നാല്‍പത് വയസ്സായി, വയസ്സാവുന്തോറും ജീവിതത്തില്‍ ഞാന്‍ സന്തോഷവതിയാണ്; ആശംസ അറിയിച്ചവര്‍ക്കെല്ലാം നന്ദി പറഞ്ഞ് പ്രിയാമണി
തമിഴ് സിനിമയില്‍ തുടങ്ങി, ഇപ്പോള്‍ ബോളിവുഡ് വരെ ചെന്നു നില്‍ക്കുകയാണ് പ്രിയാമണി. മലയാളം, തെലുങ്ക്, തമിഴ്, കന്നട, ബോളിവുഡ് എന്നിങ്ങനെ പാന്‍ ഇന്ത്യന്‍ ലെവലില്‍ സിനിമകള്‍ ചെയ്യുകയും, എല്ലാ ഇന്റസ്ട്രിയിലും തന്റേതായ സ്ഥാനം കണ്ടെത്തി നിലനില്‍ക്കുകയും ചെയ്യുന്നു എന്ന് പറഞ്ഞാല്‍ അത് ചെറിയ കാര്യമല്ല. ആ വിജയം നേടിയ നടി പ്രിയാമണിയുടെ ജന്മദിനമായിരുന്നു ഇന്നലെ.
നാല്‍പത് വയസ്സിലേക്ക് കടന്ന നടിയ്ക്ക് ആശംസകള്‍ അറിയിച്ച് നിരവധി പ്രമുഖരും ആരാധകരും രംഗത്തെത്തിയിരുന്നു. ആശംസ അറിയിച്ചവര്‍ക്കെല്ലാം നന്ദി പറഞ്ഞ് പ്രിയാമണി പങ്കുവച്ച പോസ്റ്റാണ് ഇപ്പോള്‍ വൈറലാവുന്നത്.
സിനിമയില്‍ വന്നതുമുതലുള്ള തന്റെ യാത്രയെ കുറിച്ച് സൂചിപ്പിയ്ക്കുന്ന ഒരു വീഡിയോയ്‌ക്കൊപ്പമാണ് പ്രിയയുടെ നന്ദി പറച്ചില്‍. ‘എന്റെ റൂബി ജൂബിലി ആഘോഷിക്കുന്നു. പ്രായമാകുന്തോറും ഈ ജീവിതത്തിലും, ഈ ജീവിതം പങ്കിടാന്‍ ഒപ്പമുണ്ടായിരുന്ന മനോഹരമായ ആളുകളോടും ഞാന്‍ നന്ദിയുള്ളവളാണ്. മനോഹരമായ ജന്മദിനാശംസകള്‍ അറിയിച്ച എല്ലാവര്‍ക്കും നന്ദി. ഇനിയും ഉയരങ്ങളിലേക്ക്’ എന്നാണ് പ്രിയയുടെ പോസ്റ്റ്
പിറന്നാള്‍ ആശംസകള്‍ അറിയിക്കാന്‍ വിട്ടുപോയവര്‍ എല്ലാം കമന്റ് ബോക്‌സിലും എത്തി ആശംസകള്‍ പറയുന്നുണ്ട്. പ്രിയയോടുള്ള സ്‌നേഹം പ്രകടിപ്പിയ്ക്കുന്ന എല്ലാ ഭാഷയിലും പെട്ട ആരാധകരെയും കമന്റ് ബോക്‌സില്‍ കാണാം
എവരേ ആട്ടഗാടു എന്ന സിനിമയിലൂടെ 2003 ല്‍ ആണ് പ്രിയാമണി സിനിമാ ലോകത്തേക്ക് എത്തിയത്. സത്യം എന്ന ചിത്രത്തിലൂടെ മലയാളത്തിലെത്തിയ നടിയ്ക്ക് ഇവിടെയും വലിയ സ്വീകരണം തന്നെ ലഭിച്ചു. ഒറ്റ നാണയം, തിരക്കഥ, പുതിയമുഖം, പ്രാഞ്ചിയേട്ടന്‍, ഗ്രാന്റ് മാസ്റ്റര്‍ എന്നിങ്ങനെ തുടങ്ങി നേര് എന്ന സിനിമവരെയും പ്രിയ ചെയ്ത സിനിമകളും റോളുകളും എല്ലാം ഹിറ്റാണ്. സിനിമയെക്കാള്‍ ടെലിവിഷന്‍ പ്രേക്ഷകര്‍ പ്രിയാമണിയെ ഇഷ്ടപ്പെട്ടത് ഡി ഫോര്‍ ഡാന്‍സ് എന്ന റിയാലിറ്റി ഷോയിലൂടെയാണ്.
ഇതിനിടയില്‍ പരുത്തിവീരന്‍ എന്ന ചിത്രത്തിന് മികച്ച നടിയ്ക്കുള്ള ദേശീയ പുരസ്‌കാരം നേടി. ചെന്നൈ എക്‌സ്പ്രസ്സ് എന്ന ചിത്രത്തിലെ ഒരു പാട്ടിന് വേണ്ടിയാണ് പ്രിയാമണി ബോളിവുഡിലേക്ക് എത്തിയത്. പിന്നീട് അതീത്, ജവാന്‍, ആര്‍ട്ടിക്കിള്‍ 370 പോലുള്ള സിനിമകളിലൂടെ അവിടെയും നിലയുറപ്പിക്കുകയായിരുന്നു.
@All rights reserved Typical Malayali.
Leave a Comment