എന്റെ അപ്പൂന് ഒരുപാട് സ്‌നേഹത്തോടെ അച്ഛന്റെ പിറന്നാള്‍ ആശംസകള്‍; ചേട്ടന് പിറന്നാള്‍ ആശംസിച്ച വിസ്മയ പറഞ്ഞത്, പ്രണവിന് എത്ര വയസ്സായി?
വ്യത്യസ്തരായവരില്‍ വ്യത്യസ്തനാണ് പ്രണവ് മോഹന്‍ലാല്‍ എന്നാണ് പറയപ്പെടുന്നത്, ഇന്ന് ആ അപൂര്‍വ്വ ജന്മത്തിന്റെ ജന്മദിനമാണ്. പ്രണവ് മോഹന്‍ലാലിന് പിറന്നാള്‍ ആശംസകള്‍ അറിയിച്ച് അച്ഛന്‍ മോഹന്‍ലാലും, സഹോദരി വിസ്മയ മോഹന്‍ലാലും ഇന്‍സ്റ്റഗ്രാമില്‍ എത്തി.
‘എന്റെ പ്രിയപ്പെട്ട അപ്പുവിന് ജന്മദിനാശംസകള്‍. നിന്നെപ്പോലെ സ്‌പെഷ്യല്‍ ആയിരിക്കട്ടെ നിനക്ക് ഈ ദീവസവും. ഒരുപാട് സ്‌നേഹത്തോടെ അച്ഛന്‍’ എന്നാണ് പ്രണവിന്റെ ഒരു സിംഗിള്‍ ഫോട്ടോയ്‌ക്കൊപ്പം മോഹന്‍ലാല്‍ കുറിച്ചത്. ഏതോ ഒരു യാത്രയില്‍ എടുത്തതാണ് ഫോട്ടോ. ചിത്രത്തിന് താഴെ താരപുത്രന് ആശംസകള്‍ അറിയിച്ച് നിരവധി കമന്റുകളാണ് വരുന്നത്. മകന്‍ ഇപ്പോള്‍ ഏത് കുന്നിന്റെ മുകളിലായിരിക്കും, മകനെ തിരിച്ചുവരൂ എന്ന് ഒരു പോസ്റ്റിടാമായിരുന്നില്ലേ ലാലേട്ടാ, മകനെ ഓര്‍ത്തല്ലോ എന്നൊക്കെയുള്ള മറ്റ് കമന്റുകള്‍ക്കും കുറവൊന്നും ഇല്ല.
സഹോദരി വിസ്മയ മോഹന്‍ലാലും ചേട്ടന് ആശംസകള്‍ അറിയിച്ച് എത്തിയിട്ടുണ്ട്. ഒരുമിച്ചുള്ള ഏതോ യാത്രയില്‍, എവിടെ വച്ചോ ചായ കുടിയ്ക്കുന്ന ചിത്രത്തിനൊപ്പമാണ് വിസ്മയയുടെ പോസ്റ്റ്. ‘ഹാപ്പി ബര്‍ത്ത്‌ഡേ ബ്രോസ്‌കി’ എന്നാണ് വിസ്മയയുടെ ക്യാപ്ഷന്‍. കമന്റ് ബോക്‌സ് ഓഫ് ചെയ്തു വച്ചതിനാല്‍ പോസ്റ്റിന് താഴെ ആശംസകളൊന്നുമില്ല. ലൈക്കുകള്‍ ഒരുപാട് വരുന്നുണ്ട്.
