നിന്നോളം മികച്ചൊരു സമ്മാനം എനിക്ക് കിട്ടിയിട്ടില്ല! കണ്‍മണിയെക്കുറിച്ച് മുക്ത പറഞ്ഞത്? വൈറലായി വീഡിയോ
ഒരുകാലത്ത് തിരക്കിട്ട അഭിനേത്രിയായിരുന്നു മുക്ത. തെന്നിന്ത്യന്‍ ഭാഷകളിലെല്ലാമായി സിനിമ ചെയ്തിട്ടുണ്ട് നടി. റിമി ടോമിയുടെ സഹോദരനായ റിങ്കു ടോമിയാണ് മുക്തയെ വിവാഹം ചെയ്തത്. വിവാഹത്തോടെ കുടുംബകാര്യങ്ങളുമായി മാറിനില്‍ക്കുകയായിരുന്നു മുക്ത. അടുത്തിടെ കൂടത്തായി പരമ്പരയിലൂടെയാണ് അഭിനയ ലോകത്തേക്ക് തിരിച്ചുവന്നത്. നിരവധി അവസരങ്ങള്‍ ഇടയില്‍ തേടിവന്നുവെങ്കിലും അതൊന്നും സ്വീകരിച്ചിരുന്നില്ല. കൂടത്തായി സംഭവത്തെ അടിസ്ഥാനമാക്കിയുള്ള പരമ്പരയിലൂടെയുള്ള തിരിച്ചുവരവിന് ഗംഭീര സ്വീകരണമായിരുന്നു ലഭിച്ചത്.
മകളടക്കം പ്രിയപ്പെട്ടവരെല്ലാം രണ്ടാംവരവിനായി മികച്ച പിന്തുണയാണ് നല്‍കിയത്. നെഗറ്റീവ് ടച്ചുള്ള ക്യാരക്ടര്‍ ചെയ്താല്‍ ആളുകള്‍ സ്വീകരിക്കുമോയെന്നായിരുന്നു ആശങ്ക. അത് ക്യാരക്ടറല്ലേ, മുക്ത ശരിക്കും എങ്ങനെയാണെന്ന് ഞങ്ങള്‍ക്ക് അറിയാവുന്നതല്ലേ എന്നായിരുന്നു ആരാധകരും പറഞ്ഞത്. അഭിനയ ജീവിതത്തിലെ മികച്ച ക്യാരക്ടര്‍ തന്നെയാണ് കൂടത്തായി പരമ്പരയിലേത്. മോശം ആളുകളല്ലേ അങ്ങനെയൊക്കെ ചെയ്യുന്നത്, അമ്മ എന്തിനാണ് അതില്‍ അഭിനയിച്ചതെന്നായിരുന്നു ആദ്യം കണ്‍മണി ചോദിച്ചത്. ക്യാരക്ടറിനെക്കുറിച്ച് ആദ്യം അവളോട് പറഞ്ഞില്ലായിരുന്നു.
വീണ്ടും അഭിനയിക്കാന്‍ പോവുന്നുവെന്നറിഞ്ഞപ്പോള്‍ അവള്‍ക്ക് സന്തോഷമായിരുന്നു. മുന്‍പൊക്കെ എല്ലാ കാര്യത്തിനും അമ്മ വേണമായിരുന്നു അവള്‍ക്ക്. എന്നാല്‍ അമ്മ ജോലിക്ക് പോയപ്പോള്‍ എല്ലാ കാര്യങ്ങളും തനിച്ച് ചെയ്യുകയായിരുന്നു അവള്‍. പക്വതയുള്ളൊരു കുട്ടി പെരുമാറുന്നത് പോലെയായിരുന്നു അവള്‍. അമ്മയ്ക്ക് അഭിനയം എത്രത്തോളം ഇഷ്ടമാണെന്ന് അവള്‍ക്ക് അറിയാവുന്നതുമാണ്. അമ്മയെപ്പോലെ തന്നെ അഭിനേത്രിയായും കണ്‍മണി തിളങ്ങിയിരുന്നു. റീല്‍സ് വീഡിയോയിലും റിമി ടോമിയുടെ വ്‌ളോഗിലുമൊക്കെയായി അഭിനയവും വഴങ്ങുമെന്ന് കണ്‍മണി മുന്നെ തെളിയിച്ചതാണ്.
ബിഗ് സ്‌ക്രീനില്‍ നിന്നുള്ള അവസരം തേടിയെത്തിയപ്പോള്‍ സന്തോഷത്തോടെ സ്വീകരിക്കുകയായിരുന്നു. പത്താംവളവില്‍ അഭിനയിച്ചതോടെ മുഖത്ത് കളറടിച്ചാണ് ചോര വരുന്നതൊക്കെ അവള്‍ക്ക് അറിയാം. ഏതെങ്കിലും രംഗം കണ്ട് ഞാന്‍ സങ്കടപ്പെടുമ്പോള്‍ അമ്മാ അത് അഭിനയമല്ലേ, സിനിമയല്ലേ എന്നൊക്കെ പറഞ്ഞ് അവള്‍ വരാറുണ്ട്. കണ്‍മണിയുടെ വിശേഷങ്ങളെല്ലാം സോഷ്യല്‍മീഡിയയിലൂടെയായി മുക്ത പങ്കിടാറുണ്ട്.
പ്രസവിച്ച് മകളെ കൈയ്യില്‍ കിട്ടിയത് മുതലുള്ള രംഗങ്ങള്‍ ചേര്‍ത്തിണക്കിയൊരു വീഡിയോയിലൂടെയാണ് മുക്ത കണ്‍മണിക്ക് പിറന്നാളാശംസ നേര്‍ന്നത്. ജീവിതത്തില്‍ എനിക്ക് ലഭിച്ച ഏറ്റവും അമൂല്യമായ സമ്മാനമാണ് നീ. നിന്നില്‍ ഞാന്‍ എന്നെത്തന്നെയാണ് കാണുന്നത്. എന്റെ സന്തോഷവും സമാധാനവുമെല്ലാം നീയാണ്. എന്റെ തന്നെ വേറൊരു പതിപ്പാണ് നീ. നിന്നോടുള്ള സ്‌നേഹം എനിക്കൊരിക്കലും വിവരിക്കാനാവില്ലെന്നും മുക്ത പറയുന്നു. 8ാം പിറന്നാളാഘോഷിക്കുന്ന മുക്തയ്ക്ക് നിരവധി പേരാണ് പിറന്നാളാശംസ അറിയിച്ചിട്ടുള്ളത്. റിമി ടോമിയും കണ്‍മണിയുടെ വീഡിയോയുമായെത്തിയിട്ടുണ്ട്.
@All rights reserved Typical Malayali.
Leave a Comment