മാളവികയെ ഇമോഷണലാക്കിയ പാര്‍വ്വതിയുടെ ആ ഡാന്‍സ്; ഒരു അമ്മയുടെ സ്‌നേഹം മുഴുവന്‍ ഓരോ ചലനത്തിലുമുണ്ട്, കണ്ടവരെയും കരയിപ്പിച്ച ചുവടുകള്‍!
മാളവിക ജയറാമിന്റെ വിവാഹം കഴിഞ്ഞിട്ട് ഒരാഴ്ച കഴിഞ്ഞു. പക്ഷേ വിശേഷങ്ങള്‍ ഇനിയും അവസാനിച്ചിട്ടില്ല. മാളവികയുടെ വിവാഹ ദിവസവും, ധരിച്ച വസ്ത്രങ്ങളും, ലുക്കും, വിവാഹത്തിന് പങ്കെടുത്തവരും എല്ലാം വാര്‍ത്തകളില്‍ നിറഞ്ഞു. ഒരുപാട് ചടങ്ങുകളും ആഘോഷങ്ങളും, ഒന്നിലധികം റിസപ്ഷനുകളും കല്യാണത്തിന് ഉണ്ടായിരുന്നു. അങ്ങനെ ഒരു റിസപ്ഷനില്‍ മകള്‍ക്ക് വേണ്ടി പാര്‍വ്വതി കളിച്ച നൃത്തമാണ് ഇപ്പോള്‍ വൈറലാവുന്നത്.
വൈറ്റ്‌ലൈന്‍ ഫോട്ടോഗ്രാഫി പകര്‍ത്തിയ വീഡിയോ ഇന്‍സ്റ്റഗ്രാമിലൂടെ പങ്കുവയ്ക്കുകയായിരുന്നു. ‘ഒരു ദൈവം തന്ത പൂവേ’ എന്ന പാട്ടിന്, ആ ഫീലോടുകൂടെ പാര്‍വ്വതി ചുവടുകള്‍ വയ്ക്കുമ്പോള്‍ മാളവിക ഇമോഷണലാവുന്നത് വീഡിയോയില്‍ കാണാം. ശരിക്കുമത് ഒരു മാജിക് ആയിരുന്നു. പാര്‍വ്വതി ആ മ്യൂസിക്കില്‍, നിറഞ്ഞ ഫീലോടെ ചുവടുകള്‍ വയ്ക്കുമ്പോള്‍ വീഡിയോ കാണുന്ന ഞങ്ങളുടെ കണ്ണും നിറയുന്നു എന്ന് പറഞ്ഞ് പല അമ്മമാരും കമന്റ് ബോക്‌സില്‍ എത്തുന്നുണ്ട്
അഭിനേത്രി മാത്രമല്ല, നര്‍ത്തകി കൂടെയായ പാര്‍വ്വതി ഇടയ്ക്ക് തന്റെ ചുവടുകള്‍ പൊടിതട്ടിയെടുത്തിരുന്നുവെങ്കിലും, ഏറെ കാലമായി മാറ്റിവച്ചിരിക്കുകയായിരുന്നു. മകള്‍ക്ക് വേണ്ടി അത് വീണ്ടും തിട്ടപ്പെടുത്തി എന്നത് തന്നെ വലിയ ആകര്‍ഷണമാണ്.
‘അമ്മയുടെ സ്‌നേഹം മനോഹരമായ ഓരോ ചുവടുകളിലൂടെയും പ്രകടിപ്പിയ്ക്കുന്നു’ എന്ന് പറഞ്ഞാണ് വൈറ്റ്‌ലൈന്‍ ഫോട്ടോഗ്രാഫി ഡാന്‍സ് വീഡിയോ പങ്കുവച്ചത്. ഏറെ നാളുകള്‍ക്ക് ശേഷം അശ്വതി ജയറാം (പാര്‍വ്വതി) നൃത്തത്തിലുള്ള അവരുടെ കഴിവ് മകള്‍ക്ക് വേണ്ടി വീണ്ടും ആവര്‍ത്തിച്ചപ്പോള്‍, അതിന് സാക്ഷ്യം വഹിക്കാന്‍ കഴിഞ്ഞ ഞങ്ങള്‍ ശരിക്കും ഭാഗ്യവാന്മാരാണെന്ന് വീഡിയോ ടീം പറയുന്നു.
സ്‌നേഹവും അഭിനിവേശവും നിറഞ്ഞ പാര്‍വ്വതിയുടെ പ്രകടനം എല്ലാവരുടെയും ഹൃദയങ്ങളെ സ്പര്‍ശിച്ചു, സന്തോഷത്തിന്റെയും ഗൃഹാതുരത്വത്തിന്റെയും കണ്ണുനീര്‍ പടര്‍ത്തുകയും ചെയ്തത്രെ. അനുഗ്രഹീതരായ കുടുംബമാണ് ജയറാമിന്റേത് എന്ന് ആരാധകരും പറയുന്നു.
Leave a Comment