‍

ചെമ്പനീര്‍ പൂവ് പരമ്പരയിലൂടെയായി പ്രേക്ഷക മനസില്‍ ഇടം നേടിയ താരമാണ് ഗോമതി പ്രിയ. രേവതി എന്ന കഥാപാത്രത്തെയായിരുന്നു ഗോമതി അവതരിപ്പിച്ചത്. സച്ചി-രേവതി കെമിസ്ട്രിക്ക് മികച്ച സ്വീകാര്യതയായിരുന്നു ലഭിച്ചത്. മധുര സ്വദേശിനിയായ ഗോമതിയും പരമ്പരയിലൂടെ പ്രേക്ഷകര്‍ക്ക് പ്രിയങ്കരിയായി മാറുകയായിരുന്നു. തമിഴ് പരമ്പരയുടെ മലയാളം റീമേക്കിലും വേഷമിടാന്‍ കഴിഞ്ഞതില്‍ അതീവ സന്തുഷ്ടയായിരുന്നു ഗോമതി. എടുത്തുപറയാനും മാത്രം സിനിമ സീരിയല്‍ ബന്ധങ്ങളൊന്നുമില്ലായിരുന്നു ഗോമതിക്ക്. അഭിനേത്രിയാവുക എന്ന ആഗ്രഹം സഫലീകരിക്കാനായി കഠിന പ്രയത്‌നങ്ങളായിരുന്നു ഗോമതി നടത്തിയത്. ഇന്‍സ്റ്റഗ്രാമിലൂടെയായി തന്റെ കരിയറിനെക്കുറിച്ചും അഭിനയജീവിതത്തെക്കുറിച്ചും താരം സംസാരിച്ചിരുന്നു.

മികച്ച നടിക്കുള്ള ടെലിവിഷന്‍ പുരസ്‌കാരം നേടിയപ്പോള്‍ ഇത് കഠിനാധ്വാനത്തിന്റെ റിസല്‍ട്ടാണെന്നായിരുന്നു ഗോമതി പറഞ്ഞത്. എന്നെ സംബന്ധിച്ച് സ്വപ്‌നനിമിഷം എന്നും വിശേഷിപ്പിക്കാം. ആളുകള്‍ സ്വീകരിക്കുമോയെന്നുള്ള ആശങ്ക തുടക്കത്തിലേ മനസിലുണ്ടായിരുന്നു. എന്നെ പിന്തുണച്ച് കൂടെ നിന്നവരോടെല്ലാം നന്ദി പറയുന്നുവെന്നായിരുന്നു അന്ന് ഗോമതി കുറിച്ചത്. ഇന്‍സ്റ്റഗ്രാമില്‍ സജീവമായ ഗോമതി പങ്കിടുന്ന വിശേഷങ്ങള്‍ പെട്ടെന്ന് തന്നെ വൈറലായി മാറാറുണ്ട്.

പ്രതീക്ഷ മനോഹരമായൊരു കാര്യമാണ്. എപ്പോഴും നമുക്ക് നല്ലത് പ്രതീക്ഷിക്കാം. ഉള്ളിലെ പ്രകാശം ഒരിക്കലും കെടുത്തിക്കളയരുത്. എനിക്ക് നിങ്ങളെക്കുറിച്ച് അഭിമാനം തോന്നുന്നു. നിങ്ങളുടെ പരിശ്രമത്തെക്കുറിച്ചും, കഷ്ടപ്പാടുകളെക്കുറിച്ചോ, പ്രാര്‍ത്ഥനയെക്കുറിച്ചോ ആളുകള്‍ക്ക് അറിയില്ല. നിങ്ങള്‍ ഒരു നിശബ്ദ യുദ്ധമാണ് ചെയ്യുന്നതെന്ന് അവര്‍ക്കറിയില്ല. നിങ്ങളെക്കുറിച്ച് അഭിമാനിക്കുന്നു എന്നായിരുന്നു ഗോമതി ഇന്‍സ്റ്റഗ്രാമില്‍ കുറിച്ചത്.

ചെമ്പനീര്‍ പൂവ് പരമ്പരയിലേക്ക് ഗോമതിയെ തിരികെ കൊണ്ടുവരാമോയെന്നായിരുന്നു ആരാധകരുടെ ചോദ്യങ്ങള്‍. ചുരുങ്ങിയ കാലം കൊണ്ട് തന്നെ ആരാധക ഹൃദയത്തില്‍ ഇടം നേടിയതാണ് ഗോമതി പ്രിയ. രേവതിയായി ഗോമതി ജീവിക്കുകയായിരുന്നു എന്നാണ് ആരാധകര്‍ പറഞ്ഞത്. മികച്ച രീതിയില് മുന്നേറുന്നതിനിടെ നായികയെ മാറ്റുന്നത് ശരിയായ കാര്യമല്ലെന്നായിരുന്നു പ്രേക്ഷകര്‍ വിലയിരുത്തിയത്.

ബ്രിങ്ങ് ബാക്ക് ഗോമതി പ്രിയ എന്ന ഹാഷ് ടാഗ് സജീവമാണ്. പരമ്പരയുടെ പുതിയ പ്രമോ വന്നപ്പോള്‍ മുതല്‍ ഇതേക്കുറിച്ചുള്ള ചര്‍ച്ചകള്‍ സജീവമായിരുന്നു. ഡേറ്റ് ക്ലാഷ് കാരണമായാണ് താരത്തെ പരമ്പരയില്‍ നിന്നും മാറ്റിയതെന്നുള്ള റിപ്പോര്‍ട്ടുകളും പുറത്തുവന്നിരുന്നു. ഗോമതിയുടെ പോസ്റ്റുകളുടെ താഴെയെല്ലാം ചെമ്പനീര്‍ പൂവിനെക്കുറിച്ചാണ് ആരാധകര്‍ ചോദിക്കുന്നത്. പ്രതീക്ഷയോടെയുള്ള പുതിയ പോസ്റ്റ് കണ്ടപ്പോള്‍ ഇനി പരമ്പരയിലേക്ക് തിരികെ വരുമെന്നാണോ സൂചനയെന്നായിരുന്നു ചിലര്‍ ചോദിച്ചത്.

@All rights reserved Typical Malayali.