ചേട്ടന്റെ ജീവിതത്തില്‍ നിന്ന് ഞാന്‍ കണ്ടു പഠിച്ച കാര്യം; ജന്മദിനാശംസകള്‍ അറിയിച്ച് സൂര്യയെ കാര്‍ത്തിക് പറഞ്ഞ വാക്കുകള്‍, ഇതിലെല്ലാമുണ്ട്!
ഇന്ന് മലയാളികള്‍ക്കും പ്രിയപ്പെട്ട, തമിഴ് നടന്‍ സൂര്യയുടെ നാല്‍പ്പത്തിയൊന്‍പതാം ജന്മദിനമാണ്. ആരാധകര്‍ ഗംഭീരമായി ആഘോഷിച്ചുകൊണ്ടിരിക്കുകയാണ്. സിനിമ ലോകത്തെ ആരാധകരായ താരങ്ങളും, സഹപ്രവര്‍ത്തകരും എല്ലാം സൂര്യയ്ക്ക് ജന്മദിനാശംസകള്‍ അറിയിച്ചുകൊണ്ടെത്തുന്നു. അക്കൂട്ടത്തില്‍ അല്പം വ്യത്യസ്തം അനിയന്‍ കാര്‍ത്തിയുടെ ആശംസ തന്നെയാണ്. ഹൃദയത്തില്‍ തൊട്ടെഴുതിയ കുറിപ്പും ഫോട്ടോയും ആരാധകര്‍ ഏറ്റെടുത്തുകഴിഞ്ഞു.
വൈറ്റ് ആന്റ് വൈറ്റ് ഡ്രസ്സില്‍ സൂര്യയും കാര്‍ത്തിയും ഒന്നിച്ച് നില്‍ക്കുന്ന ഫോട്ടോയ്‌ക്കൊപ്പമാണ് പോസ്റ്റ്. ‘പൂജ്യത്തില്‍ നിന്ന് തുടങ്ങിയാലും പ്രതിബദ്ധതയിലൂടെയും കഠിനാധ്വാനത്തിലൂടെയും എന്തും പഠിക്കാനും നേടാനും കഴിയുമെന്ന് എന്നെ പഠിപ്പിച്ച മനുഷ്യന് ജന്മദിനാശംസകള്‍. സമൂഹത്തില്‍ ഇത്രയധികം സ്‌നേഹം പകരുന്ന സ്‌നേഹമുള്ള ആരാധകര്‍ക്ക് സ്‌നേഹത്തിന്റെ നിറകുടമാണ്’ എന്ന് കാര്‍ത്തി എഴുതി
കാര്‍ത്തി ഈ പറഞ്ഞതില്‍ കൂടുതലൊന്നും സൂര്യയെ കുറിച്ച് പറയാനില്ല, ഇതിലെല്ലാമുണ്ട് എന്നാണ് ആരാധകര്‍ പറയുന്നത്. അച്ഛന്റെ പേരും പ്രശസ്തിയും കൊണ്ട് സിനിമയിലെത്തിയ സൂര്യയ്ക്ക് ആദ്യ ചിത്രം വന്‍ പരാജയമായിരുന്നു. ഒരുപാട് വിമര്‍ശനങ്ങള്‍ നേരിടേണ്ടി വന്ന സമയത്ത് അഭിനയം മതിയാക്കി പോകാന്‍ പോലും ആലോചിച്ചിരുന്നുവത്രെ. എന്നാല്‍ നടന്‍ രഘുവരന്റെ വാക്കുകളാണ് മാറി ചിന്തിക്കാന്‍ സൂര്യയെ പ്രേരിപ്പിച്ചത്.
ഒന്നും ഇല്ലാത്തിടത്ത് നിന്ന് വളരെ അധികം കഷ്ടപ്പെട്ടു തന്നെയാണ് സൂര്യ ഇന്ന് കാണുന്ന നിലയിലേക്ക് വളര്‍ന്നത്. കഥാപാത്രത്തിന് വേണ്ടി, ഇന്‍ഹിബിഷന്‍സില്ലാതെ ഏതറ്റം വരെയും പോകുമെന്ന് നന്ദ, പിതാമഹന്‍, ഗജനി, വാരണം ആയിരം പോലുള്ള സിനിമകളില്‍ പ്രേക്ഷകര്‍ കണ്ടതാണ്. സാമൂഹ്യ കാര്യങ്ങളിലും വളരെ കൃത്യതയോടെ സജീവമായി ഇടപെടുന്ന സൂര്യ, ആരാധകരെ സംബന്ധിച്ച് കാര്‍ത്തി പറഞ്ഞതുപോലെ സ്‌നേഹത്തിന്റെ നിറകുടമാണ്.
കാര്‍ത്തിയുടെ പോസ്റ്റിന് താഴെ ഈ ചേട്ടന്റെയും അനിയന്റെയും സ്‌നേഹ ബന്ധത്തെ കുറിച്ച് പ്രശംസിച്ച് നിരവധി കമന്റുകളാണ് വന്നിട്ടുള്ളത്. പരസ്പരം എല്ലാ കാലത്തും പിന്തുണച്ച് മുന്നോട്ട് പോകുന്ന രണ്ട് പേരാണ് കാര്‍ത്തിയും സൂര്യയും. ഇരുവരും ഒന്നിച്ചഭിനയിക്കുന്ന ഒരു സിനിമയ്ക്ക് വേണ്ടി കാത്തിരിക്കുകയാണ് ആരാധകര്‍. ഒന്നിച്ചഭിനയിച്ചില്ല എന്നേയുള്ളൂ, കാര്‍ത്തിയുടെ സിനിമകള്‍ സൂര്യയുടെ 2 ഡി എന്റര്‍ടൈന്‍മെന്‌റ്‌സ് നിര്‍മിച്ചിട്ടുണ്ട്. സൂര്യയും കാര്‍ത്തിയും ഒന്നിച്ചഭിനയിച്ചിട്ടില്ല എങ്കിലും, ചേട്ടത്തിയമ്മ ജ്യോതികയ്‌ക്കൊപ്പം ചെയ്ത തമ്പി എന്ന ചിത്രം ഏറെ ശ്രദ്ധ നേടിയിരുന്നു.
@All rights reserved Typical Malayali.
Leave a Comment