1990 ല്‍ ആണ് പ്രണവ് മോഹന്‍ലാല്‍ ജനിച്ചത്. പന്ത്രണ്ടാം വയസ്സില്‍ അച്ഛന്റെ ബാല്യ കാലം ചെയ്തുകൊണ്ട് ഒന്നാമന്‍ എന്ന ചിത്രത്തിലൂടെ അഭിനയാരങ്ങേറ്റം കുറിച്ചു. സാഗര്‍ ഏലിയാസ് ജാക്കി എന്ന ചിത്രത്തിലും മോഹന്‍ലാലിന്റെ കുട്ടിക്കാലം ചെയ്തത് പ്രണവാണ്. പുഃനര്‍ജനി എന്ന ചിത്രത്തിലെ അഭിനയത്തിലൂടെ പ്രണവ് അച്ഛന്റെ മകന്‍ തന്നെ എന്ന് ആളുകളെ കൊണ്ട് പറയിപ്പിച്ചു. മേജര്‍ രവി സംവിധാനം ചെയ്ത പുഃനര്‍ജനി എന്ന ചിത്രത്തിലെ അഭിനയത്തിന് പ്രണവിന് മികച്ച ബാലതാരത്തിനുള്ള പുരസ്‌കാരം കിട്ടിയിരുന്നു.
പിന്നീട് കുറേക്കാലം പ്രണവിന്റെ വിവരങ്ങളൊന്നും ഉണ്ടായിരുന്നില്ല. പഠനത്തിലും യാത്രകളിലും എല്ലാം തിരക്കിലായിരുന്നു. ഇടയ്ക്ക് പ്രണവിന്റെ ‘ചാര്‍ലി’ സ്വഭാവത്തെ കുറിച്ച് മാഗസിനുകളില്‍ വാര്‍ത്ത വന്നു. കീറിയ ബനിയനും, പഴകി പാന്റ്‌സും, ഒറ്റ ജോഡി ചെറുപ്പം മാത്രമുള്ള പ്രണവിനെ കുറിച്ച് വായിച്ചത് പലര്‍ക്കും കൗതുകമായിരുന്നു. മോഹന്‍ലാലിനെ പോലൊരു സൂപ്പര്‍ സ്റ്റാരിന്റെ മകന്‍ എന്തുകൊണ്ട് ഇങ്ങനെ ലളിത ജീവിതം നയിക്കുന്നു എന്നത് പലര്‍ക്കും സന്ദേഹമായി. എന്നാല്‍ പിന്നീട്, പ്രണവ് അതാണ്, അങ്ങനെയാണ് എന്ന് എല്ലാവരും മനസ്സിലാക്കി.
തന്റെ യാത്രകള്‍ക്കുള്ള പണം സ്വരൂപിക്കുന്നതിനാണ് പിന്നീട് പ്രണവ് സിനിമയിലേക്ക് തിരിച്ചെത്തിയത്. ജീത്തു ജോസഫിന്റെ അസിസ്റ്റന്റായി തിരിച്ചുവന്ന പ്രണവ് പിന്നീട് അഭിനയിച്ചു തുടങ്ങി. അപ്പോഴും കൂടെ ജോലി ചെയ്തവര്‍ക്കെല്ലാം പ്രണവിന്റെ സിംപ്ലിസിറ്റിയെ കുറിച്ച് മാത്രമായിരുന്നു പറയാനുള്ളത്. ഒരു അഭിമുഖം പോലും പ്രണവ് നല്‍കാറില്ല, അവാര്‍ഡ് ഷോകളില്‍ പങ്കെടുക്കാറില്ല. സിനിമ ചെയ്യും, തിരിച്ച് യാത്രകളിലേക്ക് പോകും. വിനീത് ശ്രീനിവാസന്‍ സംവിധാനം ചെയ്ത വര്‍ഷങ്ങള്‍ക്ക് ശേഷം എന്ന സിനിമയിലാണ് ഏറ്റവും ഒടുവില്‍ അഭിനയിച്ചത്. നിലവില്‍ ഇപ്പോള്‍ തന്റെ ആദ്യത്തെ കവിതാ സമാഹാരം പുറത്തിറക്കാനുള്ള തയ്യാറെടുപ്പിലാണ് പ്രണവ്.
@All rights reserved Typical Malayali.
Leave a Comment