തിരിച്ചറിയാന്‍ പറ്റാത്ത വിധം മാറി, വേറെ പ്രശ്‌നങ്ങളൊന്നുമില്ല! കനകയുടെ പുതിയ ഫോട്ടോകള്‍ വൈറലാവുന്നു; എന്താണ് കനകയുടെ ജീവിതത്തില്‍ സംഭവിച്ചത്
ഗോഡ്ഫാദര്‍ എന്ന ചിത്രത്തിലെ മാലു മലയാളികള്‍ക്ക് ഇന്നും പ്രിയപ്പെട്ട നടിയാണ്. സിദ്ധിഖ് – ലാല്‍ സംവിധാനം ചെയ്ത ഗോഡ്ഫാദര്‍ എന്ന ചിത്രത്തിലൂടെ അഭിനയ ലോകത്തേക്ക് എത്തിയ കനക പിന്നീട് മോഹന്‍ലാല്‍, മമ്മൂട്ടി, സുരേഷ് ഗോപി, ജയറാം തുടങ്ങിയവര്‍ക്കൊപ്പമൊക്കെ മികച്ച കുറേ നല്ല സിനിമകളും കഥാപാത്രങ്ങളും ചെയ്തു. കരിയറില്‍ തിളങ്ങി നില്‍ക്കുമ്പോഴായിരുന്നു കനക അപ്രത്യക്ഷയായത്. പിന്നീട് പലതരത്തിലുള്ള വാര്‍ത്തകളാണ് കനകയുടേതായി പുറത്തുവന്നത്. ഇപ്പോഴിതാ നടിയുടെ ഏറ്റവും പുതിയ ചിത്രങ്ങള്‍ വൈറലാവുന്നു.
തമിഴ് സിനിമാ ലോകത്ത് നിറഞ്ഞുനിന്ന നടി ദേവികയുടെ മകളായിട്ടാണ് കനക അഭിനയ ലോകത്തേക്ക് എത്തിയത്. കരകാട്ടക്കാരന്‍ എന്ന ആദ്യ ചിത്രം വന്‍ ഹിറ്റായി. തുടര്‍ന്ന് തമിഴില്‍ നിന്നും തെലുങ്കില്‍ നിന്നും മലയാളത്തില്‍ നിന്നുമെല്ലാം അവസരങ്ങള്‍ ഒഴുകിയെത്തി. അമ്മയായിരുന്നു കനകയ്ക്ക് എല്ലാം. കനക ചെറുതായിരിക്കുമ്പോള്‍ തന്നെ ദേവികയും ഭര്‍ത്താവ് ദേവദാസും വേര്‍പിരിഞ്ഞിരുന്നു. പിന്നീട് അമ്മയും മകളും ഒറ്റയ്ക്കുള്ള ജീവിതമായി. അമ്മ മരണപ്പെട്ടതോടെ ആരുമില്ലാത്ത അവസ്ഥയില്‍ കനക മാനസികമായി തകര്‍ന്നു.
അമ്മയുടെ വേര്‍പാടോടെയാണ് കനക അഭിനയത്തില്‍ നിന്നെല്ലാം മാറി നിന്നത്. അതോടെ കുറേക്കാലം കനകയുടെ വിവരമൊന്നും ഉണ്ടായിരുന്നില്ല. പിന്നീട് ഭര്‍ത്താവിനെ കാണാനില്ല എന്ന് പറഞ്ഞ് കനക മാധ്യമങ്ങള്‍ക്ക് മുന്നിലെത്തിയപ്പോഴാണ് നടി വിവാഹിതയായി എന്ന കാര്യം പോലും ആളുകള്‍ അറിയുന്നത്. കാലിഫോര്‍ണിയയില്‍ എന്‍ജിനിയര്‍ ആയിരുന്ന മുത്തുകുമാരന്‍ എന്നയാളുമായി 2017 ല്‍ വിവാഹം നടന്നു എന്നും, 15 ദിവസങ്ങള്‍ക്ക് ശേഷം ഭര്‍ത്താവിനെ കാണാതായി എന്നുമാണ് കനക മാധ്യമങ്ങളോട് പറഞ്ഞത്. എന്നാല്‍ മകളുടെ കല്യാണം കഴിഞ്ഞിട്ടില്ല എന്നും, കനകയ്ക്ക് മാനസിക വിഭ്രാന്തിയാണെന്നും അച്ഛന്‍ ദേവദാസ് വെളിപ്പെടുത്തുകയുണ്ടായി.
