അന്ന് ഞങ്ങളുടെ കല്യാണം കഴിഞ്ഞപ്പോള്‍, ഇനി ഇവളെന്റെ തലയില്‍ ആകുമോ എന്ന് വിനീത് ഭയന്നിരുന്നു; തന്റെ ടെറര്‍ സ്വഭാവത്തെ കുറിച്ച് ജോമോള്‍
വിരലിലെണ്ണാവുന്ന അത്രയും സിനിമകള്‍ മാത്രമേ ചെയ്തിട്ടുള്ളൂവെങ്കിലും, ജോമോള്‍ എന്ന് കേട്ടാല്‍ മലയാളികള്‍ക്ക് ഇന്നും പ്രിയപ്പെട്ട നടിയാണ്. ചെയ്ത കഥാപാത്രങ്ങളെല്ലാം ഇന്നും പ്രേക്ഷകര്‍ ഓര്‍ത്തിരിയ്ക്കുന്നതാണ്. ബാലതാരമായി സിനിമാ ലോകത്തേക്ക് എത്തിയ ജോമോളുടെ എന്റെ സ്വന്തം ജാനകിക്കുട്ടി എന്ന ചിത്രത്തിലെ വേഷം എല്ലാം പ്രശംസയും പുരസ്‌കാരവും വാരിക്കൂട്ടിയതാണ്. നിറം, മയില്‍പ്പീലിക്കാവ് പോലുള്ള സിനിമകളിലെ വേഷവും ഏറെ ശ്രദ്ധ നേടി.
പ്രണയ വിവാഹത്തിന് ശേഷം അഭിനയ ലോകത്ത് നിന്ന് മാറി നിന്ന ജോമോളിനെ കുറിച്ച് കുറേക്കാലം യാതൊരു വിവരവും ഇല്ലായിരുന്നു. എന്നാല്‍ ഇന്‍സ്റ്റഗ്രാം ആക്ടീവായതോടെ, ജോമോളും സജീവമായി. തന്റെ ബേക്കിങ് ബിസിനസ് പ്രമോട്ട് ചെയ്തുകൊണ്ടായിരുന്നു തുടക്കം, ഇപ്പോള്‍ വ്യക്തിപരമായ കാര്യങ്ങളും ഫോട്ടോകളും എല്ലാം പങ്കുവയ്ക്കാന്‍ തുടങ്ങിയിരിക്കുന്നു.
നര്‍ത്തകിയായ ജോമോള്‍ അഭിനയത്തിലേക്കും തിരിച്ചെത്തി. ജയ് ഗണേഷ് എന്ന ചിത്രത്തിലെ വേഷം ശ്രദ്ധ നേടിയിരുന്നു. കാതല്‍ ദ കോര്‍ എന്ന ചിത്രത്തില്‍ ജ്യോതികയ്ക്ക് ശബ്ദം നല്‍കിയത് ജോമോളാണ്. ഇപ്പോള്‍ ടെലിവിഷന്‍ ഷോകളില്‍ വിധികര്‍ത്താവായും മെന്ററായും എല്ലാം വരുന്നുണ്ട്. അങ്ങനെയാണ് ഫ്‌ളവേഴ്‌സ് ചാനലിലെ മ്യൂസിക്കല്‍ വൈഫ് എന്ന ഷോയിലും എത്തിയത്.
പരിപാടില്‍ പല അനുഭവങ്ങളും ജോമോള്‍ പങ്കുവയ്ക്കാറുണ്ട്. അക്കൂട്ടത്തിലാണ് നടന്‍ വിനീത് കുമാറിനെ കുറിച്ച് സംസാരിട്ടത്. വടക്കന്‍ വീരഗാഥ എന്ന ചിത്രത്തില്‍ ബാലതാരമായി എത്തിയതാണ് രണ്ട് പേരും. അന്ന് എന്നെ വിനീതിന് പേടിയായിരുന്നു എന്ന് ജോമോള്‍ പറയുന്നു. എന്റെ സ്വഭാവം കുറച്ച് ടെറര്‍ ആയിരുന്നു. മാത്രമല്ല, സിനിമയില്‍ ഞങ്ങള്‍ വിവാഹം ചെയ്യുന്ന ഒരു രംഗമുണ്ട്. മാലയൊക്കെ ഇട്ട് വിവാഹം ചെയ്തതിന് ശേഷം, ഇനി ഇവള്‍ ശരിക്കും എന്റെ തലയിലാവുമോ, ഭാവിയില്‍ അങ്ങനെ സംഭവിക്കുമോ എന്നൊക്കെ വിനീത് ഭയന്നിരുന്നുവത്രെ.
എന്നാല്‍ വടക്കന്‍ വീരഗാഥയ്ക്ക് മുന്‍പ് വിനീതും ജോമോളും ഒന്നിച്ച് അനഘ എന്നൊരു സിനിമ ചെയ്തിരുന്നു. ആ സിനിമയുടെ സെറ്റില്‍ വച്ചേ എനിക്ക് ജോമോളോട് ഇത്തിരി കുശുമ്പും അസൂയയും ഒക്കെ ഉണ്ടായിരുന്നു എന്ന് വിനീത് പറയുന്നു. അനഘയുടെ ഷൂട്ടിങ് സമയത്ത് ഓരോ സീന്‍ കഴിഞ്ഞാലും, അടുത്ത സീന്‍ ചെയ്യണമെങ്കില്‍ എനിക്ക് ചോക്ലേറ്റ് വേണം എന്ന് പറഞ്ഞ് വാശി പിടിക്കുന്ന ജോമോളെ കാണാമായിരുന്നു. അത് പോലെ തന്നെ, സീന്‍ കഴിഞ്ഞാല്‍ ജോമോള്‍ക്ക് ചോക്ലേറ്റ് കിട്ടും. അന്നൊക്കെ സിംപതിയുടെ പുറത്ത് ചെറിയ കഷ്ണം എനിക്ക് കിട്ടിയാല്‍ ആയി എന്നാണ് വിനീത് പറഞ്ഞത്
അനഘയും വടക്കന്‍ വീരഗാഥയും കഴിഞ്ഞ്, 26 വര്‍ഷങ്ങള്‍ക്ക് ശേഷം കെയര്‍ ഫുള്‍ എന്ന വികെ പ്രകാശ് ചിത്രത്തിലും വിനീത് കുമാറും ജോമോളും ഒന്നിച്ചഭിനയിച്ചിരുന്നു. അഭിനയത്തെക്കാള്‍ ഇപ്പോള്‍ സംവിധാന ലോകത്താണ് വിനീത് ശ്രദ്ധ കേന്ദ്രീകരിച്ചിരിയ്ക്കുന്നത്. പവി കെയര്‍ ടേക്കര്‍ എന്ന ദിലീപ് ചിത്രമാണ് ഏറ്റവുമൊടുവില്‍ സംവിധാനം ചെയ്തത്.
@All rights reserved Typical Malayali.
Leave a Comment