അറിഞ്ഞോ കണ്ണന്റെ കല്യാണമാ, ക്ഷണം തുടങ്ങി! നമ്പർ വൺ ഇൻവിറ്റേഷൻ പോയത് മുഖ്യമന്ത്രിക്ക്; സന്തോഷം പങ്കിട്ട് കണ്ണൻ

പ്രായം മുപ്പത് കഴിഞ്ഞു, തെന്നിന്ത്യയിലെ വലിയ നടൻ ആയി; എന്നാലും മലയാളികൾക്ക് കാളിദാസ് ജയറാം ഇന്നും കണ്ണൻ ആണ്. മിക്ക സിനിമ പ്രേമികളും കണ്ണൻ എന്നുതന്നെയാണ് കാളിദാസിനെ വിളിക്കുക. ജയറാം പാർവതി ദമ്പതിമാരുടെ മൂത്തമകൻ കൂടിയായ കാളിദാസ് അച്ഛന്റെയും അമ്മയുടെയും പാത പിന്തുടർന്നുകൊണ്ട് സിനിമയിലേക്ക് എത്തിയപ്പോൾ നിറഞ്ഞ സ്വീകരണമാണ് ലഭിച്ചതും. ഇപ്പോൾ തന്റെ വിവാഹം ഉടനെ ഉണ്ടാകുമെന്നും ആദ്യമായി ക്ഷണപത്രിക ഒരാൾക്ക് നല്കിയെന്നുമുള്ള സന്തോഷവർത്തമാനമാണ് കാളിദാസ് പങ്കുവയ്ക്കുന്നത്.

ആദ്യവിവാഹക്ഷണം നൽകിയത് തമിഴ് നാട് മുഖ്യമന്ത്രി എംകെ സ്റ്റാലിനായിരുന്നു. ജയറാമും പാർവതിയും കാളിദാസും നേരിട്ട് എത്തിയാണ് ക്ഷണം നൽകിയത്. ജന്മം കൊണ്ട് മലയാളി ആണെങ്കിലും കാളിദാസ് ജനിച്ചതും വളർന്നതും എല്ലാം ചെന്നൈയിൽ ആണ്., താരത്തിന്റെ പങ്കാളി ആയെത്തുന്ന ഇരുപത്തിനാലുകാരിയായ താരിണി നീലഗിരി സ്വദേശിയാണ്

ചെന്നൈയിൽ വച്ചായിരുന്നു കാളിദാസും താരിണിയും തമ്മിലുള്ള വിവാഹനിശ്ചയം. മോഡലിങ് രംഗത്തു നിന്നുമാണ് കാളിദാസ് ജയറാം ഭാവി വധുവിനെ കണ്ടെത്തിയത്. 2021ലെ മിസ് യൂണിവേഴ്‌സ് ഇന്ത്യ തേഡ് റണ്ണർ അപ്പ് കൂടിയായ താരിണി വിഷ്വൽ കമ്യൂണിക്കേഷനിൽ ബിരുദം നേടിയിട്ടുണ്ട്.

സത്യൻ അന്തിക്കാട് സംവിധാനം ചെയ്ത കൊച്ചു കൊച്ചു സന്തോഷങ്ങൾ എന്ന ചിത്രത്തിലൂടെ മലയാളചലച്ചിത്രവേദിയിലെത്തിയ ബാലതാരമാണ് കാളിദാസൻ. സിബി മലയിൽ സംവിധാനം ചെയ്ത എന്റെ വീട്, അപ്പൂന്റേം എന്ന ചിത്രങ്ങളിലെ അഭിനയ മികവിന് 2003-ലെ മികച്ച ബാലനടനുള്ള കേരള സർക്കാർ ചലച്ചിത്രപുരസ്കാരവും ദേശീയ ചലച്ചിത്രപുരസ്കാരവും കാളിദാസൻ നേടിയിരുന്നു. ഇന്ത്യൻ ടു ആണ് കാളിദാസ് ഒടുവിൽ അഭിനയിച്ച ചിത്രം. അവൾ പേയർ രജനി, ഡി 50 എന്നീ ചിത്രങ്ങൾ ആണ് കാളിദാസിന്റേതായി വരാനിരിക്കുന്നത്.

ഗുരുവായൂരിൽ വച്ച് 1992 സെപ്റ്റംബർ 7 നാണ് ജയറാം പാർവതിയെ വിവാഹം ചെയ്തത്. ഒരു ചരിത്രം കുറിച്ചുകൊണ്ടാണ് ഇവരുടെ വിവാഹം നടന്നത്. അന്നത്തെ പത്രത്താളുകളിൽ ഇവരുടെ വിവാഹത്തിന്റെ ദിവസങ്ങൾ അടുക്കാൻ പോകുന്നതിന്റെ കൗണ്ട് ഡൌൺ ഉണ്ടായിരുന്നു. എല്ലാവരും വിവാഹത്തിനു വരണേ എന്ന് പറഞ്ഞുകൊണ്ടുള്ള കൊണ്ടുള്ള കൗണ്ട് ഡൌൺ പരസ്യം പക്ഷേ നിയന്ത്രിക്കാൻ കഴിയാത്ത തിരക്കായി ഗുരുവായൂരിൽ. അത്രയധികം ആളുകളാണ് ഇരുവരുടെയും വിവാഹം കൂടാൻ എത്തിയതും. സ്വന്തം അച്ഛന് പോലും തിരക്ക് കാരണം മണ്ഡപത്തിൽ കയറാൻ ആകാത്ത അവസ്ഥ ആയി.

അച്ഛനും അമ്മയ്ക്കും ഉണ്ടായ പോലെ ഒരു അക്കിടി കണ്ണന്റെ കാര്യത്തിൽ സംഭവിക്കാതെ ഇരിക്കട്ടെ എന്നാണ് ക്ഷണകത്ത് കണ്ട ആരാധകരുടെ രസകരമായ കമന്റുകൾ.

@All rights reserved Typical Malayali.