ആഗ്രഹിച്ച പെണ്ണിനെ സ്വന്തമാക്കിയ സുരേഷ് ഗോപി, 34 വര്‍ഷങ്ങള്‍ക്ക് മുന്‍പ് നടന്ന സുരേഷ് ഗോപിയുടെ വിവാഹ ചിത്രം വൈറലാവുന്നു

കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയയിലെ കാര്യമായ ചര്‍ച്ചയാണ് ഭാഗ്യ സുരേഷിന്റെ വിവാഹം. ഇന്ത്യന്‍ പ്രധാനമന്ത്രി മുഖ്യാതിഥിയായി എത്തിയ സുരേഷ് ഗോപിയുടെ മകളുടെ വിവാഹ ചിത്രങ്ങളുടെ ബഹളമാണ് ഇന്നലെ മുതല്‍ സോഷ്യല്‍ മീഡിയയില്‍. പ്രധാനമന്ത്രിയ്‌ക്കൊപ്പം മമ്മൂട്ടി, മോഹന്‍ലാല്‍, ജയറാം, ദിലീപ് തുടങ്ങിയ വന്‍ താരങ്ങള്‍ കൂടെയായതോടെ കല്യാണം ഒരു ഗംഭീര ആഘോഷമായി.

ഭാഗ്യയുടെ കല്യാണച്ചിത്രങ്ങള്‍ക്കിടയിലൂടെ ഇതാ അച്ഛന്‍ സുരേഷ് ഗോപിയുടെയും അമ്മ രാധികയുടെയും വിവാഹ ചിത്രങ്ങളും വൈറലാവുന്നു. 1990 ല്‍ നടന്ന സുരേഷ് ഗോപിയുടെയും രാധികയുടെ വിവാഹ ചിത്രത്തിന് ഇന്നലെ നടന്ന ഭാഗ്യ സുരേഷിന്റെ വിവാഹ ചിത്രങ്ങളുമായി നേരിയ സാമ്യമൊക്കെ കാണാം. താലികെട്ടിയതിന് ശേഷം രാധികയും കസവ് സാരിയാണ് ധരിച്ചിരുന്നത്. അന്ന് നടന്ന കല്യാണത്തിലും സുരേഷ് ഗോപിയോട് ചേര്‍ന്ന് മമ്മൂട്ടിയും മോഹന്‍ലാലും നില്‍ക്കുന്നുണ്ടായിരുന്നു.

മനസ്സില്‍ ആഗ്രഹിച്ചതുപോലെ ഒരു ഭാര്യയെയാണ് തനിക്ക് കിട്ടിയത് എന്ന് സുരേഷ് ഗോപി പല അവസരത്തിലും പറഞ്ഞിട്ടുണ്ട്. എണ്ണമയമുള്ള തലമുടിയില്‍ തുളസിക്കതിര്‍ ചൂടി നില്‍ക്കുന്ന, മെലിഞ്ഞ ഒരു നാട്ടിന്‍പുറത്തുകാരി പെണ്‍കുട്ടിയായിരുന്നുവത്രെ സുരേഷ് ഗോപിയുടെ ഭാവി വധു സങ്കല്‍പം. രാധിക അതുപോലെ എല്ലാം ഒത്തുവന്ന ഒരു പെണ്‍കുട്ടിയായിരുന്നു.

സുരേഷ് ഗോപി പെണ്ണ് കാണാതെയാണ് വിവാഹം നിശ്ചയിച്ചതത്രെ. അച്ഛനും അമ്മയും പോയി പെണ്ണ് കണ്ടതിന് ശേഷം, ഞങ്ങള്‍ക്ക് ഇവള്‍ മതി മകളായി എന്ന് തീരുമാനിച്ചുവത്രെ. അക്കാര്യം സുരേഷ് ഗോപിയെ വിളിച്ചു പറഞ്ഞു. ഒരുക്കം എന്ന ചിത്രത്തിന്റെ ലൊക്കേഷനിലായിരുന്നു അന്ന് സുരേഷ് ഗോപി. അച്ഛനും അമ്മയ്ക്കും ബോധിച്ചു എന്ന് പറഞ്ഞപ്പോള്‍, തനിക്കിനി കാണേണ്ടതില്ല എന്നായിരുന്നുവത്രെ സുരേഷ് ഗോപിയുടെ മറുപടി. നിശ്ചയത്തിന്റെ സമയത്താണ് രാധികയെ കണ്ടത് എന്നും സുരേഷ് ഗോപി പറഞ്ഞിരുന്നു.

@All rights reserved Typical Malayali.