സത്യത്തില്‍, അമ്മയുടെ മരണത്തിന് ശേഷം അന്ധവിശ്വാസങ്ങളുടെ പടുകുഴിയില്‍ കനക അകപ്പെട്ടിരുന്നു. മരിച്ചുപോയ അമ്മയുമായി സംസാരിക്കാന്‍ കഴിയും എന്ന് പറഞ്ഞ് അമുത എന്ന സ്ത്രീ കനകയെ പറ്റിക്കുകയായിരുന്നു. ആ സ്ത്രീ വഴിയാണ് മുത്തുക്കുമരനുമായി അടുപ്പത്തിലായതും. ആ ബന്ധം അങ്ങനെ അവസാനിച്ചു. അതിന് ശേഷം കനക വീണ്ടും കാണാമറയത്തായി. അച്ഛനുമായുള്ള സ്വത്ത് തര്‍ക്കത്തിന്റെ പേരിലാണ് പിന്നീട് കനക മാധ്യമങ്ങള്‍ക്ക് മുന്നിലെത്തിയത്. അമ്മയുടെ കണക്കില്ലാത്ത സ്വത്തുക്കളുടെ ഏക അവകാശിയായിരുന്നു കനക. ആ സ്വത്ത് തര്‍ക്കവും മാധ്യമങ്ങളില്‍ വാര്‍ത്തയായി.
പിന്നീട് കനകയെ ആരും കണ്ടില്ല. ചെന്നൈയിലെ രാജഅണ്ണാമലൈപുരത്തുള്ള വീട്ടില്‍ പുറം ലോകവുമായി യാതൊരു ബന്ധവുമില്ലാതെ കഴിയുകയായിരുന്നു കനക. പെട്ടന്നൊരു ദിവസം അടച്ചിട്ട മുറിയില്‍ നിന്ന് പുക വരുന്നത് കണ്ട് അയല്‍വാസികള്‍ പൊലീസില്‍ പരാതിപ്പെട്ടപ്പോഴാണ് കനക വീണ്ടും മാധ്യമങ്ങളില്‍ വാര്‍ത്തയായത്. അന്ന് വീട്ടിലേക്ക് വന്ന ഫയര്‍ഫോഴ്‌സുകാരെ, ഇവിടെ ഒന്നും സംഭവിച്ചില്ല എന്ന് പറഞ്ഞ് കനക തിരിച്ചയച്ചു. കനകയ്ക്ക് മാനസിക രോഗമാണ്, കാന്‍സറാണ് എന്നൊക്കെയുള്ള ഗോസിപ്പുകളും ഇതിനിടയില്‍ വന്നിരുന്നു. ആ സംഭവത്തിന് ശേഷമാണ് തമിഴ് നടി കുട്ടിപദ്മിനി കനകയ്‌ക്കൊപ്പമുള്ള ഫോട്ടോ പങ്കുവച്ച് രംഗത്തെത്തിയത്. കനക ഹാപ്പിയാണെന്ന് ആ ചിത്രങ്ങളില്‍ വ്യക്തമായിരുന്നു. ഇപ്പോഴിതാ പുറം ലോകവുമായി യാതൊരു ബന്ധവുമില്ല എന്ന് പറഞ്ഞ കനകയുടെ ചെന്നൈയിലെ ഷോപ്പിങ് മാളുകളില്‍ നിന്നുള്ള ചിത്രങ്ങള്‍ പുറത്തുവരുന്നു.
@All rights reserved Typical Malayali.
Leave a Comment